Ebdulhesen Raci - Qezel (ses) Qudret Huseynpur

(Facebook Rəsmi hesab)
  / sabit.qasimov.9  

(İnstagram Rəsmi hesab)/
  / sabit5555  

Dağut o əgri qaşun üstə zülfi-qârə, yeri,
Ver indi məhşəri-kübrâdə, zülfüqârə yeri.

Quru yer üstə qədəm qoyma, minnətün çəkirəm,
Göz üstə qoy qədəm, ey yâri-mâhpârə, yeri.

Gedəndə, mən sənə qurban, rəqîbdən gizlin,
Dalınca gəlməgimə bârı et işârə, yeri.

Gəl indi cânımı al, baxma qeyrlər sözünə,
Bu xeyr işdə dəxi yoxdu istixârə yeri.

Belə dağıtdı yüzə kâkilün nəsîmi-səhər,
Ki, qalmadı dəxi, ey mâhru, nəzârə yeri.

Fəğâni-bülbülü gör, bircə xâr ilən gülə bax,
Günâh səndə degül, tüf bu rûzigârə, yeri.

Əgər yəqînim ola, yâr olubsan əğyârə,
Ölüncə getməyəcək, sînədən bu yârə yeri.

Alıb bu könlümü, nâz ilə indi ki, gedüsən,
Qayıt bu cânımı da, algilən dübârə yeri.

Nigâr kuyidi, can verməsəm nəsîb olmaz,
Məgər verəllə behişti günâhkârə? Yeri!

Rəvâdu, həsrəti-rüxsârın ilə döndərsin,
Sirişki-əşk ilə bu Râci, lâləzârə yeri.