සිංහරාජ වනාන්තරයේ මායිමට ගිය ගමන | Lankagama Waterfalls | Sinharaja rainforest | Location Two.

හායි යාලුවනේ කොහොමද ඉතින් ඔයාලට. ඔන්න අපි මේ පාර ගියේ අපේ රටේ හදවත විදිහට සැලකෙන සිංහරාජ වනාන්තරයේ මායිමට. අපිටනම් මේ ගමනට දවස් තුනක් ගියා. අපි පලවෙනි දවසේ පැය 05ක කෝච්චි ගමනකුයි 🤪 පැය 04ක බස් ගමනකිනුයි පස්සෙ හවස් වෙනකොට අපේ කැම්පස් එකේ යාලුවා ලහිරු මල්ලිලාගෙ ගෙදරට ගියා. ලහිරුයි මල්ලියි විදුශාන් මල්ලියි දෙන්න බයික් එකේ නෙළුව ටවුන් එකට ඇවිත් හිටිය අපිව ගන්න😍. පලවෙනි දවසෙ ඉතින් අපි විවේක අරන් රෑට කෑම කාල නිදාගත්ත.

දෙවෙනි දවසෙ අපි උදේම නැගිට්ටත් අපි ගමන යන්න පිටත් උනේ 09ත් පහුවෙලා. මොකද එහෙට උදේ ඉර එලිය වැටෙන්න ටිකක් වෙලා යනව 😊 තව දෙයක්, ලහිරු මල්ලාගේ ගෙදර ඉස්සරහින්මයි ගිං ගග යන්නෙත්. අපි ටිකක් එලිය වැටුනට පස්සෙ පිටත් වෙලා මුලින්ම නතර උනේ ජල විදුලි බලාගාරයක් බලන්නයි. ජල විදුලි බලාගාරෙ නම තමා මාදුගැට ජල විදුලි බලාගාරය. ඊට පස්සෙ අපි කෙලින්ම පිටත් උනේ ලංකාගමට යන්නයි. ඒ යන අතර මගදි අපිට හම්බෙනව නෙළුව දූලි ඇල්ල. අපි එතන නතර වෙන් නැතුව දිගටම ලංකාගමට යන්න පිටත් වෙන්නෙ ඒක ආපහු එනකොට යන්න ඕන විශේශ තැනක් නිසයි 🙂.

ලංකාගමට යන්න තියෙන මේ පාර හරිම ලස්සනයි. ඇත්තම කීවොත් කොළම කොළ පාටයි. කැලයක් මැද්දින් යන්න තියෙන හරි ලස්සන පාරක්. ඒ වගේ පාරක බයික් එකක යනව කියන්නෙ අමුතුම ෆීලින් එකක් 🥰 අපි ගියේ සිංහරාජ මායිමේම තියෙන ලංකාගම දිය ඇලි වල සුන්දරත්වය බලන්නයි. මේ මායිමේ තියෙනව දිය ඇලි 05ක්. ඉතින් මේ දිය ඇලි බලන්න යන්න ඔයාල මාර්ගෝපදේශක කෙනෙක්, ඒ කියන්නෙ ගයිඩ් කෙනෙක් ගන්න ඕන. ඒකට හේතුව තමා මේ දිය ඇලි කොහෙද තියෙන්නෙ කියල අපිට තනියම ගිහින් හොයා ගන්න ටිකක් අමාරුයි සහ අනෙක් දේ තමා අපේ ආරක්ශාව. ඉතින් එතනදි ඔයාල දිය ඇලි බලන්න යන්න ටිකට් එකක් ගන්න ඕන වගේම ගයිඩ් කෙනෙකුත් ගන්න ඕන. ගනනුත් ඇත්තටම සාදාරනයි.

ඉතින් අපිත් එක්ක අපේ ගමනට සම්බන්ද උන ගයිඩ් තමා ගයාන් අයිය. දිය ඇලි ගැන තොරතුරු, ඒවගේ නම් හැදුන හැටි වගේ අවශ්‍ය හැම තොරතුරක්ම ඒ අයිය අපිට කියල දුන්න. අපි බලන්න ගිය දිය ඇලි

1) බ්‍රහම්මණ ඇල්ල
2) තට්ටු ඇල්ල
3) දූවිලි ඇල්ල
4) ගල් ඔරු ඇල්ල
5) ඌරන් වැටුන ඇල්ල

මේ දිය ඇලි හරිම ලස්සනයි. ඒ වගේම තමා මේවගේ පිහිටීම එකකට එකක් වෙනස්. බ්‍රහම්මණ ඇල්ල තමා යන කෙනෙක්ට මුලින්ම හම්බෙන ඇල්ල. තට්ටු ඇල්ලෙ ගල් පිහිටලා තියෙන්නෙ තට්ටු තට්ටු විදිහට, ඒ හින්ද ඇල්ල කඩන් වැටෙන්නෙත් තට්ටු විදිහට, දූවිලි ඇල්ල තමා තියෙන උසම ඇල්ල. ගල් ඔරු ඇල්ල තියෙන්නෙ ගල් දෙකක් මැද්දෙන් පහල. සාමන්‍යයෙන් අඩි 100ක් විතර පහලින් කියල තමා කීවෙ. ඌරන් වැටුන ඇල්ල කොටස් තුනකට තියෙන්නෙ. ඒකෙ දෙවෙනි කොටසයි පලවෙනි කොටසයි බලන්න යන්න පුලුවන්.

ඇත්තටම මේක කිසිම කම්මැලි කමක් නැතුව විනෝදෙන් යන්න පුලුවන් ගමනක්. අපිට නොමිලේ ෆිශ් තෙරපි එකකුත් ලැබුන 😊 මාලු ගොඩාක් ඉන්නව. ආහ් තව දෙයක්, ෆිශ් තෙරපි වගේම තමා අපිට කූඩැලු තෙරපිත් හම්බුනා හොද හැටි 😅. කොහොම හරි සුන්දර ගමන්ක් තමා මේ ලංකාගම ඇලි බලන්න යන ගමන. ලග ඉන්න අයට එක දවසින් ගිහින් එන්න පුලුවන් ගමනක්. නාන්න ඕන නම් නාන්නත් පුලුවන් ඔයාලට. පැය තුනක් වගේ ගියා අපිට මුලු ටුවර් එකටම.

ඉතින් ඔයාල මතක තියාගන්න ඕන දෙයක් තමා තමන්ගෙ ආරක්ශාව. මොකද මේ පරිසරය තෙත පරිසරයක් නිසා ලිසන්න පුලුවන් අවදානම වැඩී. ඔයාල එක්කන් යන ගයිඩ්ට ඇහුන්මන් දීල මේ ගමන ලස්සනට ගිහින් එන්න. ඊලග දේ තමා ඔයාල මේ යන්නෙ ලංකාවෙ හදවත වගේ සැලකෙන සිංහරාජ වනාන්තරයට. ඉතින් කිසිම වෙලාවක කොල කෑල්ලක්වත් විසික්කන් නැතිව, කිසිම හානියක් කරන් නැතුව ලස්සන විතරක් විදල එන්න.

ඔයාල බස් එකේ යනවනම් ඒ ගැන විස්තර දැන ගන්න සහ වෙන විස්තරයක් දැනගන්න ඕන නම් අපි අපිත් එක්ක ගිය ගයිඩ් අයියගේ නම්බර් එක දාන්නම් ( 0774615019 ). ඔයාලට ඕන විස්තරයක් ගන්න පුලුවන්. සිංහරාජ වනාන්තරය ඇතුලට වෙන්නත් තව දිය ඇලි තියෙනව. ඉතින් ඒ වගේ ලොකු ගමනක් යනවනම් නතර වෙන්නත් ඒ අවට තැන් තියෙනව. තව දෙයක් තමා ලගපාත තේ කඩනම් අඩුයි. සතියේ දවස් වලටනම් නැතිම හැඩයි. ඒ නිසා කන්න මොනව හරි අරන් යනවනම් ගොඩාක් පහසුවක් වෙයි. ඉතින් අපි අපේ ගයිඩ අයියටත් ස්තූති කරල ආපහු එන්න ආව.

ආපහු එන්න ආවෙ ගෙදර නෙවේ හොදේ 😁 අපි මුලින් යනකොට නතර නොවී ගිය ලස්සන තැනට තමා ආයෙ ආවෙ. ඒ තමා නෙළුව දූවිලි ඇල්ල. ඉතින් මේ ඇල්ලෙත් කොටස් තුනක් තියෙනව. ඒ වගේම තමා මේ දිය ඇල්ල බලන්න යන්න අත් වැටක් එක්ක පඩිපෙලක් තියෙනව. මෙතන තියෙන විශේශම දේ තමා දිය ඇල්ලෙ වතුර එකතු කරල හදල තියෙන නාන තටාක දෙක. මේ තටාක දෙකම යටට කොන්ක්‍රීට් දාල මඩ නැති විදිහට තමා හදල තියෙන්නෙ. ජබුරත් හොදට තියෙන නිසා පීන පීන නාන්න පුලුවන්. හැබැයි දෙවෙනි පූල් එකේ තැනක ගලක් තියෙනව ඒක ගැන අවදානෙන් පීනන්න.

අපි ගමන් ගිහින් ආපහු ගෙදර එද්දි ටිකක් හවස් උනා. ආපු ගමන් අපිත් ලහිරු මල්ලිලාගෙ අම්ම තේ හදල දුන්න. ඊට පස්සෙ අපි ඒකත් බීල අහල පහල පොඩි රව්මක් දාන්න ගියා 😁.

පහුවදා උදේ පාන්දර බස් එකේ තමා එන්න තිබුනෙ අපිට, ලොකු වැස්සක් වැස්ස උදේ පාන්දරම. යන්න බෑ වගේත් හිතුන 🥲. ඒත් ගෙදර එන්නත් එපැයිනෙ කියල සීතලේම ලෑස්ති වෙලා අපි බස් එකට ආව. ලහිරු මල්ලී විදුශාන් මල්ලියි ආව අපිව බස් එකට ඇරලලා යන්නත්.

ඇත්තටම සුන්දර ගමනක්. වෙනස්ම පරිසරයක්, වෙනස්ම කාල ගුනයක්, වෙනස්ම කෑම වර්ග. ඇත්තටම සුන්දරයි. අපිට මේ ගමන සුන්දර කර ගන්න උදව් කරපු ලහිරු මල්ලිටයි විදුශාන් මල්ලිටයි ගොඩාක් ස්තූතියි. ඒ වගේම තමා දවස් තුනක් අපිට සියලු ආගන්තුක සත්කාර කරපු ලහිරු මල්ලිගේ අම්මටත්, තාත්තටත්, ආච්චිටත්, ලහිරු මල්ලිගේ අයියලා අක්කලටත් ගොඩක් ස්තූතියි වගේම ගොඩක් ආදරෙන් මතක් කරනව ❤️.

එහෙනම් තවත් අලුත් ගමනාන්තයකින් ආයෙත් හම්බ වෙමු. ආදරෙයි ඔයාල හැමෝටම. සතුටින් ඉන්න ❤❤ Location Two.