Ўзбекистон: Гулнора Каримованинг Президент Мирзиёевга пул таклиф қилишдан бошқа чораси қолмадими?

Кузатувчилар Гулнора Каримованинг Президент Шавкат Мирзиёевга очиқ мурожаат қилиб, озодлик эвазига 686 миллион доллар таклиф қилганини чорасизлик, дея баҳоламоқда. Бунгача Гулноранинг Каримованинг ўғли Ислом Каримов Би-би-сига берган интервюсида қўлларида Ўзбекистон ҳукуматида ишлаётган юқори лавозимли мансабдорларни фош қилувчи материаллар борлигини айтганди.

Гулнора Каримованинг қизи Имон Каримова Instagram саҳифасида онасининг Президент Шавкат Мирзиёевга ёзган очиқ мурожаатини жойлади.
Рус тилида ёзилган ушбу мактубда у ўз оиласи ва соғлиғини сақлаб қолиш мақсадида муносиб шартлар эвазига ҳукумат билан муросага бориши мумкинлигини маълум қилган.
"Муносиб шартлар асосида оиламизнинг Швецияда музлатилган сўнгги пулларига бўлган ҳар қандай даъводан воз кечишга тайёрман" - деган у.