يالذلول الي على هرش عماني… جدي المسرى ترى الطرقة طويلة /عبدالمحسن القباني/اداء سلطان العسكر/ سامري

سامرية
للتحميل بصيغة MP3
https://h.top4top.io/m_2411kpm670.mp3

القصيدة كاملة كتابة

يـ الذلول الي على هرشٍ عماني
جدي المسرى ترى الطرقه طويله
لج قلبي لجة غروب وسواني
لحنها لا درهمت قامت تشيله
لا ذكرت الي على كبدي كواني
اونس بجوفي مثل صالي مليله
من عقب ذاك الغلا صد ونساني
ودي بشوفه ولا بيدي حيله
ودي اسلا لكن القلب يعصاني
من تعلق في رجاها عزتي له

مـ اطعم العيشه ولا الزاد يهناني
والهموم الي على صدري ثقيله
يبست عروق الحشا ولا سقاني
النصوب كبار وثعوله جفيله
ركبت وارعد رعدها فـ المحاني
وابهلت عيني مثل وبل المخيله
كنها الجوزا وانا سهيل اليماني
كننا للقيظ والوسمي دليله
خابرٍ طبعه ولا هوب يخفاني
لاحداه القيظ يشرب من صميله


عودت عشره ادون من الثماني
لا حتكر سيله تحدر مع مسيله
حالفٍ مـ اطرد ورى حي جفاني
لو حياتي كلها يومٍ وليله
والله الي عظم السبع المثاني
ما تعيش النفس وعيوني ذليله
إن بغا وصلي فـ انا هذا مكاني
ماهقيت اني ابنساها واجي له
ان تذكر وقتنا الاول … لقاني
وان تردى لا يحسب اني قبيله

ادري اني ميتٍ والعمر فاني
وادري انه ماهتنى خل وخليله
وادري ان الموت لا منه خذاني
لحفو قبري مثل غيره نثيله
السعادة عمرها مثل الثواني
والليالي طبعها دايم بخيله
والزمان الي تعذر من زماني
لا يحملني عقب ماقفى جميله
الجميل الي على الذل يحداني
جعل ربي لا تمنيته يزيله

عبدالمحسن بن محمد السبيعي
2022 م