កំណាត់ផ្លូវជាតិលេខ៧ តភ្ជាប់ក្រចេះ-ស្ទឹងត្រែង ប្រែក្លាយតំបន់ស្ងប់ស្ងាត់ ក្លាយជាអ៊ូអរទាំងការរស់នៅ...

កំណាត់ផ្លូវជាតិលេខ៧ តភ្ជាប់ក្រចេះ-ស្ទឹងត្រែង ប្រែក្លាយតំបន់ស្ងប់ស្ងាត់ ក្លាយជាអ៊ូអរទាំងការរស់នៅ និងធ្វើកសិកម្ម

(ក្រចេះ)៖ កំណាត់ផ្លូវជាតិលេខ៧ ដែលសាងសង់ថ្មីប្រវែងជិត ១០០គីឡូម៉ែត្រ តភ្ជាប់ក្រុងក្រចេះ ទៅដល់ឃុំអូរគ្រៀង ស្រុកសំបូរ ខេត្តក្រចេះ បានក្លាយសរសៃឈាមសេដ្ឋកិច្ចថ្មី ហើយក៏បានប្រែក្លាយតំបន់ដែលស្ងប់ស្ងាត់ឱ្យក្លាយជាអ៊ូអរ ប្រមូលផ្តុំដោយការរស់នៅ និងការធ្វើរបរកសិកម្មផងដែរ។

កំណាត់ផ្លូវជាតិលេខ៧ ប្រវែងជាង ៩៣គីឡូម៉ែត្រ ពីរង្វង់មូលខ្លាស្ទុះ ស្ថិតក្នុងភូមិកាប៉ូ សង្កាត់អូរឫស្សី ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ ត្រូវបានសាងសង់ជាប្រភេទផ្លូវក្រាលកៅស៊ូពីរស្រទាប់ (DBST) កាលពីអំឡុងឆ្នាំ២០០៤ ដល់ ២០០៧។ នេះគឺជាកំណាត់ផ្លូវមួយ ដែលសាងសង់ឡើងថ្មីសន្លាងតែម្តងនៅលើទឹកដីខេត្តក្រចេះ។

កំណាត់ផ្លូវនេះត្រូវបានសាងសង់លើកកម្រិតគុណភាពឡើងវិញ ដោយក្រាលបេតុងកៅស៊ូ (AC) ដោយផ្អែកលើការសិក្សាជាថ្មី ទាក់ទងនឹងការកើនឡើងនៃចំនួនចរាចរណ៍ រួមផ្សំជាមួយនឹងកំណើនសេដ្ឋកិច្ចជាតិ សកម្មភាពពាណិជ្ជកម្ម វិនិយោគ និងទេសចរណ៍ជាដើម។ ការលើកកម្ពស់គុណភាពផ្លូវនេះ ធ្វើឡើងក្រោមជំនួយឥតសំណងពីរដ្ឋាភិបាលចិន ជូនដល់រាជរដ្ឋាភិបាលកម្ពុជា ដែលបានចាប់ផ្តើមការដ្ឋានសាងសង់កាលពីអំឡុងខែវិច្ឆិកា ឆ្នាំ២០១៦ និងបញ្ចប់ការសាងសង់នៅអំឡុងខែធ្នូ ឆ្នាំ២០១៨ ដោយប្រើប្រាស់រយៈពេលសាងសង់ចំនួន ២៤ខែ ចំណាយថវិកាអស់ ៣៣.៣៧លានដុល្លារអាមេរិក។

មុនពេលមានការសាងសង់ផ្លូវមួយកំណាត់នេះ ការតាំងទីលំនៅរបស់ប្រជាពលរដ្ឋ ក៏ដូចជាការបង្កបង្កើនផលផ្សេងៗមិនសូវមាននោះឡើយ។ ប្រជាពលរដ្ឋរស់នៅអមសងខាងផ្លូវ បានអះអាងថា ក្នុងអំឡុងទសវត្សរ៍ឆ្នាំ៩០ តំបន់នេះមានស្ងាត់ជ្រងុំ ព្រោះតែមិនមានផ្លូវធ្វើដំណើរ។

លោក ហុក គាន់ អាយុ ៤៧ឆ្នាំ រស់នៅភូមិកសាង ឃុំចង្ក្រង់ ស្រុកចិត្របុរី ខេត្តក្រចេះ បានឱ្យដឹងយ៉ាងដូច្នេះ «ផ្លូវតំបន់នេះពីមុនអត់មានទេ មានតែផ្លូវរទេះគោ ជិះកង់ និងម៉ូតូមិនចង់កើតផង។ ផ្លូវតំបន់នៃស្ងាត់ណាស់ គឺសុទ្ធតែព្រៃតែម្តង»។

លោក ហូ សុគន្ធ អាយុ ៥៨ឆ្នាំ ជាអ្នកប្រកបរបរដាំដំឡូងមី នៅក្នុងឃុំចង្ក្រង់ដែរនោះ បានអះអាងថា «មកនៅដំបូងស្ថានភាពផ្លូវ និងជីវភាពរបស់ប្រជាពលរដ្ឋលំបាកណាស់។ អត់ផ្លូវ សុទ្ធតែព្រៃ មនុស្សក៏តិច»។

ប៉ុន្តែក្រោយពេលរាជរដ្ឋាភិបាល បានសាងសង់កំណាត់ផ្លូវជាតិលេខ៧នេះឡើង ស្ថានភាពតំបន់នេះមិនមែនជាតំបន់ព្រៃដែលស្ងាត់ជ្រងំដូចអតីតកាលទៀតនោះឡើយ។ បច្ចុប្បន្នវត្តមាននៃកំណាត់ផ្លូវនេះ បានធ្វើឱ្យប្រជាពលរដ្ឋមកតាំងទីលំនៅអមសងខាងផ្លូវកាន់តែច្រើន ហើយធ្វើឱ្យការមកប្រកបរបរកសិកម្មនៅអមសងខាងផ្លូវមានកាន់តែច្រើនផងដែរ។

វត្តមានផ្លូវនេះ មិនត្រឹមតែទាក់ទាញការមកតាំងទីលំនៅរបស់ប្រជាពលរដ្ឋប៉ុណ្ណោះទេ តែក៏បានរួមចំណែកយ៉ាងសំខាន់ដល់ការលើកកម្ពស់ជីវភាពរបស់ប្រជាពលរដ្ឋឱ្យកាន់តែប្រសើរផងដែរ។

លោក វ៉ា ថន អភិបាលខេត្តក្រចេះ បានប្រាប់ Fresh News យ៉ាងដូច្នេះ «ចំពោះកំណាត់ផ្លូវនេះ គឺផ្តល់អត្ថប្រយោជន៍ច្រើនដល់ប្រជាពលរដ្ឋ។ នៅខេត្តក្រចេះនេះប្រជាពលរដ្ឋភាគច្រើនធ្វើរបរកសិកម្ម ជាពិសេសកសិ-ឧស្សាហកម្មដាំដំណាំដែលអាចយកទៅផលិតនៅរោងចក្របានដូចជាដំឡូងមី ស្វាយចន្ទី កៅស៊ូ ស្វាយកែវរមៀត។ អ៊ីចឹងបានផ្តល់ភាពងាយស្រួលដល់ការដឹកជញ្ជូនផលិតផល កសិផលរបស់កសិកររបស់យើង»។

លោក ហុក គាន់ បានគូសបញ្ជាក់យ៉ាងដូច្នេះ «ពេលមានផ្លូវអ៊ីចឹងល្អ ដោយសារយើងលក់ដូរអ៊ីចឹងទៅពេលមានឡានធំ ឡានតូចចូលមកដឹកទំនិញធ្ងន់ៗយើងលក់បានដោះស្រាយជីវភាពគួរសម។ ពេលធ្វើដំណើរទៅណាទៅណីវាបានរហ័សដែរ។ កាលធ្វើដំបូងៗអត់ទាន់មានមនុស្សទេ តែក្រោយមកមនុស្សមកពីតំបន់នានាឃើញស្រឡាញ់ ក៏ទិញនៅ ហើយកុះករច្រើន»។

លោក ហូ សុគន្ធ បានអះអាងថា «ដល់ពេលមានផ្លូវស្រួលបែបនេះហើយ អំណោយផលស្រួលណាស់សម្រាប់ខ្ញុំអ្នកធ្វើចំការ។ សម្រាប់ការធ្វើដំណើរដឹកជញ្ជូនរបស់របរកសិកម្ម ហើយឈ្មួញគេចូលទិញ ក៏ហ៊ានថ្លៃព្រោះផ្លូវវាស្រួល»។

ទាំងលោកអភិបាលខេត្តក្រចេះ និងប្រជាពលរដ្ឋរស់នៅអមសងខាងកំណាត់ផ្លូវមួយខ្សែនេះ សុទ្ធតែបានបង្ហាញនូវអារម្មណ៍រីករាយចំពោះចំណងដៃដ៏ថ្លៃថ្លារបស់រាជរដ្ឋាភិបាលនូវផ្លូវមួយខ្សែនេះ ហើយបានគោរពថ្លែងអំណរគុណយ៉ាងជ្រាលជ្រៅជូនចំពោះសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលតែងតែគិតគូររាល់ការលំបាករបស់ប្រជាពលរដ្ឋ ហើយបានសាងសង់កំណាត់ផ្លូវនេះឡើង។

លោកអភិបាលខេត្ត និងប្រជាពលរដ្ឋរស់នៅអមសងខាងផ្លូវ សុទ្ធតែបានផ្តល់តម្លៃខ្ពស់ចំពោះការដឹកនាំរបស់សម្តេចតេជោ ដែលនាំមកនូវសុខសន្តិភាព ការបង្រួបបង្រួមជាតិ និងការអភិវឌ្ឍជាតិ ដែលជារឿងដ៏កម្រនៅក្នុងប្រវត្តិនៃការដឹកនាំរបស់កម្ពុជា។

សូមបញ្ជាក់ថា កំណាត់ផ្លូវជាតិលេខ៧ ពីរង្វង់មូលខ្លាស្ទុះ ស្ថិតក្នុងភូមិកាប៉ូ សង្កាត់អូរឫស្សី ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ ដែលត្រូវបានលើកកម្ពស់គុណភាពនេះ នឹងត្រូវសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពរបស់សម្តេចតេជោ ហ៊ុន សែន នៅថ្ងៃទី០៧ ខែកុម្ភៈ ឆ្នាំ២០២២៕

* Please JOIN Channel Telegram ផ្លូវការរបស់បណ្តាញព័ត៌មាន Fresh News. ដើម្បីទទួលបានព័ត៌មានថ្មីៗប្រចាំថ្ងៃ ២៤ម៉ោង !
Join US: https://t.me/freshnewsasia