Love, Interrupted

Iss ladki ki khamoshi mein bhi kitna shor hai.

Presenting young poet Jyoti Mamgain telling us of love, of leaving, of life, loss and longing

Like our page and support the real artists of #India

Love, Interrupted

Baat kuch aisi hui uss raat ki baat kuch ho na saki!
Wo baithe rahe mera haath thaame, mere haathon ki lakeerein apne haathon se milaane!
Kaise rokta unhe wo masoom the bohot, ro dete!
Toh main bhi unki khushfehmi par khush hota raha!
Dil hi dil mein rota raha!

Main jaanta hun!
Main jaanta hun unhe, besabr hain wo
Unse intezaar nahi hota!
Thodi der ho jaaye aane mein toh wo mere aate hi binaa kuch bole rooth kar chale jaate hain!
Roothna bhi nahi aata unhe, kuch der baad meri baahon mein hi toot kar chale aate hain!

Main nahi keh paaya unhe uss raat ki ab wakt aa gaya hai tum roothna seekh lo!
Jinki lakeerein sang dekh rahi ho unn haathon ka apne haathon se chootna seekh lo!

Unke chehre par bikhre baal uss raat maine yun sawaare ki mere jaane ke baad kisi aur ko wo uss haal mein na mile jis haal mein maine dekha tha unhe pehli dafaa!

Ek nazar!
Ek nazar nazar kaafi thi unpe sab kuch haar jaane ko,
Bas uss ek nazar ne unhe har baar jitaya hai!

Unke poochne par maine keh toh diya saath chalne ka irada hai
Par kaise nibha pata uss mohabbat ko jismein ishq kam majboori zyada hai!

Kyonki nibhane ko toh phir kayi rishte rakhe hain,
Insaan mohabbat kyon kare!

Mere liye wo kaafi thi
Main zara sa kam padh gaya unke liye!

Jaanta hun laparwaah hain wo!
Bekhaayali mein hi sahi phir kisi ka dil le baithenge!
Phir kisiko ye saare haq de baithenge!
Par shayad main na kar paun ab ye sab kabhi kyunki mohabbat ke saare shauk, saare farz, saare dard ek baar mile toh hi jaayaz lagte hain!

Main jaanta hun!
Main jaanta hun unhe, unse intezaar nahi hota!
Bahut rokne par bhi gar main chala gaya toh dekhna wo laut jaenge!
Main wapas aa bhi jaun kabhi
toh dekhna wo nahi aaenge!

Baat kuch aisi hui uss raat ki baat kuch ho na saki!
Wo hijr ki raat ko vasl ki bataate rahe, lakeerein milaate rahe!
Kaise kehta kuch main toot chuka tha, ro deta!
toh main bhi unki khushfehmi par khush hota raha!
Dil hi dil mein rota raha!