Tearful Emotional Kalam 2024 ¦¦ Karam Ki Nazar Kar ¦¦ Abdullah Itban ¦¦ KEHKASHAAN

Tearful Emotional Kalam 2024 ¦¦ Karam Ki Nazar Kar ¦¦ Abdullah Itban ¦¦ KEHKASHAAN

Artist : Abdullah Itban Shareef
Poet : Moulana Samaan Khalifa
Production : Kehkashaan


الٰہی خطا سے مری درگزر کر
مرے بندہ پرور کرم کی نظر کر

مرا کون تیرے سوا ہے خدایا
مجھے بس تری رحمتوں کا سہارا
تجھے واسطہ تیری شانِ کرم کا

خدایا منور مری ہر ڈگر کر
مرے بندہ پرور کرم کی نظر کر

الٰہی یہ جینا بھی کیسا ہے جینا
بھنور میں پھنسا جا رہا ہے سفینہ
پھٹا جارہا ہے مرا غم سے سینہ

دوا میرے غم کی مرے چارہ گر کر
مرے بندہ پرور کرم کی نظر کر

سزا تجھ سے غفلت کی پائی ہے میں نے
گناہوں میں پونجی لُٹائی ہے میں نے
متاعِ محبت گنوائی ہے میں نے

مرے دل کی ظلمت کو نورِ سحر کر
مرے بندہ پرور کرم کی نظر کر

بھٹک کر ترے در سے جاؤں کہاں میں
غمِ جاں کا دُکھڑا سناؤں کہاں میں
کوئی تجھ سا محبوب پاؤں کہاں میں

وفائیں مری اے خدا معتبر کر
مرے بندہ پرور کرم کی نظر کر

محبت کی مجھ کو بہاریں عطا ہوں
وفا کی مجھے رہ گزاریں عطا ہوں
تری مغفرت کی پھواریں عطا ہوں

ضیائے محبت میں چمکوں نکھر کر
مرے بندہ پرور کرم کی نظر کر

غمِ عاشقی ہو عطا میرے مولیٰ
مجھے در پہ اپنے بلا میرے مولیٰ
مجھے اپنا بندہ بنا میرے مولیٰ

الٰہی نواؤں میں پیدا اثر کر
مرے بندہ پرور کرم کی نظر کر

میں رو کر تڑپ کر مناؤں گا تجھ کو
حدیثِ دل وجاں سناؤں گا تجھ کو
میں جانِ محبت بناؤں گا تجھ کو

عنایت کے لائق بنوں گا سنور کر
مرے بندہ پرور کرم کی نظر کر

فروغِ تجلی سے پرنور ہو دل
یہی ہے تمنائے سمعاںؔ کا حاصل
ترے اس بھٹکتے کو مل جائے منزل

نہاں خانۂ دل میں رقصاں شرر کر
مرے بندہ پرور کرم کی نظر کر