Скачать или смотреть Әскери полиция қызметшілері мектеп оқушыларына ашық есік күнін ұйымдастырды

Сарыөзек гарнизонындағы әскери полиция бөлімінің әскери қызметшілері Сарыөзек орта мектебінің 9 және 10-сынып оқушыларына арналған ашық есік күнін ұйымдастырды. Шараның негізгі мақсаты – жасөспірімдерді әскери қызметтің қыр-сырымен таныстыру, Отан қорғауға деген патриоттық сезімдерін арттыру және әскери мамандықтарға қызығушылықтарын ояту болды.
Іс-шара барысында оқушылар әскери полиция қызметшілерінің күнделікті қызмет орындарымен танысып, арнайы жасақтың қолданылатын қару-жарақ түрлері мен әскери техникаларын өз көздерімен көрді. Әскери қызметшілер қару-жарақтың тактикалық-техникалық сипаттамаларын түсіндіріп, олардың қолданылу тәртібі туралы кеңінен ақпарат берді.
Сонымен қатар оқушылардың білімдерін арттыру мақсатында әскери-патриоттық бағыттағы сұрақ-жауап сайыстары ұйымдастырылды. Байқау барысында белсенділік танытып, дұрыс жауап берген оқышыларға алғыс хаттар мен грамоталар табысталды.
Шараның ең қызықты бөлімдерінің бірі – АК74 автоматын белгіленген уақыт ішінде шашып-жинау жарысы болды. Бұл сайыста оқушылар өздерінің ептілігі мен жылдамдығын сынап, әскери дайындыққа деген қызығушылықтарын көрсетті. Жарыс нәтижесінде үздік нәтиже көрсеткен қатысушылар арнайы сыйлықтармен марапатталды.