Скачать или смотреть Urs || Wisaal e Sayeda Fatima P.B.U.H o Meer Iraqi But Shikan a.r

#تحفة_الاحباب_نوربخشی_روایت_کا_ترجمان
نجم الدین جلالی
مصنف :ترجمانِ نوربخشیہ،داعی نوربخشیہ حضرت ملا محمد علی کشمیری

تحفة الاحباب برصغیر کی صوفیانہ روایت میں ایک منفرد اور مستند مقام رکھنے والی تصنیف ہے، جس کے مصنف ملا محمد علی کشمیری نہ صرف ایک مؤرخ اور ادیب تھے بلکہ ایک راسخ العقیدہ، کٹر اور عملی نوربخشی بھی تھے۔ ان کی تحریر میں محض علمی بحث نہیں بلکہ ایک زندہ روایت کی دھڑکن سنائی دیتی ہے، کیونکہ وہ خود اس روحانی نظام کا حصہ تھے جسے وہ بیان کر رہے ہیں۔
ملا محمد علی کشمیری کی ابتدائی تربیت ہی سے ان کا تعلق نوربخشیہ سلسلہ سے جڑ گیا تھا۔ بچپن میں ہی انہیں ان کے والد یا ماموں کے ذریعے میر محمد عراقی علیہ رحمہ کی خانقاہ میں لے جایا جاتا رہا، جہاں سے ان کی روحانی وابستگی کی بنیاد پڑی۔ بعد ازاں انہوں نے اسی سلسلے میں بیعت کی اور پوری زندگی اسی کے دفاع، اشاعت اور عملی پیروی میں گزار دی۔ ان کی طبیعت میں اس قدر شدتِ وابستگی تھی کہ نوربخشی تعلیمات پر کسی بھی تنقید کے جواب میں وہ جلالی انداز اختیار کرتے اور اس سلسلے کے پرجوش مدافع کے طور پر سامنے آتے۔
میر محمد عراقی علیہ رحمہ، جن کا وصال 932 ہجری میں ہوا نے کشمیر میں زڈی بل کے مقام پر ایک خانقاہ کی بنیاد رکھی، جو جلد ہی عرفان و سلوک کا ایک عظیم مرکز بن گئی۔ اس خانقاہ میں چلہ کشی، اعتکاف، ذکر و فکر اور دیگر روحانی ریاضات کا باقاعدہ نظام قائم تھا۔ ملا محمد علی کشمیری نے نہ صرف اس ماحول کو قریب سے دیکھا بلکہ اس میں عملی طور پر حصہ لیا، جس کی وجہ سے ان کی تصنیف میں بیان کردہ حالات محض روایات نہیں بلکہ عینی مشاہدات کی حیثیت رکھتے ہیں۔
میر عراقی کے وصال کے بعد یہ روحانی سلسلہ شیخ دانیال علیہ رحمہ اور بابا علی نجار علیہ رحمہ جیسے اکابرین کی زیر نگرانی جاری رہا۔ ملا محمد علی کشمیری نے انہی بزرگوں کی صحبت میں سلوک و ریاضت کے مراحل طے کئے اور بعد ازاں خود بھی سالکین اور چلہ کشوں کی رہنمائی کرنے لگے۔ ان کا زمانہ دسویں صدی ہجری پر محیط ہے، اور ان کی تحریر اس عہد کی روحانی و سماجی زندگی کا ایک معتبر عکس پیش کرتی ہے۔
انہوں نے اپنے دور کے سیاسی حالات کو بھی نہایت قریب سے دیکھا، خصوصاً مرزا حیدر دوغلت کے دورِ حکومت کو، جس میں صوفیاء اور اہلِ دین کو سخت مظالم کا سامنا کرنا پڑا۔ ان مظالم کا نشانہ بالخصوص شیخ دانیال اور دیگر بزرگانِ دین بنے۔ ملا محمد علی کشمیری ان واقعات کے چشم دید گواہ تھے، اسی لیے وہ شیخ دانیال کو عقیدت کے ساتھ “شیخ شہید” کے لقب سے یاد کرتے ہیں۔
روحانی اعتبار سے وہ ایک صاحبِ حال عارف تھے اور ان کی وابستگی صرف نوربخشی سلسلے تک محدود نہ تھی بلکہ وہ سلسلہ عالیہ ہمدانیہ کے بھی داعی، حامی اور ترجمان تھے۔ ان کے نزدیک نوربخشی سلسلہ دراصل سلسلہ عالیہ ہمدانیہ ہی کا تسلسل اور منبع تھا، اور وہ اس فکری و روحانی ربط کو نہایت اہمیت دیتے تھے۔
مزید برآں، وہ شاہ سید محمد نوربخش علیہ رحمہ کے بلند روحانی مقام کے قائل تھے۔ انہوں نے انہیں درجۂ اجتہاد پر فائز مانا اور امامِ زمان، شاہِ زمان، قطبِ دوران، قطب الاوتاد اور غوث الافراد جیسے القابات سے یاد کیا۔ یہ القابات اس بات کی غمازی کرتے ہیں کہ ان کے نزدیک شاہ سید محمد نوربخش قہستانی علیہ رحمہ ایک ہمہ گیر روحانی پیشوا اور اپنے عہد کے مرکزِ ہدایت تھے۔
تحفة الاحباب کی سب سے بڑی خصوصیت یہی ہے کہ یہ محض ایک نظری یا تاریخی کتاب نہیں بلکہ ایک عینی شاہد کی گواہی، ایک مخلص پیروکار کی ترجمانی، اور ایک عارف کی داخلی کیفیات کا اظہار بھی ہے۔ اس میں نوربخشی تعلیمات کو اس جامعیت کے ساتھ پیش کیا گیا ہے کہ اسے اس سلسلے کا ایک انسائیکلوپیڈیا (Encyclopedia)قرار دیا جا سکتا ہے۔ ساتھ ہی میر محمد عراقی کی سوانح، ان کی تبلیغی خدمات اور روحانی کمالات کا بیان اس کتاب کو مزید وقعت عطا کرتا ہے۔
یوں یہ تصنیف نہ صرف نوربخشی پیروکاروں کے لیے ایک بنیادی ماخذ (Primary source)ہے بلکہ ان تمام اہلِ علم کے لیے بھی یکساں اہمیت رکھتی ہے جو اس سلسلے کی تاریخ، تعلیمات اور روحانی نظام کو گہرائی سے سمجھنا چاہتے ہیں۔ یہ کتاب ایک زندہ روایت کی ایسی دستاویز ہے جس میں عقیدت، مشاہدہ اور علم تینوں ایک ساتھ جلوہ گر ہیں۔