ကြက်ဥခေါက်ဆွဲလုပ်နည်း How to make homemade egg noodles

ကြက်ဥခေါက်ဆွဲ လုပ်နည်း
လွန်ခဲ့တဲ့ ၁နှစ်ကျော် က ရိုက်ထားတဲ့အိမ်လုပ် ကြက်ဥခေါက်ဆွဲလုပ်နည်းလေးပါ။ ဗီဒီယိုလေးက အနည်းငယ်ရှည်ပေမယ့် အကြိမ်ကြိမ်စမ်းပြီးမှ လိုချင်တဲ့အနေအထားကို ရလာတာကြောင့် ကျွန်တော် သင်ယူခဲ့သမျှကို အားလုံးပြန်လည်မျှဝေပေးထားပါတယ်ခင်ဗျာ..ဆိုဒါမပါဘဲ ဂျုံ။ကြက်ဥနဲ့ဆားကိုသာအသုံးပြုထားပါတယ်ခင်ဗျာ။

အောက်ပါ ပါဝင်ပစ္စည်းအားလုံးကို ဇလုံတခုထဲထည့်ပါ။
ဘက်စုံသုံးဂျုံမှုန့် - ၂ ခွက်ခွဲ (သို့) နို့ဆီဗူး ၂ ဗူးကျော်ကျော်
ကြက်ဥ - ၂ လုံး
ဆား - အနည်းငယ်
ရေ - စားပွဲတင်ဇွန်း ၂ ဇွန်း (ရေက ၁ ဇွန်းပဲအရင်ထည့်ပါ။ လိုမှ ထပ်ထည့်ပေးပါ)
ဂျုံနယ်တဲ့အခါ ဂျုံသားက မပျော့မမာအနေအထားပဲရှိရပါမယ်။ ဂျုံကို တခါထဲ ချော သွားအောင် နယ်လို့မရပါဘူး။ ဒါကြောင့် နယ်ရင်းနဲ့ ဂျုံလုံးဖြစ်လာရင် ဂျုံကို အနားပေးရမှာဖြစ်ပါတယ်။ လက်ဖနောင့်နဲ့ နယ်တဲ့အခါ ဂျုံထဲမှာရှိတဲ့ Gluten (ဂလူတင်း) ပရိုတင်းတမျိုးကြောင့် ဂျုံလုံးက ချောအောင်နယ်ဖို့ ခက်ပါတယ်။ ဒါ‌ကြောင့် မာနေတဲ့ ဂျုံကြောတွေပျော့ဖို့ရယ် ဂျုံမှုန့်တွေ အားလုံး ရေဓာတ်စုပ်ယူဖို့ရင် နယ်ထားတဲ့ ဂျုံလုံးကို အဖုံးတခုခု သို့ ရေစွတ်ထားတဲ့ အဝတ်စနဲ့ အုပ်ပေးထားပါ။
နာရီဝက်လောက် ရပြီဆိုရင် နောက်ထပ် ၃ မိနစ်လောက်နယ်ပေးရင် ဂျုံက ချောသွားပါလိမ့်မယ်။ (ဂျုံချောကြောင်းက လက်မှာရယ်။ ဇလုံမှာရယ် ‌ဂျုံတွေမရှိတော့ရင် ဂျုံချောသွားပြီဖြစ်ပါတယ်)
ပြီးရင် လှိမ့်လို့မရသေးပါဘူး. နောက်ထပ် အဖုံးအုပ်ပြီး ၁ နာရီလောက် ထပ်ပြီး အနားပေးထားပါ။ ဒါဆိုရင် ဂျုံတွေက ရေဓာတ်အပြည့်အဝ စုပ်ပြီး နူးညံ့သွားပါပြီ။ ဒါဆိုရင်တော့ ခေါက်ဆွဲလုပ်ဖို့ ဂျုံကို လှိမ့်လို့ရပါပြီ။ လှိမ့်တဲ့အခါ မကပ်သွားစေဖို့ ပြောင်းကော်မှုန့်အနည်းငယ်သုံးပေးပါ။ ပါးနိုင်သမျှပါးအောင် လှိမ့်မှသာ ရေနဲ့ပြုတ်တဲ့အခါ ထူလာမှာဖြစ်တဲ့အတွက် ကွက်တိဖြစ်မှာဖြစ်ပါတယ်။
ဗီဒီယိုထဲမှာ မရှင်းလင်းတာရှိရင်လည်း စာချန်ပြီးမေးထားလို့ရပါတယ်ခင်ဗျာ...