Bude baun

De Mutter froit n Voater: Was issn mittn Steffem los?
Dar is seit Tagn schunn so komisch, Mensch woas hoat den dar ock blos.
Mitn Gedankn isser ganz wu anders und redn dut e kaum a Wurt,
und woas ch dr o no soin wullte , mei gudes Kichnmassr is furt.


Derweile schleicht dr Thomas a Foatersch Werkzeukschuppen rei
und nimmtch vum Hackekletzl s Hackekletzlbeil.
Hinderhar no rei an Hienerstoall und a boar Eier mitgenumm
nu fix uffs Road und Richtung Busch ebs de Mutter merkt, dr Steffen wartet schunn.

S wulln ok
Bude baun, Bude baun, Bude baun, Bude baun, Bude baun, Bude wulln se baun,
Se wulln ok
Bude baun, Bude baun, Bude baun, Bude baun, Kinder missen Bude baun,

Seit letztr Wuche hoan se anne Saige, dr Voater hut se schunne gesucht,
und wie ar merkte, doasn o sei Hammer fahlt, Mensch woas hoat dar geflucht.
Und Muttersch Wachstuchdecke, die hällt nu n Raign oab
die woar ju o schun löcherch und ausgeblecht, s wurd Zeit, dass moal woas Neues gob

Seit zwee Wuchng tun se nu schun werkln und s sitt schunn richtssch vurnamchte aus
Vier Wände mit an Dache, Diere und Fanster hinne, abm wie a richtsches Haus.
Ok fur de Hausuffgoaben huttn se ne vill Zeit und o dr Voater misst sich salber kimmern,
se musstn ju jeden Tag, no dr Schule rei an Busch und a ihrer Bude weiter Zimmern.


Thomas soit zim Steffm murrne loadn mr moal de Hanna und de Lisa ei
und ver a Kussl oder zwee dirfn se o a moal a unse Bude rei
Do breng ch anne Floasche Äppelsoaft mit und ich de Restl vum Schweine Broatn
aber vurnneweg missn se feierlich schwörn, doass se kenn woas vu dar Bude verroatn.


Dr Steffm soit, doas is ju grußes Glick, doas ich Muttersch Kichnmasser hoab
do schneidch n Madln uffn Felde a schienes Blumnsträusl oab.
Dornonde bleibm mr oalle glei fer immer hier und de Madl kenn oalls hinne eirichtn
denn uf de schule und de Lahrer und de Hausufgoabm koannch gut und gerne verzichtn