နေ့စဥ်ဝတ်ပြုခြင်းအလင်းပြ“ဒုက္ခဝေဒနာများကြားက လွတ်မြောက်ဖို့ ဆုတောင်းချက်” – အပိုင်း(၄)

နေ့စဥ်ဝတ်ပြုခြင်းအလင်းပြ

“အိုထာဝရဘုရား၊ အကျွန်ုပ်၌အမှုရောက်ပါပြီ”
“O LORD, for I am in trouble.”

အဓိကအချက် - “ဒုက္ခဝေဒနာများကြားက လွတ်မြောက်ဖို့ ဆုတောင်းချက်” –
“A Prayer for Relief in the Midst of Trouble.”အပိုင်း(၄)

ဖတ်ရန်ကျမ်းချက် - ဆာလံကျမ်း ၃၁း၉-၁၃

“သင်တို့တွင် အဘယ်သူသည် ထာဝရဘုရားကို ကြောက်ရွံ့သနည်း။ ထိုသူသည် ကိုယ်တော်ကျွန်၏စကားသံကို နားထောင်ပါစေ။ အဘယ်သူသည် အလင်းမရှိဘဲ မှောင်မိုက်၌ သွားလာသနည်း။ ထိုသူသည် ထာဝရဘုရား၏နာမတော်ကို ခိုလှုံ၍၊ မိမိဘုရားသခင်ကို အမှီပြုပါစေ။-” (ဟေရှာယ၊ ၅၀း၁၀)

ဆာလံဆရာသည် ဘုရားသခင်ကို ကယ်မဖို့ဆုတောင်းနေရာကနေ သူ့ရဲ့အခက်အခဲတွေကို ဆက်ပြီးတော့ အသေးစိတ်တင်ပြပါတယ်။ ဘုရားသခင်ရဲ့သနားခြင်းကို သူတောင်းလျှောက်တယ်။ သူ့ရဲ့ပူပန်ခြင်းကြောင့် မျက်စီမကောင်းတော့ဘူး၊ စိတ်မကောင်းတော့ဘူး၊ ဝမ်းမကောင်းတော့ဘူး၊ အရိုးတွေလည်းဆွေးမြေ့ကုန်ပြီ၊ အပြစ်ရှိတယ်လို့ ခံယူရတဲ့ခံစားချက်ကလည်း သူ့ရဲ့အရိုးတွေကို ဆွေးမြေ့စေတယ်၊ ညည်းတွားနေရတဲ့ အနေအထားမှာရှိတယ်၊ နောက်ပြီးတော့ မိတ်ဆွေတွေလည်း သူ့ကို အကောင်းမမြင်တော့ဘူး၊ ရန်သူတွေလည်း ဝိုင်းထားတဲ့အနေအထားရှိတယ်။

လူတွေလည်းသူ့ကိုမေ့နေကြပြီ၊ သတိရတဲ့သူတွေကလည်း သူ့ကို တွေ့တာနဲ့အပြစ်တင်ဖို့ ရှိနေတဲ့အနေအထား ရှိနေတယ်၊ ပတ်ဝန်းကျင်ကလည်းကြောက်မက်ဖွယ် အနေအထားကိုရောက်နေပြီ၊ ကိုယ်တော်သနားပါလို့ တောင်းလျှောက်တဲ့အချိန်ဖြစ်ပါတယ်၊ ကျွန်တော်တို့ရဲ့ နာကြင်မှုတွေ၊ အပူအပန်တွေ၊ အခက်အခဲတွေ၊ အကျပ်အတည်းတွေရှိတဲ့ အချိန်ဟာ ဘုရားသခင်ရဲ့ကယ်မခြင်းကို တောင်းလျှောက်ဖို့အကောင်းဆုံးအချိန်ဖြစ်တယ်။

ဘုရားသခင်ရဲ့ သနားခြင်းကရုဏာ ကို အခက်အခဲတွေကြားမှာ၊ ရန်သူဝိုင်းနေတဲ့အထဲမှာ၊ ပိတ်လှောင်နေတဲ့အချိန်မှာ ဆက်လက်ပြီးအသနားခံတောင်းလျှောက်ကြပါစို့။

ဆင်ခြင်ရန် - အမှောင်မိုက်ဆုံးအချိန်သည် အလင်းဖြစ်သော ဘုရားသခင်ကိုခေါ်ဖိတ်လက်ခံဖို့ အကောင်းဆုံးအချိန်ဖြစ်သည်။
ဆုတောင်းရန် - မေတ္တာတော်ရှင်ဘုရားသခင် ကျွန်ုပ်တို့ရဲ့ နာကျင်ကြေကွဲခြင်း၊ ကူရာကယ်ရာမဲ့ အခြေအနေများထဲမှ ကိုယ်တော်ကိုသာ အော်ဟစ် ဆုတောင်းပဌနာပြုပါ၏၊ ကယ်တင်နိုင်သော ဘုရားသခင်ကိုယုံကြည်ကိုးစားပါ၏၊ မစတော်မူပါ။ အာမင်