නිදහස් විධිමත් සෞඛ්‍ය සේවාවක් වෙනුවෙන් සමගි ජන බලවේගය පෙරමුණ ගන්නවා

නිදහස් විධිමත් සෞඛ්‍ය සේවාවක් වෙනුවෙන් සමගි ජන බලවේගය පෙරමුණ ගන්නවා - විපක්ෂ නායක සජිත් ප්‍රේමදාස මහතා.

සෞඛ්‍ය ක්ෂේත්‍රය ක්‍රියාත්මක වන්නේ සුබසාධන රාජ්‍ය තුළ නිදහස් සෞඛ්‍ය ප්‍රතිපත්තිය හරහා බවත් මෙය එක්සත් රාජධානියේ ද ක්‍රියාත්මක බවත් එය සුබසාධන රාජ්‍යයේ වැදගත් අංශයක් බවත් මෙය රෝග නිවාරණ හා ප්‍රතිකාර යන පැතිකඩවලින් ක්‍රියාත්මක බවත් අප රටේ පවතින රෝග ප්‍රතිකාර ක්ෂේත්‍ර දෙස බැලුවහොත් ප්‍රාථමික ද්විතියික තෘතීයික සත්කාර ඒකකය ඇති බවත් රෝග නිවාරණ ක්ෂේත්‍රයේ පවුල් සෞඛ්‍ය සේවා මහජන සෞඛ්‍ය සේවා ආදී ලෙස බෙදී ඇති බවත් මේ ක්ෂේත්‍ර 2ම ශක්තිමත් කරන ගමනේ සෑම තලයකම ප්‍රශස්ත සේවයක් ඉටු කරන බවත් විපක්ෂ නායකවරයා පැවසීය.

සෞඛ්‍ය කාර්ය මණ්ඩලයන්හි සියලුම තලයන්ගේ සේවයේ නිරත වී ඇති ජනතාවගේ අභිමානව ආත්ම තෘප්තිය සේවා පහසුකම් හා තෘප්තිමත් රාජ්‍ය සේවයකට යොමු කිරීමට ගත හැකි උපරිම පියවර ගන්නා බවත් සමස්ත රාජ්‍ය සේවාවේ සාමාන්‍ය වැටුප් 24%කින් සහ අවම වැටුප 57500ක් දක්වා ක්‍රියාත්මක කරන බවත් එමෙන්ම වෘත්තීයවේදීන් පවතින බදු සූත්‍රය නිසා තැලී පොඩිවී ඇති බවත් එම නිසා 6-36% දක්වා සූත්‍රය 1-24% දක්වා අඩු කරන බවත් විපක්ෂ නායකවරයා පැවසීය.

විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් සෞඛ්‍ය සේවයේ නියුතු වූවන් සමග වන ‘සෞඛ්‍ය ක්ෂේත්‍රයේ සමුළුව‘ බත්තරමුල්ල වෝටර්ඒජ් හි සාර්ථකව පැවැත්විණි. මෙහි දී අදහස් දක්වමින් විපක්ෂ නායක සජිත් ප්‍රේමදාස මහතා මේ බව කියා සිටියේය.

බංකොලොත් රටේ පහසුකම් ලබා දීම තුළ ක්‍රමිකව ඒවා ක්‍රියාත්මක කළ යුතු බවත් දීමනා ආදිය නිල නිවාස නේවාසික පහසුකම් සම්බන්ධයෙන් ගැටලු ඇති බවත් සමහර සේවාවට ලැබිය යුතු ස්ථිර භාවය නොලැබී ඇති බවත් සමස්ත සෞඛ්‍ය ක්ෂේත්‍රයේම බරපතල තත්ත්වයක් ඇති බවත් මේ ගැන පාර්ලිමේන්තුවේදී පවා ප්‍රශ්න කර ඇති බවත් සමගි ජන බලවේග රජයක් තුළ ඒවාට විසදුම් ලබා දෙන බවත් විපක්ෂ නායකවරයා අවධාරණය කළේය.

අප රටේ සෞඛ්‍ය ක්ෂේත්‍රය ගොඩනගන්න සුපුරුදු රාමුවකට කොටු වී රාජ්‍ය ක්‍රමවේද යොදා ගත නොහැකි බවත් කැපකරු ආධාරක ක්‍රමය, ආදී ක්‍රම යොදා ගත හැකි බවත් නව ක්‍රමවේද ගැන සිතිය යුතු බවත් මේ තුළින් වඩාත් ප්‍රශස්ත විශිෂ්ඨ කාර්යක්ෂම සේවාවක් බවට පත් කරන බවත් විපක්ෂ නායකවරයා මෙහි දී පැවසීය.

එසේ ම ජාතික පෝෂණ ප්‍රතිපත්තියක් තුළින් ළමා හා මව්වරුන්ගේ මන්දපෝෂණ තත්ත්ව අඩු කිරිමට කටයුතු කරන බවත් ළමා මාතෘ පෝෂණය ඉහළ නංවන්න කටයුතු කරන බවත් ජාතික පෝෂණ ප්‍රතිපත්තියක් ක්‍රියාත්මක කරන බවත් ජන පරපුරේ සෞඛ්‍ය රටක නිෂ්පාදන ධාරිතාවට බලපාන බවත් ඒ සඳහා සෞඛ්‍ය සේවය ශක්තිමත් කළ යුතු බවත් විපක්ෂ නායක සජිත් ප්‍රේමදාස මහතා පැවසීය.