Скачать или смотреть حضرت عثمان رضی اللہ عنہ نے عقبہ بن ابی معیط کو گورنر کیوں بنایا تھا ؟ [FaceOff EP-14/72]

عقبہ بن ابی معیط، حضرت عثمان رضی اللہ عنہ کے سوتیلے بھائی تھے اور حضرت عثمان رضی اللہ عنہ نے انہیں گورنر لگایا تھا۔ صحیح مسلم کی ایک روایت سے انجینئر محمد علی مرزا نے یہ تاثر دینے کی کوشش کی ہے کہ حضرت عثمان رضی اللہ عنہ کے زمانے میں ہی خلافت سے ملوکیت کی طرف سفر کا آغاز ہو گیا تھا کیونکہ حضرت عثمان رضی اللہ عنہ نے اپنے رشتہ داروں کو نوازا اور انہیں عہدے دیے جبکہ وہ اس کے اہل نہیں تھے۔
صحیح مسلم کی روایت کا مضمون یہ ہے کہ عقبہ بن ابی معیط نے فجر کی دو رکعت نماز پڑھائی تو سلام پھیرنے کے بعد کہا کہ کیا مزید بھی پڑھا دوں؟ ایک صاحب نے کہا کہ اس نے شراب پی ہوئی ہے۔ دوسرے نے کہا کہ میں نے اسے قے کرتے دیکھا ہے۔ لیکن کسی نے یہ نہیں کہا کہ میں نے اسے شراب پیتے دیکھا ہے۔ اب حضرت عثمان رضی اللہ عنہ کے پاس معاملہ آیا تو انہوں نے حضرت علی رضی اللہ عنہ سے کہا کہ آپ اسے حد لگائیں۔ حضرت علی نے حضرت حسن رضی اللہ عنہما سے کہا تو انہوں نے حد لگانے سے انکار کر دیا۔ پھر حضرت علی نے عبد اللہ بن جعفر رضی اللہ عنہما سے کہا اور انہوں نے اسے چالیس کوڑے حد لگائی۔
اس روایت سے ایک طرف تو حضرت عثمان رضی اللہ عنہ کا عدل ثابت ہو رہا ہے کہ اپنے بھائی کو جو کہ گورنر ہے، کوڑے لگوا رہے ہیں۔ اور کوڑے بھی ان سے لگوا رہے ہیں کہ جنہیں آپ ان کا فریق مخالف یا مخالف پارٹی بنا رہے ہیں۔ اس سے تو حضرت عثمان رضی اللہ عنہ کی شان بڑھتی ہے کہ اگر ان کے سوتیلے بھائی نے بھی غلطی کی ہے تو انہوں نے اسے بھی سزا جاری کی ہے۔
اعتراض اصل میں یہ ہے کہ حضرت عثمان رضی اللہ عنہ نے انہیں گورنر بنایا تو بنایا ہی کیوں ؟ تو یہ بات پہلے گزر چکی کہ بنو امیہ زمانہ جاہلیت ہی سے قریش میں سپہ سالاری کے ڈیپارٹمنٹ کو سنبھالے ہوئے تھے کیونکہ یہ ملٹری سائنس میں آگے تھے۔ حضرت عثمان رضی اللہ عنہ نے ان کی دنیاوی اہلیت کے پیش نظر ان کو یہ عہدہ دیا تھا۔ دوسرا یہ کہ انہیں عہدہ بھی پہلی مرتبہ حضرت عثمان رضی اللہ عنہ نے نہیں دیا بلکہ سب سے پہلے حضرت ابو بکر رضی اللہ عنہ نے انہیں زکوۃ کے ڈیپارٹمنٹ میں ذمہ داری دی تھی۔ اور حضرت ابو بکر ذمہ داری دینے میں بہت محتاط تھے۔ پھر حضرت عمر رضی اللہ عنہ نے انہیں دعوت کے ڈیپارٹمنٹ میں ذمہ داری دی۔ پھر حضرت عثمان رضی اللہ عنہ کے زمانے میں ان کو گورنری ملی ہے۔ تو ان میں کچھ اہلیت تھی کہ جس وجہ سے انہیں شیخین کے دور خلافت میں یہ عہدے دیے گئے تھے۔
علاوہ ازیں تاریخ طبری میں یہ ہے کہ ولید بن عقبہ پر حضرت عثمان رضی اللہ عنہ نے حد جاری کرواتے وقت کہا تھا ہے کہ تمہارے بقول اگر تمہارے مخالفین جھوٹ بول رہے ہیں تو وہ آگ میں جائیں گے لیکن چونکہ وہ گواہی دے رہے ہین لہذا میں حد جاری کروں گا۔ اور ان کی گواہی بھی کمزور تھی کیونکہ کسی نے یہ نہیں کہا تھا کہ میں نے شراب پیتے دیکھا ہے۔ صرف ایک آدمی کی گواہی تھی کہ میں نے ان کے قے کرنے کے بعد ان کی داڑھی سے قطرے ٹپکتے دیکھے ہیں۔