Скачать или смотреть کیا حوآب کے کتوں کے بھونکنے والی روایت صحیح ہے ؟ [FaceOff EP-12/72]

انجینئر محمد علی مرزا نے اپنے کتابچے کے دوسرے باب میں یہ روایت بیان کی ہے کہ جب حضرت عائشہ رضی اللہ عنہا قصاص عثمان رضی اللہ عنہ کے مطالبے کے لیے نکلی ہیں اور بنو عامر کے گھاٹ پر پہنچی ہیں تو وہاں کتے بھونکے ہیں۔ انجینئر محمد علی مرزا نے یہ روایت اس باب میں کیوں بیان کی ہے؟ اس روایت کا خلافت وملوکیت سے کیا تعلق یا لینا دینا ہے؟
یہ در اصل مسند احمد کی روایت ہے کہ جس کا مرکزی راوی قیس بن ابی حازم ہے۔ اور یحی بن سعید القطان نے اس روایت کو منکر کہا ہے۔ یحی بن سعید، علی بن مدینی کے استاذ ہیں اور علی بن مدینی، امام بخاری کے استاذ ہیں۔ یحی بن سعید، امام احمد بن حنبل اور یحی بن معین کے بھی استاذ ہیں، رحمہم اللہ۔ علی بن مدینی نے کہا کہ مجھ سے یحی بن سعید نے کہا کہ قیس بن ابی حازم منکر الحدیث ہے۔ پھر انہوں نے اس کی کچھ منکر احادیث کا تذکرہ کیا کہ جس میں حوآب کی روایت کا بھی ذکر کیا۔ تو یہ روایت منکر ہے۔
علی بن مدینی نے کہا ہے کہ قیس بن ابی حازم رحمہما اللہ جنگ جمل میں حاضر نہیں تھے۔ یہ بات درست ہے کہ قیس تابعی ہیں اور صحابہ سے انہوں نے سنا ہے۔ اب مسند احمد کی یہ روایت جنگ جمل کی ہے۔ اور جنگ جمل میں یہ راوی موجود نہیں ہے جبکہ وہ خود یہ کہہ رہا ہے کہ ایسا ایسا ہوا جیسا کہ وہ شاہد واقعہ (eye witness) ہو۔ پس اس روایت کی سند منقطع ہے لہذا روایت ثابت نہیں ہے۔ تو یہ روایت منکر ہونے کے ساتھ منقطع بھی ہے۔
اگرچہ بعض اہل علم جیسا کہ علامہ البانی رحمہ اللہ نے اس روایت کو صحیح کہا ہے کہ اس روایت کے راوی بخاری اور مسلم کے راوی ہیں۔ لیکن عرض یہ ہے کہ جس روایت کے راوی بخاری اور مسلم کے راوی ہوں تو اس کا صحیح ہونا ضروری نہیں ہے۔ ایسی روایت کے بارے زیادہ سے زیادہ یہ کہا جا سکتا ہے کہ صحیح حدیث کی پانچ میں سے تین شرائط پوری ہو جاتی گئی ہیں جبکہ شذوذ اور علت کی دو شرائط کی تحقیق باقی رہ جاتی ہے۔ مثال کے طور اس کو یوں سمجھ لیں کہ مستدرک حاکم کے راوی بھی بخاری اور مسلم کے راوی ہیں لیکن کوئی بھی اس کتاب کو بخاری اور مسلم جیسی کتاب یا درجہ نہیں دیتا۔ تو کسی روایت کے صحیح ہونے کے لیے اس کی سند میں محض بخاری اور مسلم کے راوی ہونا کافی نہیں ہے۔
پس حضرت عائشہ رضی اللہ عنہا جنگ جمل کے لیے گھر سے نکلی تھیں لیکن کتے بھونکنے والی روایت درست نہیں ہے۔ ویسے بھی کتے بھوکنے کا تعلق حق اور باطل سے نہیں ہے۔ میں اگر صبح کی نماز کے لیے گھر سے نکلتا ہوں تو گلی کے کتے مجھ پر بھونکتے ہیں تو کیا اس کا یہ مطلب ہے کہ میں غلط کام کی طرف جا رہا ہوں یا ناحق کام کے لیے گھر سے نکلا ہوں؟ کہنے کا مقصد یہ ہے کہ آپ کسی کام پر نکلے ہیں تو کتوں کے آپ پر بھونکنے کا تعلق اس کام کے حق اور ناحق ہونے سے نہیں ہے۔ یہ محض توہم پرستی ہے۔ اسی لیے یحی بن سعید نے اس روایت کو منکر کہا ہے۔
دوسری طرف حضرت علی رضی اللہ عنہ کہتے ہیں کہ مجھے یہ قوی امید ہے کہ میں، حضرت عثمان، طلحہ اور زبیر رضی اللہ عنہم وغیرہ کے بارے ہی قرآن مجید کی یہ آیت نازل ہوئی ہے کہ اہل جنت کو جب ہم جنت میں داخل کریں گے تو ان کے دلوں میں جو ایک دوسرے کے بارے کچھ میل موجود ہو گا، تو اسے نکال باہر کریں گے۔