แลลอดสอดส่อง 【 วิทยาลัยนาฏศิลปกาฬสินธุ์ 】

แลลอดสอดส่อง【 วิทยาลัยนาฏศิลปกาฬสินธุ์ 】
ขับร้อง : ฟราย รังศิยา , ธีรวัฒน์ เจียงคำ , บีม อรรคฮาตสี
คำร้อง : ธีรวัฒน์ เจียงคำ
เรียงเรียงดนตรี : คีตะอีสาน
------------------------------------------------------------------------------------------------
(ผญา)
อั่นว่า คนในหล้า ลักขญาทวยอ่าน
ท้าวคำสอนจารไว้ ไขแจ้งแห่งคดี ท่านเอ่ย
มิ่งมวลมีพร่ำพร้อม สุมังคัลอันประเสิฐ นั่นแหล่ว
จั่งสมว่ายิ่งแล้ว อิตถีแก้วรัตนา
จั่งว่าควรคูณหล้า แพงมิ่งเมียขวัญ เจ้าเอ่ย
บูฮานเปรยเป็นคดี แจ้งมีมาแจงไว้
เทือนี้ข้าจักได้ ปุนแต่งแปงตาง สาแหล่ว
เอาอ้างคองควมสม คุอันสรรเข้า
บ่หมายลื่นควมเค้า ในฮีตในคอง
คอยฮิ่นตรองในที ล้วนแนวดีเดิมแต้ม
จั่งบุปผาแซมซ้อน กกกอก้านกิ่ง
สรรพมิ่งก็จั่งได้ ดอมด้วยตื่มกัน
คราวนี้ สรรสมแล้ว จั่งยอยกมาเผย
เอามาเปรยเป็นที่ กระบวนรำยามย้าย
นวยนายฟ้อน อรชรในตามวาด ให้สมบทบาทเบื้องนิทานเค้า เล่ามา ท่านเอ๋อย

(เดือนห้า)
ว่าแต่นั้น พลันด่วนดุ่งมา
ว่าในกาลนั้น บาก็ด่วนเทียวหา
ผู้พร้อมพร่ำจั่งคำค่า มหาเถระจารย์เว้า
หมายหมั่นเป็นจั่งเมียเค้าแนบเนาเข้าซอน
หมายสินอนแนบเขนย ย่อนหวังได้เชยอยู่บ่ห่าง

แล้วจั่งว่า โหญะเย่ง ย่าง ค่อยยาตรย่างแล้วนวยมา
บาคานท้าว ก็แลลอดเลาะหา
ผู้สมอิตถีว่ารัตนา เสมอยิ่งเป็นมิ่งแก้ว
ว่าบาดนี่แล้ว ฮอดบ่อนเคหัง
อั่นว่าคนคั่งเค็ง เพ็งเพียงพอตื้อ

เทือท้าวยื้อยั้ง ศาลาอยู่ข้างทางหว่างที่
แนมเห็น นางคราญหนึ่งอยู่เทียมข้างหว่างที่
ต่างลักษณะอันมี ในผู้คนล้นลื่น
บา ก็โสมนาแย้ม ยุ่มหย้ามซ้อยซื่น
ควมเคยคนิงคุค่ำคืน ผากดแย้มแจ่มมโน

🟩โอ ฮะโอ โอ้อกเอย
ผู้ทรามเชยพี่หนา
โอ ฮะโอโอ้ละหนา
งามปานฟ้าแต้มแต่ง
หลิงเห็นโสภาภาพ ชวนฝันฝั่นแฟงก็แจ้งในที่
คึดควมเถราจารย์เล่าชี้ ในถ้อยแถลงก็แจ้งใจ
เทือนั้นบามีปากต้าน วจีกล่าวขานไข
เป็นถ้อยแถลงแจ้งไป มีควมนัยเว่าว่า

ผญาท้าวคำสอน-นางกองสี
ท้าวคำสอน : โอน้อ พี่ก็มาเห็นน้องนางงามอินทร์หล่อแพงเอ้ย อ้ายก็หมายฮ่วมน้องเทียมข้างกล่อมสะนอนพี่แล้ว อดแต่ทางน้องเอื้อนคำพระไมมาต่อเฮียมท้อน อย่าให้พี่นี้ทุกขเวทโอ้นำน้องมอดซีวังอุ่นเอ้ย แมนน้องมีเครือเกี้ยวภายหลังซ้อนบ่อนแล้วรือ ฮู้ว่าผัวแนวข้างเทียมซ้อนบ่อนสะนอนพี่แล้ว
นางกองสี : โอน้ออ้ายเอ้ย น้องนี้แนวยิงฮ้ายกายกุยเหม็นสาบ บ่ห่อนเทียมแทบเท่าพระอวนอ้ายผู้งามได้แล้ว น้องก็เป็นกำพร้าทุกข์ยากขอกิน คนจรผัดแต่เป็นคนมาก็อยู่เดียวดายแล้ง ย้านแต่ทางเฮียมอ้ายมาจาหลอนหลอก ยั้วยวกให้พอตั้งต่อนำพี่เอ้ย
ท้าวคำสอน : โอน้อน้องเอ้ย พี่นี้ก็หากเป็นกำพร้าเสมออุ่นแนวเดียว น้องอย่าจาคำไลห่างพะไมนำอ้าย พี่ก็หมายเอาน้องกองสีเสมอหล่อคำแล้ว ซื่อว่าทุกข์หมื่นซั้นสิขันสู้ซ่อยอวน คันน้องเตื้องอ้ายสิเงี่ยงทอตัก คันน้องไขทอยาสิจีกตองมวนพร้อม คันน้องฮอมมโนไท้ขันเอาอวนพี่ อ้ายสิเอาอุ่นเข้าเทียมซ้อนฮ่วมเฮียง ผิว่าทางน้องนั้นสิทำตามจาฮีตเป็นรือ ซื่อว่ายิงให้ฮู้การย้าวซ่อยผัวนั่นเด้ ผัวเมียนี้กูมึงอย่าได้ว่ามีแต่ข้อยแลเจ้าผองเท่าซั่วซีวังน้องเอ้ย ยามกินพร้อมให้ผัวแพงกินก่อน ยามเมื่อนอนแนบข้างนางน้องอย่าได้กลาย อันนี้น้องสิขันอาสาสู้ดอมเฮียมพลอยพรากบุเด้ ซื่อว่าครองหมู่นี้สิทำได้บ่เด้
นางกองสี : โอน้อพี่เอ้ย คันเจ้าหมายเอาน้องคึดต่อเฮียงขวัญ เฮียมสิปลงใจดอมดั่งซายหมายหมั้น น้องสิขันเอาอ้ายทางซายมาฮ่วม บ่ให้ไลละม้างครองเค้าผู้ผัวดอกนา ซื่อว่าเป็นยิงนี้มีผัวเป็นเพื่อนดีดาย ทั้งหมู่คำปากเว้าอรอ้วนม่วนหูพี่เอ้ย ให้เจ้าเป็นผู้ฮู้การเวียกคนซาย หาทำกินสืบเฮือนเมือหน้า น้องสิขันอาสาสู้ฮองตีนใช้ซ่วง ซื่อว่าคำทุกข์ฮ้ายทะลอนม้างผ่ายหนี อันแต่จาฮีตเบื้องครองเก่าหลายประการ น้องก็ยังไป่ทันเฮียนฮู้ อดพี่ทันเทียมข้างวาจาสอนสั่งเอาท้อน น้องสิแปะใส่เกล้าครองสร้างสืบเฮือนพี่เอ้ย
ท้าวคำสอน : โอน้อเจ้าผู้ดวงดอกไม้ล้านสิ่งแสนกอพี่เอ้ย ยามเมื่อวาโยไขเร่งละอองอายเอ้า ก็หากหอมในเข้ามโนในพระพี่เฮียมเอ้ย ค

🟩🟨คำจามีมาห้อย ปานกงหลา ดอกมาปั่น
คำฮักมันหากเป็นจั้น ๆ เสมอฝ้าย ดอก กล่อมไน
จั่งขอให้พันเกี่ยวไว้คือไหมกลิ้งกล่อมเพียงเสมอ
แมนว่า วันหรือคืน เปลี่ยนกายบ่มายได้
ให้มันเป็น อ้อมล้อม ดอมเดียวดังเดี่ยว
ให้หน้าวเหนี่ยวหนอละแมนแฟงฝั่น ขันไว้ให้อยู่คีง

ฮักนี่จริงจังจั่งท้อนเป็นคำเว่าวา
ฮักยิ่งไผในหล้า ฮักเพียงหน่วยตานี่แหล่ว
แมนมีทุกข์ไฮ้ปิดช่องอัดทางบ่ว่างป่องแปว
แค่เรามีเราท่อนี่แล้ว
เอาฮักเป็นแนวร่วมฝันฝ่าไป

ทางใจดอมดั่งโดยฮู้
คำพะไมไขขานต้านเอย
ว่าอุ่นเอย ขอเชยชิดซ้อน
บ่ห่อนได้ ไกลห่างหนี
แมนวันเดือนปี เปลี่ยนผันไปหน้า
บ่มีคึดว่า สิฮ้างห่างหาย
ขอเนาแนบกายแต่เฮียม เอย