S.H.Figuarts Kamen Rider Gaim Orange Arms SHF 真骨雕 鎧武 日版

都諗左好耐先決定買呢隻, 主要原因係真骨真係做出佢既神韻同神緒, 擺啲姿勢又真係幾似樣。

有時係幾鐘意 SHF 幪面超人呢個糸列, 因為玩過咁多款 1/12 figures, 如果單睇塗裝, kamen rider 系列係靚過晒其他如龍珠, Marvel, DC 同 ultraman 系列, 因為佢上色算靚同準, 啲細緻位既塗裝係做到足比你, 即係如果以性價比嚟講, 買 shf kamen rider 無得輸, 當然對比龍珠, 成日會覺得咁簡單既塗裝都要賣咁貴唔值囉。

日版真係無諗住無官瑕, 今次好彩只係係頭上既金月角中間位置, 係有唔平滑同啲黑漆, 但用濕布抹左好耐可以淡化少少就算喇。每隻 figures 都係睇佢地既設計, 戰衣質感, 顏色配搭, 呢幾樣鎧武算唔錯, 尤其係最鐘意佢既複眼設計, 所以就買。其實呢隻野既造型係幾似日本果啲大將軍。

一開呢隻野, 一定會留意佢對複眼, 一望就發現啲橙色同裝甲上既橙色相比係淺色左, 跟住係頭上個半月角啲金色又係比對耳仔同裝甲上既金色淺色左, 仲有腹部戰衣既藍色同手同腳既戰衣顏色又係有啲差別, 因對顏色好敏感, 一睇就知啲深淺分別, 就好似隻 SHF 死士2.0 咁, 佢胸係略深色於腹部, 有時感到好奇怪, 隻 SHF Nebula 同死士同一隻色倒, 但又無呢啲色差問題, 有時唔明啲廠對顏色既掌控好似都未盡善盡美, 好彩呢隻鎧武本身就係咁, 因為望下其他 youtubers 就好容易搞清楚原有既設定係點, 到底係未 sad 位, 原來唔係, 因為隻 converge motion #23 鎧武既複眼同裝甲既橙色係一致既, 當然個原因係shf 果隻係可以換甲, 對複眼可以因底層唔同金屬色而變, 咁複眼頂層就只能係透明膠片, 咁啲顏色就可能比佢淡化左, 而 converge motion 果隻就直接用橙色透明件做, 咁未夠深橙囉。講起件底衫既藍色戰衣, 佢手同腳做出果種反光比腹部既靚, 腹部係弱啲, 所以係有啲色差, 但如果佢可以好似 converge motion 咁去油上一層深色既金屬藍會更好, 當然shf 隻野大, 又係要慳料, bandai 真係唔會同你咁做, 所以 Converge 同 Converge Motion 系列有啲塗裝係做得比 SHF 更加正。

要提既反而係影片中 converge motion 鎧武, 多左把橙刀, 咁條腰帶就唔油色, 胸甲既邊端亦唔上金色, 頭頂粒的亦無油綠色, 真係佩服 bandai 既成本控制, 所以 converge #27 隻鎧武反而成隻係塗裝最靚。拍完先知最後把長槍掉轉左方向接合, 無睇說明書嘛, 不過算啦, 反正次次拿拿林咁拍都係錯漏百出, 但一個玩具購買紀錄就係咁, 順便記低玩玩具既心路歷程, 同望住啲玩具既開心分享。

玩呢隻figure, 要好小心佢頭頂個半月角同埋把銀劍既尖端, 好易唔小心撞到就崩, 好脆弱咖。

最近留意到原來啲12蚊店都有出啲 1/12 簡單模型玩具, 但只係睇中左張摺凳, 因為最似, 你係影片中就會見, 就係黑寡婦坐緊果張, 而且摺凳身為十大武器之首, 係行走江湖必備既武器之一, 買家幾張係屋企旁身都好。

真係搵唔到有咩睇上去睇得上眼而又1順眼既 1/12 figures 好買, 都買得差唔多, 1/64 車仔巳接近退坑, 1/12 figures 亦接近退坑, 咁都係時候退出玩具呢個坑, 雖然退坑, 但所買既玩具都會繼續保留收藏, 唔會賣出去, 因為都花左好多時間去購買佢地, 亦食左好多炒價先買到返嚟, 因為大多都係後追, 有時係屋企望住心愛既 figures, 好過去玩具舖, 因為大多自己鐘意同順眼既figures 一眼就可以望晒, 而呢啲玩具例牌一早都巳經比人掃清晒, 因為玩家既眼睛都係好雪亮既, 大家認為正既都係必掃無疑, 所以玩具店無可能一眼見到晒我擁有既玩具。

友情客串:
SHF Deadpool 2
Mafex Wolverine 2024 Reissue (未買要買 reissue 版, 正好多, 尤其改善左手臂關節連接位既長度, 無初版咁易甩, 無面罩頭雕移印更清晰)
SHF 月神板机 風都版
SHF Black Widow Infinity War
Converge Motion 鎧武, 鳥系聯組, 恐龍聯組