Скачать или смотреть شكور حەمەی هەیەر

شكور حەمەی هەیەر shkur hamai haer

ئەمڕۆ 14-2-2021، بە ئامادەبوونی سەرپەرشتیاری ئیدارەی گەرمیان و قایمقامی كفری و كەلار و بەڕێوەبەرە گشتیەكانی گەرمیان و ژمارەیەك لە بەرپرسانی حزبی و حكومی و رۆشنبیران و چین و توێژە جیاوازەكان، لەسەر گۆڕەكەی لە گۆڕستانی باوەشاسوار، بە دانانی تاجەگوڵینە چلەی ماتەمینی شكور حەمەی هەیەر بەڕێوەچوو.

لە رێورەسمەكەدا، جەلال نوری سەرپەرشتیاری ئیدارەی گەرمیانی وتارێكی پێشكەشكرد و تیایدا وێڕای ئەوەی هاوخەمی خۆی بۆ كۆچی دوایی شكور حەمەی هەیەر دەربڕیی رایگەیاند، ئەمڕۆ هاتوین بۆ مەراسیمی چلەی ماتەمینی كاك شكور تاجەگوڵینەی رێز و وەفا و خۆشەویستی لەسەر گڵكۆكەی دابنێین، بەراستی هێشتا زوو بوو كاك شكور بەجێی هێشتین.

وتیشی: لە رووی ئیدارییەوە كاك شكور حەمەی هەیەر چەندین پلە و پۆستی هەبووە و زۆر بەسەركەوتوانە خزمەتی كردووە بۆیە لە دەستدانی تەنها زیان نەبووە لە خانەوادەكەی بەڵكو زیانێكە لە ئیدارە و گەرمیانیەكان و هونەرمەندان، لەبەر ئەوەی لە رابردوودا شوێن دەستی دیار بووە وەك سەرۆكی شارەوانی كفری و تا دەگاتە بەڕێوەبەری شوێنەواری گەرمیان كە چەندین خەزمەتی بە شوێنەوار كردووە، لەوانە كنە و پشكینین و تا دەگاتە نۆژەنكردنەوەی بەشێك لە شوێنەوارەكان.

سەرپەرشتیاری ئیدارەی گەرمیان راشیگەیاند: كاك شكور حەمەی هەیەر بەدەر لەوەی پیاوێكی قسەخۆش و هونەر دۆست بوو، شارەزاییەكی باشی هەبوو لە مێژوو و ئەدەبدا هەبوو، هەروەها لە رابردوودا هەڵوێستێكی جوانی هەبوو بۆ نیشتمانەكەی پیاوێكی خەباتگێر و نیشتمان پەرور بوو.

وتیشی: ئێمە وێڕای خەم و پەژارەمان بۆ لەدەستدانی كاك شكور، دوپاتیدەكەینەوە مردنی كاك شكور زیانێكی گەورەیە بۆ گەرمیانیەكان و شوێنی بەئاسانی پڕنابێتەوە، لێرەشەوە رایدەگەینین، بەداخەوە بەهۆی مەترسیەكانی ڤایرۆسی كۆرۆنا نەمانتوانی مەراسیمی شایستە و گەورە بۆ چلەی ماتەمینی كاك شكور ئەنجامبدەین.

دواتر لیوا مەردان چاوشین لێپرسراوی میحوەری قەرەتەپە-حەمرینی هێزەكانی پێشمەرگە وتەیەكی پێشكەشكرد و تیایدا تیشكی خستەسەر خەباتگێری و نیشتمانی پەروەری شكور حەمەی هەیەر لە سەردەمی رژێمی بەعسدا.

دوابەدوا ئەوەش، تاجەگوڵینەی جەلال نوری سەرپەرشتیاری ئیدارەی گەرمیان و قایمقامی قەزای كفری و قایمقامی قەزای كەلار و بەڕێوەبەرە گشتیەكان و بەرپرسانی حزبی و حكومی و كەسایەتی و لایەنە جیاوازەكان، لەسەر گۆڕی شكور حەمەی هەیەر بەڕێوەبەری كۆچكردووی شوێنەواری گەرمیان دانرا.