葉麗儀自爆家族秘密 大讚兒子新抱係超好家長

葉麗儀自爆家族秘密 大讚兒子新抱係超好家長

77歲嘅葉麗儀Frances 喺伊館舉行一連兩場演唱會，狀態相當Fit嘅Frances，由囝囝陪伴出場，對方返入後台前不忘向Frances送吻，場面溫馨。

今次以「感恩」作為演唱會嘅主題，Frances除咗感激歌迷一直以嚟嘅支持，以及同佢合作多年嘅音樂人之外，佢亦好感恩有一個幸福美滿嘅家庭。講到屋企，Frances仲首度公開自己家族嘅背景，佢話自己父母係嚟自一個好大嘅家庭，公公有七個老婆，而媽咪就有24個兄弟姊妹，當中葉媽媽因為排第九，所以叫做九姑娘；而Frances嘅爺爺就有兩個老婆，第一個老婆為爺爺生咗八個女，而爺爺60歲時，第一任太太離世，於是就娶咗第二任太太，並且生咗七個小朋友，Frances指佢爸爸出世時，爺爺已經係80歲。

事後Frances表示自己有次睇家族相簿時，見到爸爸細個時嘅相，當中佢坐咗喺一個白髮老人腿上，Frances話當時以為相中老人係太公，點知後來先知對方係自己爺爺，Frances仲話爺爺喺82歲時先生孻叔，令佢覺得爺爺好犀利，而呢啲家族史佢話自己甚少提起，趁今次演唱會同大家分享下。


演唱會上Frances仲分享咗好多家庭照，當中提到最細嘅孫仔當年出世後患腦癌一事，佢指細孫要坐輪椅同唔識說話，不過細孫仔係一個人見人愛嘅開心果，Frances指細孫仔而家已經14歲，為咗方便照顧對方，所以全家人定居澳洲，亦因為咁自己亦少咗時間返香港，Frances又指自己好欣賞囝囝同新抱，因為佢兩個係一對非常好嘅父母，識得教道子女外，仲會好悉心咁照顧呢位好需要愛嘅小朋友。

而Frances嘅囝囝為咗畀個驚喜媽媽，仲偷偷叫咗囡囡返嚟上台獻花，當Frances見到孫女時，佢話自己爭少少就忍唔住喊喇。演唱會後Frances表示會同老公去英國慶生，至於問到會唔會退休？佢就話自己好享受演出，所以冇諗過呀。

#葉麗儀 #演唱會 #驚喜 #感恩 #孫仔 #腦癌 #腦受創 #大家庭 #小秘密 #慶生
#TVB #娛樂新聞 #TVB娛樂新聞台

#ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0