“Yaşıl Dünya Naminə Həmrəylik İli” çərçivəsində “Tullantılardan Sənətə” adlı sərgi keçirilib

İyulun 20-də Bakı şəhər 3 nömrəli Uşaq Gənclər İnkişaf Mərkəzinin direktoru Lalə Qəti və rəssam müəllim Aytən Bəylərzadənin təşəbbüsü ilə “Yaşıl Dünya Naminə Həmrəylik İli” çərçivəsində “Tullantılardan Sənətə” adlı sərgi təşkil olundu. Sərgidə rəngkarlıq və dekorativ tətbiqi sənət nümunələri olan 23 əsər və 23 geyim modeli sərgilənirdi. Tədbirdə fəxri qonaq olan Beynəlxalq Qalereyanın direktoru Elnurə İsgəndərova çıxışında gözəl təşəbbüsün hər kəsin marağına səbəb olacağına və uşaqların dünyagörüşünün inkişafına müsbət təsir edəcəyini bildirdi. Bu istiqamətdə fəaliyyətlərində 3 nömrəli Uşaq Gənclər Mərkəzinin direktoru Lalə Qətiyə, rəssam, müəllim Aytən Bəylərzadəyə uğurlar arzuladı. Ekologiya və Təbii Sərvətlər Nazirliyinin əməkdaşı Aytən Hüseynəliyeva tullantıların sənət əsərinə çevrilməsinin maraqlı olduğunu, uşaqların əsərlərinin bir-birindən fərqli düşüncə ilə hazırlandığını qeyd etdi. Uşaqların ifasında rəqs və musiqi nömrələri alqışlarla qarşılandı. Sonda sərgi iştirakçılarına masterklass göstərildi, diplom təqdim olunub xatirə fotoları çəkildi.