عشان الود

لزوم نحب ونتضايق!
نعيش أحيان ونتمنّى !

نعيش الحب ونتألّم
عن الأحباب نتكلّم!!
ونتحسس لأن الطيف
كنّه مرّ وماسلّم !

ونزعل من غياب الشوق
ويبقى البرد بين الرّد
يخلّي صدرنا محروق !!

حسافة حيل.. صار الحب
بدون حقوق
عشان الوّد ..
يتوّجب.. على الخلّان تتعلّم
أصول الذوق !!
ويتوّجب على المشتاق يتنازل
ويتعنّى

لزوم نحب ونتضايق!
نعيش أحيان ونتمنّى !

نصيغ أجمل رسايلنا
على الفطرة
عشان الجرح لايكبر!
ونتفاجئ بعد مدّة
يصير الجرح ياااكبره !!
كذا العشّاق تلقاهم
دروبٍ مظلمة وخطرة !
يعزفون الصبر دايم
اذا ليل الوله غنّى

لزوم نحب ونتضايق!
نعيش أحيان ونتمنّى !

ندوّر عن امانينا
ونشرح من مآسينا
سنين طوال
على هالحال
صبرنا، ماتغيّرنا
ولا غيّرنا ضحكتنا وأغانينا !!

ندوّر في عيون الناس
يمكن صدفة نتلاقى
ويرجع طاري الإحساس
ونتداوى ونتهنّى

لزوم نحب ونتضايق!
نعيش أحيان ونتمنّى

كلمات اداء نوح حسين