Скачать или смотреть జంతువుల విహారయాత్ర తెలుగు కథ || Animal excursion Funny stories || Lion Elephant Fox Rabbit stories

జంతువుల విహారయాత్ర తెలుగు కథ || Animal excursion Funny stories || Lion Elephant Fox Rabbit stories
#Lion #GreedyFox #Rabbit
********** జంతువుల విహారయాత్ర ************
అనగనగా ఒక అడవిలో రకరకాల జంతువులు, రకరకాల పక్షులు ఉండేవి. వాటన్నింటికీ రాజు సింహం. మృగరాజు అందరినీ బాగా చూసుకోవడంతో అవన్నీ ఎప్పుడూ కలిసిమెలిసి ఉండేవి. ఆహారాన్ని సమంగా పంచుకుని కలిసి తినేవి. ఎప్పుడూ ఆటపాటలతో సంతోషంగా గడిపేవి. అలా ఆ అడవిలో ప్రతిరోజూ పండుగలా ఉండేది.

అవన్నీ ఒకనాడు ఎక్కడికైనా విహారయాత్రకు వెళ్లాలని అనుకున్నాయి. అయితే ఎక్కడకు వెళితే బావుంటుందీ అనే చర్చ వాటి మధ్య మొదలైంది.
"మృగరాజా.. నదికి అవతలి వైపున అందమైన ప్రదేశాలు, ఆడుకోవడానికి బోలెడు స్ధలాలు ఉన్నాయి.. మనం అక్కడికి వెళదాం.." అన్నది ఒక హంస.
"అవునవును.. అక్కడ తియ్యని పండ్లు కూడా ఉన్నాయి" అన్నది చిలుక.
"మీరంటే ఎంచక్కా ఒకరు ఈదుకుంటూ, మరొకరు ఎగురుకుంటూ వెళ్ళిపోతారు.. మరి అంత పెద్ద నదిని దాటి మేమెలా రాగలం" అనే సందేహాన్ని వ్యక్తం చేసింది ఏనుగు.
" ఓ పని చేద్దాం.. ఆ నది మీద వంతెన కడదాం.. ఆ వంతెన ఇప్పుడు విహార యాత్రకు ఉపయోగపడుతుంది.. అలాగే ఇరువైపులా ఉండే భావి తరాల వారికి వారధిగా కూడా ఉంటుంది." అన్నది మృగరాజు.
" వంతెన కట్టడం మన వల్ల అయ్యే పనేనా.. ఇక్కడే నాలుగడుగులు అటూఇటూ వేసి విహార యాత్ర అయిపోయిందనుకుంటే సరీ.. " అన్నది నక్క.
" ప్రయత్నిస్తే కానిపనంటూ లేదు.. పదండి.. పదండీ.." అంటూ తొందర చేసింది సింహం.

వెంటనే జంతువులు, పక్షులు కలిసి నది మీద వంతెన కట్టే పనిని ప్రారంభించేసాయి. ఎవరికి కేటాయించిన పనిని అవి హుషారుగా చేయసాగాయి. అడవిలో ఎండిపోయిన కలపను సేకరించాయి. చాలా శ్రమించి ఆ కర్రలతో నది మీద ఒక అందమైన వంతెన అయితే కట్టాయి.
" మృగరాజా .. ముందుగా నేను వెళతాను.. చరిత్రలో నిలిచిపోతాను" అన్నది ఆనందంగా కుందేలు. సింహం అంగీకరించడంతో అది వంతెన మీద నెమ్మదిగా నడక ప్రారంభించింది. కొంతదూరం వెళ్ళేసరికి వంతెన విరగడం మొదలైంది. అది గమనించిన కుందేలు భయంతో అరుచుకుంటూ వెనక్కి పరుగుతీసింది. కుందేలు వచ్చేసిన తరువాత వంతెన మొత్తం కూలిపోయింది.
" వంతెన కట్టడం మన వల్ల అయ్యే పనే కాదని నేను ముందే చెప్పాను.. చూడండీ కుప్పకూలింది.." అని వెక్కిరించింది నక్క.
నక్క మాటను సింహం లెక్కచేయలేదు.. "ఎవరూ అధైర్యపడకండి.. మళ్ళీ ప్రయత్నిద్దాం.." అని అందరినీ ఒప్పించింది.

వేగంగానే అన్నీ కలిసి మరొక వంతెనను గట్టిగానే కట్టాయి. ఈసారి గాడిద మొదటగా వంతెన మీద అడుగుపెట్టింది. అది వంతెన మధ్యలోకి రాగానే బీటలు వారుతుండటం చూసింది. అది కూడా అరుచుకుంటూ వెనక్కి వచ్చేసింది. ఈ వంతెన కూడా కూలిపోయింది.
" నేను ముందే చెప్పానుగా .. వంతెన మనం కట్టలేం అనీ.. చూడండీ, ఈ వంతెన కూడా నీటిలో కొట్టుకుపోయింది." అంటూ అవకాశం దొరకడంతో మళ్లీ వెక్కిరిస్తూ నవ్వింది నక్క.

"మిత్రులారా.. విజయం సాధించే వరకూ శ్రమిద్దాం.. ఆలస్యం చేయకుండా పనిని వెంటనే ప్రారంభించండి" అంటూ ఉత్సాహపరిచింది సింహం. మళ్ళీ అన్నీ కూడా వంతెన పని ప్రారంభించాయి. ఈ సారి చాలా గట్టిగా వంతెనను కట్టాయి.
"మృగరాజా.. ఇప్పుడు వంతెన మీద నేను వెళతాను.. ఏమీ కాకపోతే వంతెన సామర్ధ్యం తెలుస్తుంది. తరువాత మిగిలినవన్నీ భయం లేకుండా వచ్చేయెచ్చు.. " అన్నది ఏనుగు. మృగరాజు సరేననడంతో ఏనుగు వంతెన మీదకు వెళ్లింది. జంతువులు, పక్షులు ఆశ్యర్యంగా చూస్తుండగానే అవతలి వైపుకు చేరుకుంది. అతి బలవంతుడైన ఏనుగే అవతలకు చేరుకోవడంతో మిగిలినవన్నీ కూడా భయం లేకుండా ఆ వంతెన మీద నడిచాయి.

ఆ తరువాత విహార యాత్రలో నక్క ఒక్క మాట కూడా మాట్లాడలేదు. అనుకున్న విధంగానే నదికి అవతల ఉన్న అందమైన ప్రదేశాలలో జంతువులు, పక్షులు అన్నీ కూడా రోజంతా చాలా సంతోషంగా గడిపాయి.

ఈ కథలో నీతి ఏమిటంటే.. " విజయం సాధించే వరకూ ప్రయత్నిస్తూనే ఉండాలి."