Скачать или смотреть Sobanukirwa insigamugani "Akebo kajya iwa Mugarura"

AKEBO KAJYA IWA MUGARURA:
Uyu mugani bawuca iyo babonye umuntu witurwa ineza yagiranye imico myiza ye; ni bwo bavuga ngo: «Akebo kajya iwa Mugarura!» Uyu ni umugani wakomotse kuri Mugarura, ku ngoma itazwi neza ikirari.
Amateka avuga ko, Mugarura uwo ngo yakuranye imico myiza cyane, akubitiraho n'ubukire muri byose: imyaka n'amatungo; abantu baza kumucaho inshuro, ibyo navuga ko ari ukujya kumukorera akazi, icyo gihe imirimo yakorwaga baca inshuro yabaga ari imirimo y’ubuhinzi. Ubwo ababaga baje kumucaho iyo nshuro, akabereka icyibo cya mugerwa w'umuhinzi, umuhingiye yahingura akamuha inshuro y'umuhinzi muri icyo cyibo, hanyuma akamushyiriramo indi y'ubuntu.
Icyibo cya mugerwa ni inshimwe umuhinzi yabaga ari buhabwe, nk’uko umuntu ava ahantu akajya gukora akazi runaka, ashaka ko ahabwa igihembo, akenshi muri iyi minsi umukozi ahabwa umushahara mu mafaranga igihe akorera ukwezi cyangwa se igihe runaka umukozi n’umukoresha bumvikanyeho.
Ubworero icyo cyibo cya mugerwa akagiha abamucaho inshuro, Abigenza atyo imyaka myinshi, n'uje kumusaba inka nawe akayimuha, ndetse ngo byarimba akamuheta n' indi ya kabiri. Mugarura yagiraga ubuntu cyane, ku buryo yanarenzaga ku gihembo umukozi we yabaga agenewe, kubera umutima mwiza n’imico ye myiza byari byaramusabye.
Byibera aho, kuko burya ngo nta muntu ushimwa na bose, nibwo rubanda bamwe batangiye kumwegera bamwumvisha ko ibyo ari gukora ari ubusa, ashobora kuzimaraho ibintu, nk’uko bisanzwe bigenda mu bantu, bukeye inshuti za Mugarura, n'abana be baramukuba, bamubwira ko yangiza inka ze n' imyaka ye, bati: «dore urimaraho ibintu ubyangiza, nihacaho iminsi uzasigara umeze ute? Ejo uzasanga rubanda rukunnyega nta we ukureba n'irihuye.
Gusa Mugarura nk’umuntu wari uzi ibyo akora kandi ntawe abigishijemo inama, akajya yumva amagambo yabo akabihorera ntagire icyo abasubiza; ntihagire uwumva ururimi rwe; bigenda bityo igihe kirekire. Biba aho biratinda, ruabanada bakomeza kumutota ariko agakomeza kuryumaho. Bishyize kera, haza umuntu, aramugerageza aramushuka; aramubwira, ati: « Mugarura ubuntu bwawe bwo gutanga utabaze rubanda turabwishimira; ariko n'ubwo tugushima bwose, jyewe nta cyo urampa, none nje kugusaba inka eshanu zo kubaga. Mugarura amwumva yitozne nta no kumubaza impamvu aramwemerera, ubwo amuha izo nka eshanu, undi nawe aziha inzira arazijyana.
Uwo muntu mu kujya kwaka Mugarura inka, yazatse ahari hari ikindi ashaka, ariko Mugarura we ntiyamenya icyo amwakiye inka, bisa naho icyo we yumvaga akoze, ari uguha umuntu icyo ashaka. Uwo muntu Azigejeje iwe aho kuzibaga arazorora; inka zirakunda zirororoka, ziba amashyo atanu, akomotse ku nka eshanu. Rubanda babibonye batyo, akangononwa karazamuka, ntibihangana barega Mugarura ibwami ko yangiza ibintu.
Dore ko ubwo muri ibyo bihe uwangizaga inka ze bavugaga ko amara inka z'umwami. Bisa no kuvuga ngo umuntu ufata nabi umutungo we, aba asubiza inyuma igihugu mu iterambere, agasesagura umutungo we. Amakuru akigera ibwami ko Mugarura yangiza inka ze, byatumye umwami amugabiza rubanda baramunyaga, ariko inka n'ibintu bye nta muntu wabigabanye, byatwawe na rubanda bose rubyigabagabanije, umwe akagira icyo atwara undi akagira icyo atwara nta mutware runaka ubigabanye nk’uko byagendaga.
Icyo gihe wasangaga imisozi, inka n’ubutunzi bw’umuntu runaka bihabwa, ibyitwaga kugabana, undi muntu akaba ariwe ubigenzura mu buryo bwemewe I Bwami, gusa kuri iyi nshuro ibya Mugarura byo byatwawe na Rubanda rusanzwe.
Nuko ibwami bamaze gutanga iteka ko ibya Mugarura binyagwa na rubanda, bahise banategeka ko Mugarura atazahabwa umuriro kuko yabaye umupfu mu bintu by' ibwami, ntamenye gucunga neza ibyo afite. Mugarura amaze kunyagwa ahinduka umukene cyane, abura aho aba n'umugore n'abana be; ubuzima butangira kubabera bubi cyane agumya kuzerera.
Mugarura atangira kubura epfo na ruguru yarahoze afite ikibo agereramo abahinzi, ubwo muri ibyo bihe atunguka ku muntu wigeze kumuhingira akamuha inshuro ebyiri.
Uwo mugabo akubise amaso Mugarura agira impuhwe; ava mu nzu ya kambere ayiha Mugarura, asigara mu nzu yo mu gikari. Ubwo uwo mugabo Akebo aba akagaruriye nyirako, Mugarura amaze kubona inzu abamo, rubanda bamenya ko yabonye icumbi ryo kubamo; abo yagiriye neza bamenya amakuru ye batangira kujya bagenda nijoro, bamushyira ibintu. ...