Скачать или смотреть MBUNGE MPENDAE AHIMIZA JAMII KUWASAIDIA MAYATIMA

Mbunge wa Jimbo la Mpendae, Mohammed Kassim Salum Morgan, amesema kuwasaidia watoto waliopoteza wazazi wao ni miongoni mwa amali njema zinazompendeza Mwenyezi Mungu, akihimiza jamii kuendelea kuwajali na kuwaunga mkono mayatima.

Morgan ametoa kauli hiyo wakati wa hafla ya mashindano ya Qur’an yaliyofanyika Migombani Botanic, Wilaya ya Mjini Unguja, Zanzibar, yaliyoandaliwa na Munawwar Foundation.

Amesema kuwajali mayatima ni wajibu wa jamii nzima, na ameahidi katika kipindi chake cha uongozi kuwaunga mkono vituo vyote vinavyowahudumia watoto hao katika jimbo la Mpendae, hatua kwa hatua, pamoja na kuviunganisha na jamii na taasisi za kidini ili kuimarisha malezi na elimu yao.

Aidha, ametoa ahadi ya kutoa fursa na uwezeshaji kwa watoto hao ili waweze kukua na kuwa raia bora na viongozi wa baadaye, huku akiwataka viongozi wengine kuendelea kusaidia makundi hayo maalum.

Awali akitoa taarifa ya taasisi hiyo, Katibu wa Munawwar Foundation, Sharifu Ali Sharifu, amemuomba mbunge huyo kuwa mlezi wa jumuiya hiyo kwa vitendo, akieleza kuwa Ofisi ya Mayatima ya Mpendae Migombani inawahudumia mayatima 110 wakiwemo wanawake 70 na wanaume 40, pamoja na watu 70 wanaoishi katika mazingira magumu.

Amebainisha kuwa katika Mwezi huu wa Ramadhani, mayatima 40 bado hawajafikiwa na msaada, na kutoa wito kwa wadau mbalimbali kujitokeza kusaidia.

Mashindano hayo yalihusisha uhifadhi wa Qur’an kuanzia Juzuu ya Kwanza hadi ya Kumi, yakiwa na lengo la kuhamasisha watoto katika kujifunza na kuhifadhi Kitabu Kitakatifu cha Qur’an.