يا محبين القلايل 2021 كلمات: سعيد بن محماس | اداء: صالح ال مانعه .

[ بطوله القلايل النسخه العاشره 2021 ]
.
تابعونا يامحبين القلايل
في ميادين التنافس والاثاره

مهرجان يحي هوايه لوايل
جامع بين البدواه والحضاره

رافع قدر النوادر والاصايل
وعلم الجيل العسافه والصقاره

يستحق المفردات من المثايل
ويستحق انك تمره لو زياره

في مكان قافر مافيه زايل
كون عشب يجذب الحايم خضاره

مدهل للصيد من كل الفصايل
في مساييل دماث وفي والزباره

من قنص فالعرق واطراف القلايل
مايغبط اهل المناصب والتجاره

خص لا طارت عصر والفي مايل
عازم وقد فرطت تاره وتاره

ولزموا بمجرب قد له فعايل
هيبتة هيبة وزير في الوزاره

وروح اللي رمعته تشفي الغلايل
يخلف الناير الى طارت طياره

حتى لو مطلاعها فالجو هايل
مايضيع في مسايسها مساره

مابعد عين الى هدوه فايل
عوقها لا قالوا ان قد هي شراره

اشقر صافي ظهر وافي شلايل
عازل راسه وفي وجهه حراره

عاري تلحق شدوده فالطوايل
ومايغطي برقعه جوهر شناره

جربوا في طرحه انواع الوسايل
ويوم صادوه امتحنهم فالصقاره

هذي ابسط شي في وصف القلايل
يامحبين التنافس والاثارة

فكره اللي مايحب الا الجزايل
نادر تتعب طموحاته قراره

نفح جوده مثل همال المخايل
وان وقف ماله مكان الا الصداره

نسل من شبره على الاشبار طايل
جعل ربي يحفظه ويعز داره

هم ذرانا لا قسا الوقت وتمايل
وحن لهم حد البلاد وحن جداره