နိုင်ငံတကာက ရေဘေးအကူအညီတွေဝင်ရင် ဖွင့်ပေးမလား (ရုပ်/သံ)

နိုင်ငံတကာက ရေဘေးအကူအညီတွေဝင်ရင် ဖွင့်ပေးမလား (ရုပ်/သံ)

ဧရာဝတီ၊ စက်တင်ဘာ ၂၅၊ ၂၀၂၄

ယာဂိတိုင်ဖွန်းမုန်တိုင်းကြောင့် ရေဘေးဒဏ်သင့်နေရတဲ့ တခြားနိုင်ငံတွေလို နိုင်ငံတကာရဲ့ ကူညီထောက်ပံ့မှုတွေ ရအောင်လုပ်ကြဖို့ အာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင် က စက်တင်ဘာ ၁၃ ရက်နေ့က နေပြည်တော် ရေဘေး ခရီးစဉ်မှာ ပြောဆိုခဲ့ပါတယ်။

အိမ်နီးချင်း နိုင်ငံတချို့နဲ့ နိုင်ငံတကာ အဖွဲ့အစည်းတချို့ကလည်း ယာဂိမုန်တိုင်းရိုက်ခတ်မှုဒဏ်ခံခဲ့ရတဲ့ မြန်မာပြည်သူတွေကို အကူအညီတွေပေးဖို့ ပြင်ဆင်နေကြပေမယ့် ပြည်တွင်း ကူညီရေးအဖွဲ့တွေကိုတောင် ကန့်သတ်နေတဲ့ စစ်ကောင်စီဟာ နိုင်ငံတကာ အဖွဲ့တွေကို ဘယ်လောက်ထိ ဝင်ရောက်ခွင့်ပေးမလဲ၊ ဘယ်လို ကူညီခွင့်ပေးမလဲ ဆိုတာကိုတော့ မသိရသေးပါဘူး။

လူပေါင်း ၁ သိန်းကျော်သေဆုံးခဲ့တဲ့ ၂၀၀၈ နာဂစ်မုန်တိုင်း ဖြစ်စဉ်တုန်းကလည်း နိုင်ငံတကာ အကူအညီတွေကို လုံခြုံရေး အကြောင်းပြချက်နဲ့ ဟန့်တားခဲ့လို့ ပြည်သူတွေက နိုင်ငံတကာ အကူအညီတွေကို အချိန်မီမရရှိခဲ့ကြပါဘူး။ အဲဒီအချိန်က စစ်အစိုးရဟာ သူတို့ကိုယ်တိုင် စိတ်ကြိုက်ရေးဆွဲထားတဲ့ ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေ ပြည်လုံးကျွတ် ဆန္ဒခံယူပွဲကိုပဲ အာရုံစိုက် လုပ်ဆောင်နေခဲ့တာ ဖြစ်ပါတယ်။

လက်ရှိကြုံတွေ့ခဲ့ရတဲ့ ယာဂိတိုင်ဖွန်းမုန်တိုင်းဟာ မြန်မာနိုင်ငံဟာ အဖျားရိုက်ခတ်မှုကိုသာ ခံခဲ့ရတာဖြစ်ပေမယ့် ကြိုတင်ပြင်ဆင်ချက် အားနည်းမှုကြောင့် သေဆုံးပျက်စီးမှုတွေ များပြားခဲ့ရပါတယ်။ ဒုစစ်ခေါင်းဆောင် ရဲ့ ပြောဆိုချက်အရ စက်တင်ဘာ ၂၄ ရက်နေ့အထိ သေဆုံးသူ ၄၁၉ ဦးထိရှိတယ်လို့ ဆိုပါတယ်။

ဧရာဝတီက အပတ်စဉ်တင်ဆက်နေတဲ့ အယ်ဒီတာစကားဝိုင်းအစီအစဉ်က အယ်ဒီတာချုပ် အောင်ဇော်ရဲ့ ပြောကြားချက်တွေကို ကောက်နုတ်တင်ပြထားတာဖြစ်ပါတယ်။


#မြန်မာ #ဧရာဝတီ #ရေဘေး #နိုင်ငံတကာအဖွဲ့အစည်း #အကူအညီ #စစ်ကောင်စီ #Environment #ClimateChange #သဘာဝပတ်ဝန်းကျင်
----------------------------------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/3btQYpR