عزوة حرق | كلمات عبدالرحمن بن سعيّد الكودري | اداء فهد بن فصلا ( حفل زواج معيض ابن عليط ال سلطان )

❌ يوجد على الشله حقوق ❌ تنبية

بسم الله ابدأ واستعيذ الله من ابليس الرجيم
واعوذ بـه من شر نفسي لا طرى لي ما طرى

الدعـوة اللي قلتهـا مابين زمزم والحـطـيـم
اعيدها لو كان مانـي فـي حدود ام القـرى

لعل رجلـي ما تـزلّ من الصراط المستقيم
وعسـى لسانـي ما يزلّ وينطق اثمٌ مفتـرى

سـرّاني الهاجوس والماجوب في الليل العتيم
حثيت رجلـي والقلم والقاف والساري سرى

لبْيـت للـداعـي وانـا طرقـي وتقديري مقيـم
لا نخلـف الهـقـوة ولا خنّـا مـواثـيـق العـرى

مشاعري تلعب تحت قافي على النهج السليم
اترك مناهيـج شعـرى وانهج مناهيج شعـرى

يا معيـض يا عـز النـديـم اللي يدوّر لـه نديـم
جوك الرجال اقراب واصحاب وعواني وقصرى

مبروك ماسويـت يـابـن علـيـط يـالـحـر الـعـديـم
طيبك يخليـنـا نعـد المـدح في الوجـه جهـرى

في لازمك تاررَد هواجيـسي عَـلَـيّ ميرادْ هيـم
هيبة وقـدرً للمقـام اللي علـى احسن ما يُرى

شتّـان مابيـن المكارم فـ الكـريـم وفـ اللـئيـم
احدن على سطح القمر واحدن تحت بطن الثرى

حتى النخيـل الباسقات اللي لهـا طلعٌ هضـيـم
ماهـي بـ مثل الشجرة اللـي لا ظـلال ولا ذرى

يامرحبا عنـد الكريـم ابن الكريـم ابن الكريـم
ترحيـبـة التقديـر والماجــوب قـدام الـقِــرَى

بأسم ال سلطان الدهاه اللي بِـهُـم تفخر مظيم
الـم تـرى ميقـافـهـم دون الخـوي الـم تـرى

سلم ابن محسن للخوي اشهر من الطود العظيم
مجدً توثّـقْـهَ الرواه اللـي كـتـب واللـي قــرى

منصى وعراف الزمن هذا وفي الوقت القديـم
جمع الرجال اللي على الطالات والعز اخشرى

في ظـل شيخً سيرته عطـره ولـه رأيً حـكيــم
بشتـه عليهـم مـن لواهيـب الدهـر ظـل وذرى

الشيخ سيف وسيف سيفً مضربه وسط الصميم
سيف السعد سيف السعد منصى مشايخ وأومراء

يفداه شيخً عـن مواجـع ربعـه أحساسـه عـديـم
واللـي لحقـه خلاف منّـهم عنـه ما كنّـه درى

والشيخ بعـده شيخ ما بعد الزعيـم الا زعيـم
سعَد زعيمً دون ربـعـه ما أهـتـنـى حلـو الكـرى

ريف الخـوي والعانيـة والجار والطفل اليتـيـم
واللي عليـه الوقت الأقشر جار والجاري جـرى

ترثـة سلايل عزوة الحـرقـان متعبـة الخصيـم
مـنـهـم حصان التـرك لا منّـه ورَد عـوّد ورى

فزعاتهـم للـي دعاهـم تبـري الجـرح الأليـم
ولا العـدو مـن وقعهم يبطـي وجرحه مابـرى

يشهـد لهم مركاظهـم بيـن المنادي والغـريـم
بعد احتمى يوم الوطيس وجاك مردود البرى

ما يجهل فعول الرجال من الرجال الا غشـيـم
و عدّ الحقيقة حـق ما في الحـق بيع ومشتـرى

واللي يبـي يمسح تواريخ الرجال امّـه عقيـم
مجد الرجال اثقل على التاريـخ من قمة كرى

وصلاة ربـي عد ما هبّـت ذعاذيـع النسيـم
على رسول الله طٓـهَ المصطفـى سيِد الـورى

الشاعر : عبدالرحمن سعيّد الكودري