កម្មកររោងចក្រនៅតំបន់ 7NG បន្តចូលធ្វើការច្រើនឡើងៗជាមួយការពេញចិត្តចំពោះអត្ថប្រយោជន៍យ៉ាងច្រើនពីរោងចក្រ

កម្មកររោងចក្រនៅតំបន់ 7NG បន្តចូលធ្វើការច្រើនឡើងៗជាមួយការពេញចិត្តចំពោះអត្ថប្រយោជន៍យ៉ាងច្រើនពីរោងចក្រ

(កណ្តាល)៖ ក្រុមកម្មករ កម្មការិនី ដែលបម្រើការងារនៅរោងចក្រស្តារឡៃថ៍ ស្ថិតនៅតំបន់សេដ្ឋកិច្ច 7NG ឃុំវិហារសួគ៌ ស្រុកខ្សាច់កណ្តាល ខេត្តកណ្តាល កាន់តែច្រើនឡើងៗហើយ បានវិលត្រឡប់ចូលធ្វើការវិញជាមួយការ ពេញចិត្តយ៉ាងខ្លាំងចំពោះអត្ថប្រយោជន៍យ៉ាងច្រើនពីខាងរោងចក្រ។

ថ្លែងមកកាន់អ្នកយកព័ត៌មាន Fresh News នៅថ្ងៃទី២៣ ខែមិថុនា ឆ្នាំ២០២៣ ក្រុមកម្មការិនីបានអះអាងថា រោងចក្រ មិនបានបង្ខំកម្មករត្រូវតែធ្វើការហួសកម្លាំង ឬមិនស្ម័គ្រចិត្តនោះទេ ហើយអត្ថប្រយោជន៍គឺឲ្យកាន់តែច្រើន ចំពោះកម្មករណាមានស្នាដៃច្រើន ពិសេសគឺរឹតតែល្អចំពោះស្ត្រីមានផ្ទៃពោះវីញ ពេលសម្រាល និងក្រោយសម្រាល ខណៈដែលកម្មការិនីនឹងទទួលថវិកាជាង១ពាន់ដុល្លារឯណោះ។

ក្រុមកម្មករ កម្មការិនី បានសំដែងការពេញចិត្ត និងថា ខ្លួនមានសំណាងណាស់ដែលបានមកធ្វើការនៅរោងចក្រស្តារឡៃត៍នេះ ព្រោះថ្នាក់ដឹកនាំដែលមានលោក ម៉េង សុជាតិ ជាអគ្គនាយក តែងតែគិតគូរយកចិត្តទុកដាក់ បំផុតចំពោះរាល់ៗបុគ្គលិកទាំងអស់ ហើយតែងតែផ្ដល់ដំណោះស្រាយល្អបំផុតនៅមានបញ្ហាណាមួយកើតឡើង។

ជាមួយនឹងភាពប៉ិនប្រសប់ចំពោះការដឹកនាំនេះ កម្មករ កម្មការិនី បានលើកឡើងពីគុណបំណាច់របស់នាយកគ្រប់គ្រងជាច្រើនចំណុច ខណៈដែលមានរោងចក្រមានរឿង ក៏លោក ម៉េង សុជាតិ នៅតែបន្តរក្សាជំហរល្អ ដោះស្រាយបានគាប់ប្រសើរ ពោលបើទោះបីជាការបញ្ជាទិញពីខាងក្រៅមានការធ្លាក់ចុះពិតមែន ប៉ុន្តែថ្នាក់ដឹកនាំមិនដែលចាប់បង្ខំឲ្យកម្មករកម្មការិនី ឲ្យធ្វើអ្វីដែលខ្លួនមិនពេញចិត្តនោះទេ ឬបំភិតបំភ័យអ្វីឡើយ ពោលគឺកម្មករគ្រប់ៗគ្នានៅតែមានការងារ គ្រាន់តែការថែមម៉ោងត្រូវបានកាត់បន្ថយទៅតាមឥវ៉ាន់ដែលខាងក្រៅគេកុម្ម៉ង់ប៉ុណ្ណោះ។

ទោះយ៉ាងណាក៏មិនប៉ះពាល់ជីវភាពកម្មករនោះដែរ ខណៈដែលកម្មករមានប្រាក់ខែ២០០ដុល្លារ ហើយប្រាក់រង្វាន់ និងប្រាក់លើកទឹកចិត្តផ្សេងទៀត១ខែកើនឡើងដល់ទៅជាង៣៥០ដុល្លារឯណោះ។ នេះមិនទាន់រាប់ថ្នាក់ដឹកនាំក្រុម ថ្នាក់ដឹកនាំតាមអគារផង ដែលបុគ្គលិកខ្លះមានចំណូលខ្ទង់ពាន់ដុល្លារឯណោះ។

ក្រុមកម្មការិនីដែលកំពុងបម្រើការងារនៅរោងចក្រស្តារឡៃថ៍ បានបន្ថែមថា ពួកគាត់គាំទ្រចំពោះការដឹកនាំរបស់អគ្គនាយករោងចក្រ ដែលលោកបានខិតខំជួយជ្រោមជ្រែង និងយោគយល់ដល់កម្មករ កម្មការរិនីដោយគ្មាន ប្រកាន់ទោសកំហុសអ្វីឡើយ និងសូមអរគុណថ្នាក់ដឹកនាំរោងចក្រដែលបានខិតខំត្រួសត្រាយផ្លូវដល់កម្មករឲ្យមានការងារធ្វើ និងមានប្រាក់ខែសមរម្យ ហើយមានប្រាក់លើកទឹកចិត្តថែមទៀត ដែលអាចឲ្យពួកគាត់រស់បាន យ៉ាងស្រួលមានជីវភាពធូរធា។ 

ជាមួយគ្នានេះគ្នាលោកកញ្ញ៉ា សយ គីមលី នាទីជាជំនួយការរដ្ឋបាល និងតំណាងបុគ្គលិក លោក ស៊ុន វាសនា ជាជំនួយការរដ្ឋបាលរោងចក្រ បានថ្លែងថា រោងចក្រមិនដែលមានការកៀបសង្កត់កម្មករកម្មការិនីម្ដងណាឡើយ ពោលគឺតែងតែជួយសម្រួលរាល់ការលពាកទាំងឡាយណាដែលពួកគាត់ស្នើរសុំមក ពិសេសគឺអ្នកមានបញ្ហាសុខភាព អ្នកមានផ្ទៃពោះ និងសម្រាល ខណៈរោងចក្របានផ្ដល់ឱកាសឲ្យអ្នកមានបញ្ហាសុខភាពទទួលបានការថែទាំ ពិនិត្យដោយក្រុមគ្រូពេទ្យប្រចាំការក្នុងរោងចក្រ បើសិនជាធ្ងន់ នោះរោងចក្រនឹងបញ្ជូនទៅកាន់មន្ទីរពេទ្យ។ រីឯអ្នកមានផ្ទៃពោះវិញ ខាងរោងចក្រផ្ដល់ការងារស្រាលៗជូនគាត់ ហើយអនុញ្ញាត្តឲ្យចូលក្រោយម៉ោង និងចេញមុនម៉ោង ថែមទៀតផងខណៈដែលមិនមានការកាត់អត្ថប្រយោជន៍គាត់ឡើយ។

តំណាងដដែលបន្តថា លោក ម៉េង សុជាតិ តែងតែគិតគូរយកចិត្តទយកដាក់ណាស់ មិនដែលចន្លោះប្រហោងម្ដងណាឡើយ មានការយោគយល់ចំពោះថ្នាក់ក្រោម មិនដែលស្ដីបន្ទោស និងដាក់គំនាបសង្កត់ឡើយ ពោលគឺមានតែ ការជួយជ្រោមជ្រែង ជួយសម្រាលការលំបាក និងសណ្ដោសប្រណីរហូតមក។

លោក ម៉េង សុជាតិ ជាអគ្គនាយក មានតួនាទីក្នុងការគ្រប់គ្រងឲ្យលើផលិតកម្ម រីឯការបញ្ជាទិញពីខាងក្រៅវិញ ជាបន្ទុកទទួលខុសត្រូវរបស់ក្រុមការងារខាងសេល (ផ្នែកលក់) នៅខាងប្រទេសសិង្ហបុរី ខាងហុងកុងឯណោះទេ ដែលទទួលខុសត្រូវលើរឿងនេះ។ ដូច្នេះសូមកម្មករទាំងអស់មេត្តាឈប់យល់ច្រឡំ និងសូមអញ្ជើញចូលមកធ្វើការវិញមក ខាងរោងចក្រទទួលស្វាគមន៍ជានិច្ចដោយគ្មានបញ្ហាអ្វីឡើយ។

សូមជម្រាបថា ក្រោយពេលមានការសម្របសម្រួលពីសំណាក់លោក គង់ សោភ័ណ្ឌ អភិបាលខេត្តកណ្តាល, កម្មករកម្មការិនីយ៉ាងច្រើនសន្ធឹកសន្ធាប់ បានស្ម័គ្រចិត្តចូលធ្វើការវិញ ប៉ុន្តែនៅសល់បន្តិចបន្តួចប៉ុណ្ណោះ ដែលមិនទាន់យល់ព្រមចូលធ្វើការវិញ៕