Скачать или смотреть 資深武指唐佳墮樓離世 黃宗澤緬懷前輩鐵漢柔情

資深武指唐佳墮樓離世 黃宗澤緬懷前輩鐵漢柔情

雪妮同丈夫唐佳一直係娛樂圈中模範夫妻，相愛超越半世紀仍然恩愛如昔。可惜喺23號傍晚傳出噩耗，尖沙咀柯士甸道同松山道交界發生一宗墮樓意外，死者證實係原名黃唐嘅資深武指及演員唐佳，終年88歲。

唐佳嘅親人星期二早上現身葵涌殮房認屍，面對現場傳媒提問均沉默不語，逗留約一小時後登上小巴離開。據知觸發唐佳輕生念頭嘅，疑係因為太太雪妮患上胰臟癌，需長期住院治療，令夫妻生活巨變。

據指唐佳曾向兒子透露生活唔愉快，唔忍心睇住老伴受苦，想夫妻同步離開。事發翌日，墮樓地點遺留一個沾有血漬扭曲嘅交通路牌，而附近店舖同現場都見有人拜祭及獻花，附近一間涼茶舖嘅老闆更形容，雪妮同唐佳平日恩愛非常，出街時均會十指緊扣及態度親切。

唐佳1937年生於澳門，15歲時開始跟師傅做粵劇武師，喺60至80年代擔任多位名導演好似張徹、楚原、李漢祥等多套經典作品嘅武指。80年代更踏上導演階梯，曾執導過3部電影，均屬功夫片佳作。其後佢曾加入TVB擔任武術指導，直至80年代末期淡出香港影視圈，移居加拿大。直至90年代，因家人唔適應當地生活而回流返港。

唐佳1969年迎娶雪妮，婚後育一對兒子。夫婦曾經接受節目《K-100》訪問，唐佳笑指太太新婚嘅時候，好似女俠一樣咁火爆。雪妮喺97年復出加入TVB，每當老婆開工時，唐佳都貼心陪伴左右。皆因雪妮早年發覺耳朵受遺傳病影響，一邊完全失聰，為免老婆聽力不足而難以跟人溝通引起誤會，唐佳便經常喺雪妮身邊，無時無刻為老婆充當助聽器，唐佳曾笑言自己係雪妮嘅阿四，為佢打點一切。

唐佳嘅離世令娛樂圈深感婉惜，現任「香港動作特技演員公會」會長錢嘉樂表示會全力協助唐佳家人辦理後事。視唐佳為恩師嘅姜大衞亦喺社交平台上載照片留言：「我這一生人最重要嘅三位師父都已離我而去。」而啱啱入行就認識唐佳嘅黃宗澤發文悼念「剛入行，我咩都唔識，你教我點拍打戲，半夜攞葯酒嚟我房幫我捽葯酒，如果唔係以後會有風濕，喺廠見我拍拍到好夜，又會叫我做演員要好好照顧自己，你仲會好溫柔咁叫我阿仔，呢啲點點滴滴到依家我仲好記得，喺你身上我學識咩叫鐵漢柔情，我哽咽我痛心，只能希望一切安好。」另外同唐佳合作過嘅演員陳山聰、徐榮同湯洛雯等都有喺社交網作出悼念。

#唐佳離世 #雪妮老公 #墮樓 #噩耗 #模範夫妻 #相愛 #超過半世紀 #恩愛如昔 #葵涌殮房 #親人認屍 #胰臟癌 #長期住院 #老伴受苦
#TVB #娛樂新聞 #TVB娛樂新聞台

#ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0