اهل المطاليع - جزاع المري ( حصرياً ) 2023

كلمات الشاعر : سعد الذرفي



ماكنت احسب الزمن عجلن بدوراته
واثريه ياخذ وانا غافل من سنيني
الشيب في لحـيـتـي بانات علاماته
عديت خلفي عمر تسع وثلاثيني
الوقــت هـذا ماتـغـرينـي ملذاته
تغيـرت فيـه ناسـه والموازيني
القلب ماضيه زود فيه نبضاته
اليا طرالي تحارب نومها عيني
العين ماتدمـع الا لطاري امــواته
لو انهم في عيوني دوم حييني
القلب معروف ضحكاته واهاته
وانا خفوقي تحت امري يمشيني
بداية ابن ادمً تشبه نهايته
ولابــد حــنا عن الدنيا مقفيني
لاتامن الوقت في غيبه و ضحكاته
مادام لرســل ويضـا لسلاطيني
حتى الكواكب تهاوت مع مجراته
ويالله يارب تسترني وتغنيني
انت الذي تمنح لقلبي مسراته
من فيض جودك ياربي لاتخليني
وابن ادم لو تكبر يرجع لذاته
مايدري انه خلقه الله من طيني
والكل مكتوب حسناته وسياته
والناس تعرف طريق الزين والشيني
والرجل يتعب على ويش هي طموحاته
وانا هـجوسـي على الطاله تـوديني
وان ضاق صدري وزادت به معاناته
اروح للـي عــن الضــيـقـه يسلني
الكون واسع ويا مكبر مساحاته
ومشيي مع البيد ينعشني ويحيني
فوق اسردن ماتعذبني مطباته
اشهب كما الذيب ياخز الشياطيني
عوق الوعر والخطوط الي ملفاته
ماكنه الا مثل شكل الثعابيني
يشريه من جرب البر في متاهاته
لو ماملك قيمته يشريه بالديني
شفي سحابن تباشر به جهازاته
يالاح برقه تقول انه يناديني
يجهر نظر من يدقق في مراعاته
مثل الفلاشات في حفل المحبيني
ماحدده خالد الزعاق بوقاته
ساق وتراكم مثل وصف الضلاعيني
مافيه وادي ماحول في مساراته
تقول قدمه زبد روس البعاريني
كنه يفجر نهر دجله على فراته
وتشابكت كنها عروق الشراييني
وكوم البرد فارشن بالارض زخاته
حباته الي كبر روس الشيهاني
وسمً بكورن تتابع فيه سوقاته
حتى غدا نبت عشبه له تلاويني &
الصبح ولا المساء يازين نفحاته
انوج من العطر في وسط الدياويني
يهدى منه باغه وتصنع عطوراته
مكاسبن حققت منها ملاييني
واهل المطاليع هبت فوق شاصاته
عن ضجت المدن اشوف الناس عجليني
كلن يصور وينشر في سناباته
زين الطبيعه بعد شوب الكلبيني
تناضر العين ماتلحق مساحاته
ولااتسمع الا ام سالم له تلاحيني
والفقع شافو زبيديه وشاراته
منه الصفا صاير بالارض قسميني
ان قاله الله ضحى تشبع به رعاته
وخوان بدوى على صوبه محيليني&
كلن ورى ذوده وقدمه معداته
واقلهم من جنبها حول عشريني
يوم ان غال العلف يشكونه شراته
عطاهم الله ماهو مد البخليني
خفت عليهم مصاريفه ونكباته
وستانست بالحياء رثم العرانيني
وان جيت في فيضتن للكيف حزاته
اظهر دلالن مثل وضحن مزاييني
ودق نجرن يهيض القلب بصواته
قنيب ذيبن يجاوب له سراحيني
الكيف يجلي عماس الراس وسباته
اشقر اليا صب لك في وارد الصيني
ولي معي تشهد لطيبه سجلاته
اغليه واعزه ودينه على ديني
خوي جنبن ومعجبني بوقفاته
في ذمتي يازهمته مايخليني
مايجرح الكبد في هرجه و شرهاته
كريم نفس وعزيز ومذهبن زيني
مادام رزقي بجاه منّزل اياته
ابي اتمشي مادام انه معافيني