مقدم السربه | كلمات بندر بن عويّض | اداء حاتم الشاطري

لمتابعة بندر بن عويض عبر وسائل التواصل الإجتماعي:
منصة Twitter X |
‏https://x.com/bndr305?s=21
سناب شات Snapchat |
  / kh66qria  


اوبريت حفل الشيخ :
معيض بن عوض ابن الذويبي الحنوشي المطيري
بمناسبة زواج ابنه محمد - نتمنى له التوفيق


الليال بطونها ..... ما تشبه بطون السحابه
يالله تعجّل بـ صبحن كل يوم .... اقول توّه

اجتلد بالصبر و اردع نفسي بذكر الصحابه
وهم صحابه جتهم الايام بالوجه المشوّه

ودي اقفي عن طويل الرجم مير شلون اجابه
راسي اللي تطّبخ فيه ..... المراجل و الحموّه

من ذراعي ماخذن رزقي من حلوق الذيابه
كل ما زاد المعايا زادت .... اعزومي اجروّه

الشعر شيخ الكلام و يحسب الواعي حسابه
لا اصدقت فيه المشاعر ... ما تقر الا علوّه

حاشمن قوس سهمه لا ينسحب فوق الربابه
ولا سبرت الا مخيلن يبذخ امن الجود نوّه

الكفو تاكل عيوبه ناره اليا ......... فك بابه
و الردي ماعمر شب الا على الاعراض ضوّه

و احمد الله جامع الثنتين من شعر و ذرابه
واسمٍ خد الغفال و مسرج حصاني وادوّه

وللمقام اللي ملا ركونه وصدر اهله رحابه
قادنا سلك الحرير و عن طريقه ما نتوّه

ناصله والراس شامخ في محل شيوخ لابه
من شيوخ مطير ربعي صفوة المجد ونموّه

عند ابو عبدالله انرحب ... و ناقف بالنيابه
مرحبا والشعر ليته يوفي الليله ... شدوّه

الفخر في سيرتك يا معيض ... ما قفل كتابه
وانت شيخ و جود كفك شارحن معنا السخوّه

فزعتك للطيب عجله وانت درعن للقرابه
ترثة شيوخ الحنانيش اهل المجد المفوّه

شيختن يوم الليالي بين وقفه و انقلابه
استبد الها الذويبي ما خذاها من هدوّه

مقدم السربه نهارن للفوانيع ..... التهابه
يبجد الجمع المهيب و ينتق البيرق بقوّه

لا ابتدا يوم الممارى بكل مجدن يندرابه
اعتلى مجد الذويبي .. بالزعامه والمروّه

ولا ذخر لشداده الا شيخ ما يوخذ نهابه
ارتكى دونه عوض وازداد زومه من سموّه

شايبن منصا يعقد الراي ومخلد جوابه
والغدا للضيف سوه والعشا للضيف سوّه

ولا يزال البيت شامخ في ذرا من ... يندعابه
لا انقصر من يحتمون النايب .. بكثره وشوّه

محتميه الشيخ عبدالله ولا ... فيها غرابه
كل ما وقف ينومس ربعه .. ويلطم عدوّه

و يا عسى التوفيق من فال ابلجن يدرا جنابه
حافظ السلم الجزيل و حافظن قدر الاخوّه

افتخر يا محمد ابن معيض دربك مامشابه
غير قرمن لا ظفر فالموجبات يطيب .. جوّه

يا اهل الردات ربعي عزوة مطير المهابه
عزوتن ما تنتناحا لا ادجرت يوم العتوّه

في ملز الصافنات ان كلح المسموم نابه
ولجت بطون المحاجي بالرماه و بالمنوّه

نرهجه بالدقله اللي تسلب .. عيون الحرابه
و تجدع الشيخ المجوّخ عقب ماجاله فتوّه

بالثلاث وغيرها يا مجدنا ..... مالك مشابه
غير مجد اسلافنا اللي من قبل عصر النبوّه