ခွန်သူရိန် လျှောက်မယ့်လမ်းနဲ့ ခွန်ဥက္ကာ လျှောက်မယ့်လမ်း

ခွန်သူရိန် လျှောက်မယ့်လမ်းနဲ့ ခွန်ဥက္ကာ လျှောက်မယ့်လမ်း
-------------
ပအိုဝ်းအမျိုးသားလွတ်မြောက်ရေးအဖွဲ့ချုပ်/ပအိုဝ်းအမျိုးသားလွတ်မြောက်ရေးတပ်မတော် PNLO/PNLA ရဲ့ ခေါင်းဆောင်ပိုင်း အကွဲအပြဲမှာ စစ်ဦးစီးချုပ် ဗိုလ်ချုပ်ခွန်သူရိန်က လက်နက်ကိုင်တော်လှန်ရာမှာ ဆက်လက်ပါဝင်မှာ ဖြစ်ပြီး ဦးဆောင်နာယက ဗိုလ်မှူးကြီး ခွန်ဥက္ကာကတော့ စစ်တပ်ဩဇာခံ ပအိုဝ်းပြည်သူ့စစ်နဲ့ပူးပေါင်းဖို့ လိုလားနေပါတယ်။

ဗိုလ်မှူးကြီးခွန်က္ကာ က PNLO ကနေ နှုတ်ထွက်ပြီး စစ်ကောင်စီလက်အောက်ခံ ပအိုဝ်းပြည်သူ့စစ်အဖွဲ့နဲ့ ပူးပေါင်းလိုကြောင်း ထုတ်ပြောလာပါတယ်။

၂၀၂၁ မှာ အာဏာသိမ်းပြီး ဆန္ဒပြအရပ်သားတွေကို ပစ်သတ်ခဲ့တဲ့ စစ်တပ်ကို နိုင်ငံအနှံ့မှာ လက်နက်ကိုင်တော်လှန်မှုတွေ ပေါ်ပေါ်ခဲ့ပေမယ့် အသက် ၈၀နီးပါးအရွယ်ရှိတဲ့ ဗိုလ်မှူးကြီးခွန်ဥက္ကာက အပစ်ရပ်စာချုပ် NCA အရ စစ်တပ်နဲ့ ဆွေးနွေးရေးလမ်းစဉ်ကိုပဲ ရွေးချယ်ခဲ့ပါတယ်။

ပြီးခဲ့တဲ့ ၃နှစ်ကျော်အတွင်းမှာ စစ်တပ်နဲ့ တွေ့ဆုံပြီး ရလဒ်မရေရာတဲ့ ဆွေးနွေးမှုတွေ လုပ်ခဲ့ပါတယ်။

PNLO/PNLA ရဲ့ ဥက္ကဋ္ဌလည်းဖြစ်၊ စစ်ဦးစီးချုပ်လည်းဖြစ်တဲ့ ဗိုလ်ချုပ်ခွန်သူရိန်ကတော့ အပစ်ရပ် NCA လမ်းကြောင်းမှာ အခုနှစ်ဆန်းပိုင်းအထိပဲ ပါခဲ့ပြီး၊ အဲ့ဒီနောက် စစ်ကောင်စီကို စစ်ရေးအရ တိုက််ခိုက်နေတာ ဖြစ်ပါတယ်။

ဗိုလ်ချုပ်ခွန်သူရိန်ဦးဆောင်တဲ့ ပအိုဝ်းအမျိုးသားလွတ်မြောက်ရေးတပ်မတော် PNLA တပ်ဟာ စစ်ကောင်စီထိန်းချုပ်ထားတဲ့ ရှမ်း-ကယားနယ်စပ်က ဆီဆိုင်မြို့ကို ယာယီသိမ်းပိုက်နိုင်ခဲ့သလို၊ လက်ရှိမှာလည်း စစ်ကောင်စီကို ဆက်လက်တိုက်ခိုက်နေတာပါ။

ဒီလိုအခြေအနေမှာ PNLO ရဲ့ နာယက ရာထူးကနေ နှုတ်ထွက်ကြောင်း ဗိုလ်မှူးကြီးခွန်ဥက္ကာက အခုလ ၁၀ရက်နေ့မှာ ကြေငြာခဲ့ပါတယ်။

စစ်အာဏာရှင်ကို တော်လှန်နေတဲ့ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO/PNLA) အနေနဲ့ကတော့ အဖွဲ့ကို ခေါင်းဆောင် ၅ဦးနဲ့ ဦးဆောင်သွားမယ်လို့ စက်တင်ဘာ ၁၁ရက်နေ့က ဗဟိုအလုပ်အမှုဆောင်ကော်မတီ အထူးအစည်းအဝေးဆုံးဖြတ်ချက်ကို ထုတ်ပြန်ထားပါတယ်။

ဒီဆုံးဖြတ်ချက်အပေါ် ဗိုလ်မှူးကြီးခွန်ဉက္ကာအနေနဲ့ သဘောမကျတဲ့အတွက် နှုတ်ထွက်တာ ဖြစ်နိုင်ကြောင်းနဲ့ PNLO/PNLA အနေနဲ့ကတော့ ရှမ်းပြည်တောင်ပိုင်းမှာ အခြေပြုပြီး စစ်အာဏာရှင်ဆန့်ကျင်ရေး ဆက်လုပ်သွားမှာ ဖြစ်တယ်လို့ အထွေထွေအတွင်းရေးမှူး ဗိုလ်မှူးကြီးခွန်အောင်မန်းက ပြောပါတယ်။

သတင်း၊ တင်ဆက် - မြတ်ကြီး၊ စောရယ်