呂柳仙唸歌集：十殿閻君

20200505民生社區健康福氣站教材
聽音拍字這種工課無啥趣味，想袂到才短短一甲子，語言會流失遮爾濟，干焦像我這種頇顢人才會為著揣一音一字了欲兩三點鐘。
呂仙這塊「十殿閻君」Youtube 內底上少有十偌種版本，敢閣有需要了時間去聽音拍字？好啦！就共當做戇人做戇代誌，總是有一寡咱佮別人無仝款的理解。橫直咱遮的老大兄老大姊愛看，愛聽咱烏白彈，按呢就有夠矣！
今仔日特別囥逐家聽甲耳空結趼、呂仙上出名的「十殿閻君」文字對照，會當應用的所在，歡迎呼(khoo)去用！

十殿閻君 呂柳仙唱 字稿：徐堃明
本境城王佮土地，做好做歹先知機，
土地若知欲繳旨，敢著交予善惡司咿。

有人做惡講做善，守善犯惡簿就掀啊，
黑無常 差捾鐵鍊，咧欲掠來地獄受苦憐。

黑白無常啊烏白面，暗查察司佮眾神，
判官小鬼行鬥陣，咧欲查斷陽間盡忠人咿。

十八地獄欸分善惡哩，勸恁毋通做惡毒啊，
好心好行天送福，歹心終世著勞碌哩咿。

牛頭馬面啊二將軍，猶有日夜雙遊巡啊，
凌霄寶殿問一睏，若到東獄善惡閣再分啊。

十殿閻君啊罰罪嚴，好心好行再加添，
陰間定數袂走閃，好的無人敢犯嫌 。

威靈顯赫啊酆都帝，馬面將軍啊手來攑叉，
善惡查察若詳細，欲除歹心規千个欸。

威靈顯赫你若問清楚，做歹毒心欸罪難逃，
著閣灶君面前先畫號，掠來十殿見閻羅。

頭殿閻君啊是秦廣，正的頭關的閻王，
陰府地獄闊莽莽，致到陽間不相同。

秦廣蹛咧頭殿內，頭殿一个玉鏡台，
在生陽間若做歹，㧒鏡去照逐項知咿。

後母苦毒前人囝，奸拐 弄散人親情，
死落陰間就吼疼，數簿徛佇頭一名。

過來一款可憐代，一个查某人害死狗仔栽，
因樣 一隻狗鑽入灶空內，煮食無共趕出來。

一隻狗母有身五隻囝，無共伊趕出來火就燃，
狗母毋願去告玉鏡，咧欲判斷查某予恁大家聽咧。

五隻狗栽被伊害，閻君判斷來投胎，
來投冤主腹肚內，若生囝狗母才去請花栽。

狗仔囝出世隨時死，冤冤相報來害伊，
閻君判斷照情理，彼个查某才閣落血池咿。

二殿閻君是楚江，設起刑具 誅 萬人，
在生若有做萬項 ，勸恁大家仙毋通。

在生不孝序大人，掠來去二殿摃跤胴 ，
忤逆爸母罪蓋重，著閣燒烌研末 過塗壟 。

不孝老爸佮老母，掠到二殿罪難逃，
定著應該萬刀剉，燒烌研末過疏籮 。

第三殿閻君是宋帝，馬面將軍手攑叉，
善惡查察若詳細，欲誅歹心規千个。

在生強佔人牽手，掠來去三殿拍目睭，
抑是踮佇咧做剪綹 ，著閣剝皮骨頭隨塊抽。

奸拐有翁人查某，掠到三殿軁火箍 ，
定著破腹溜 腸肚，落做四腿 上炊房 。

第四殿閻君是五官，枉死長城百丈懸，
内面枉死講萬款，哀怨無地哭申冤啊。

在生有人咧拍鳥，不時鳥銃揹牢牢，
掠到四殿抱銅柱，予火焼到曲曲曲。

無天無良剪人筊，若無經罰罪袂消，
到四殿衫褲剝了了，定著刑罰龍蝦雕 。

五殿閻君是森羅，勸恁歹心毋通學，
在生歹心欸萬刀剉啊，掠到五殿過研槽 。

森羅蹛佇五殿內，五殿一个這號望鄉台，
看著囝孫流目屎，黑身朽爛袂倒來咿。

九升騙人做一斗，失人寸尺減秤頭，
若無公道秤甲到，掠去五殿摃蝦包，
摃甲鼻血雙港流。

六殿閻君有卞城，鬼門關喔刑具通人驚，
歹心若死就吼疼，好心金童玉女迎。

在生強佔人家伙，掠到六殿落油鍋，
若無經罰罪袂過，應該著閣先剝皮。

抑若無翁的查某嬈契兄，小鬼鐵鍊鍊咧行，
來到六殿落油鼎，按呢刑具看恁驚毋驚。

查埔無某嬈夥計，親像這款反悔遲，
掠到六殿受凌治，抱在銅柱割喙舌咿。

第七殿閻君是泰山，泰山刑人誠粗殘，
好心來看驚到瘦，歹心來看心不安。

做人序細不受制，欺善怕惡愛冤家，
掠到衫褲褪裼裼 ，抱在銅柱過五叉欸。

一身血流共血滴，胸前鐵叉四五支，
踮佇咧身軀無捨施，才閣狼牙野獸閣分屍咿。

在生翁某共人拐散，新婦不孝大家官，
後擺若死毋免判，來到七殿過刀山啊。

八殿閻君是平正，創造馬車真正經，
歹心拖落馬車研，閻君判斷求無情啊。

廟內尼姑偷生囝，食菜無清討契兄，
閻君判斷若知影，過八殿的虎頭城。

有人奸貪佮口詐，唆使人冤家有精差，
弄人生死拂摃拍，著過八殿虎頭鍘。

查埔查某若愛學話，掠到八殿割喙桮，
害人生死蓋重罪，著閣舂臼舂人膎欸。

第九殿閻君是都市，註福註碌無差疑，
好心的人快活死，歹心陰間閣凌治。

在生查某真聬儱 ，通奸害死𪜶親翁，
通奸害夫罪蓋重，著閣褪衫褪庫抱煙筒。

有人專門放重利，掠到九殿伊就知，
若到九殿的所在，燒烌研末過米篩。

十殿閻君是轉魂，轉魂車台鬧紛紛，
查埔查某規大群，挨挨𤲍𤲍 領關文。

轉魂車台六條空，頭條二條出世人，
三條豬狗水牛犅 ，四格鳥隻釣魚翁 。

落來一款第五格，出世講綴魚共蝦，
第六一空分較低，出世蠓蟲做塗膎。

查埔查某規大陣，挨挨𤲍𤲍來領憑 ，
出世做人袂要緊，出世精牲卻 蓋可憐喔。

歹心毋予伊分說，一人共伊分一領皮，
出世做人得家伙，出世精牲抾潘糜。

在生若奸拐人的翁，出世做婊來倚行，
提人的錢兼放港 ，著去出世雞母唌雞公。

在生咧開坩仔 間，轉輪出世做母形 ，
有的咧謀財害人命，著賜你乞食萬代窮。

一款查某做淫婦，出世鴨母壁跤跔，
予伊有生無通孵，身邊不時嘛有丈夫。

查埔若愛用查某人，轉魂出世做雞公，
不時有雞母通戲弄，免錢暢咧規世人嗯。（完）