ပဲခူးဆရာတော်ကို ပစ်သတ်သည့် စစ်တပ်ကို သံဃာတော်များ သပိတ်မှောက်ဆန္ဒပြ

ပဲခူးဆရာတော်ကို ပစ်သတ်သည့် စစ်တပ်ကို သံဃာတော်များ သပိတ်မှောက်ဆန္ဒပြ
……….
ပဲခူးဆရာတော် ပစ်သတ်ခံရမှုနဲ့ပတ်သက်ပြီး ဆရာတော်သံဃာတော်တချို့ဟာ စစ်တပ်ကို သပိတ်မှောက်ကံဆောင်နေကြပါတယ်။ ဒီကနေ့ ဇွန်လ ၂၇ရက်နေ့မှာ မကွေးတိုင်း၊ မြိုင်မြို့နယ်အတွင်းက သံဃာတော်တွေဟာ စစ်ကောင်စီကို ‘ပတ္တနိက္ကုဇ္ဇန’ ကံဆောင်သပိတ်မှောက်ပြီး၊ ဆန္ဒပြခဲ့ကြပါတယ်။

ဒါဟာ သံဃာတော်တွေဦးဆောင်တဲ့ ၂၀၀၇ ရွှေဝါရောင်တော်လှန်ရေး ပြီးတဲ့နောက် ၁၇နှစ်အကြာမှာ ပထမဆုံး ပြန်ပေါ်လာတဲ့ သပိတ်မှောက်ကံဆောင်မှု ဖြစ်ပါတယ်။

ရန်ကုန်မြို့၊ ကန်သုံးဆင့်ကျောင်းတိုက်ဆရာတော် ဘဒ္ဒန္တဂုဏိကာဘိဝံသနဲ့အတူ ဇွန်လ ၁၉ရက်နေ့မနက်ပိုင်းက ရန်ကုန်ကနေ မန္တလေးကို လေကြောင်းနဲ့ရောက်လာတဲ့ ဆရာတော်ဟာ တံတားဦးလေဆိပ်ကတစ်ဆင့် ငါန်းဇွန်မြို့က ငါးဇွန်းမြို့နယ်အတွင်းမှာ သေနတ်နဲ့ ပစ်ခတ်ခံရတာ ဖြစ်ပါတယ်။

စစ်ကောင်စီဘက်ကတော့ ဒီဖြစ်စဉ်နဲ့ပတ်သက်လို့ အမျိုးသားညီညွတ်ရေးအစိုးရ လက်အောက်ခံ ကာကွယ်ရေးတပ်ဖွဲ့တွေက မိုင်းဆွဲ၊ ပစ်ခတ်တိုက်ခိုက်တာကြောင့်ဆိုပြီး လိမ်လည် ထုတ်ပြန်ခဲ့ပါတယ်။ မျက်မြင်သက်သေတစ်ဦးဖြစ်တဲ့ ယာဉ်မောင်းကိုလည်း တော်လှန်ရေးတပ်ဖွဲ့တွေ လက်ချက်နဲ့ ဆရာတော်ပျံတော်မူရတာဆိုပြီး ဖိအားပေးထွက်ဆိုခိုင်းခဲ့ပါတယ်။

တကယ်တော့ စစ်ကောင်စီတပ်ဖွဲ့တွေ ဖောကားပေါ်ကနေ သေနတ်နဲ့ဝိုင်းပစ်လို့ ပဲခူးဆရာတော် ပျံလွန်တော်မူရတာလို့ အခင်းဖြစ်ရာမှာ အတူရှိခဲ့တဲ့ ကန်သုံးဆင့်ကျောင်းတိုက်ဆရာတော်ရဲ့ မိန့်ကြားချက်ကြောင့်သာ စစ်တပ်က သူတို့လက်ချက်ဆိုတာ ဝန်ခံထားပါတယ်။