Скачать или смотреть ငလျင်ဒဏ်သင့် မန္တလေး အခြေအနေ (ရုပ်/သံ)

ဧရာဝတီ၊ မတ် ၂၉၊ ၂၀၂၅

မြန်မာနိုင်ငံ စစ်ကိုင်းအနီး ဗဟိုပြု၍ အင်အား ရစ်ချ်စတာစကေး ၇ ဒသမ ၇ ရှိ ငလျင်လှုပ်ခတ်မှုကြောင့် မန္တလေးမြို့ပေါ် ရှိ အဆောက်အဦများ ပြိုကျပျက်စီးကာ ထိခိုက် သေဆုံးမှုများပြားသည်။

မတ်လ ၂၈ ရက်နေ့ ညနေ ၄ နာရီခွဲအချိန်ထိ မျက်မြင်တွေ့ရှိချက်များအရ မန္တလေးဆေးရုံကြီး ရင်ခွဲရုံ၌ လူမှုကူညီရေးအသင်းများမှ လာပို့ထားသည့် အလောင်းများ ပုံနေသလို အမည်မသိ အလောင်းများလည်းပါဝင်ကြောင်း၊ ခန့်မှန်းအားဖြင့် အလောင်း ၆၀ ခန့်ရှိပြီး သေဆုံးသူဦးရေ ထပ်မံမြင့်တက်လာနိုင်ကြောင်း ဧရာဝတီ၏ သတင်းရင်းမြစ်က ပြောသည်။

မန္တလေးမြို့သည် လူနေထူထပ်လာကာ အထပ်မြင့်အဆောက်အအုံများလည်း အများအပြားရှိပြီး ငလျင်ဒဏ်ကြောင့် နန်းမြို့ရိုး၊ ရှေးဟောင်းတန်ခိုးကြီး ဘုရားများအပါအဝင် ဘုန်းကြီးကျောင်း၊ ဗလီများနှင့် နေအိမ် အများအပြား ပြိုကျပျက်စီးခဲ့သလို နေအိမ်အတွင်း မနေရဲသဖြင့် လူအများ လမ်းပေါ်ထွက်နေကြကြောင်းလည်း ၎င်းက ပြောသည်။

မြို့နယ်အလိုက်ဖွဲ့စည်းထားသည့် လူမှုကယ်ဆယ်ရေးအသင်းများကသာ ကယ်ဆယ်ရေးကို လုပ်ဆောင်နေရကြောင်း သိရသည်။

လက်ရှိအချိန်ထိလည်း ကယ်ဆယ်ရေးလုံလောက်မှု မရှိဘဲ ပြိုကျနေသော အဆောက်အဦများအတွင်း ပိတ်မိနေသူ များလည်းရှိကြောင်း၊ နန်းတွင်းအခြေစိုက် အလယ်ပိုင်းတိုင်းစစ်ဌာနချုပ်မှ ရဟတ်ယာဉ်ဖြင့် မြို့အား ပတ်ကြည့်သည်ကိုသာ တွေ့ရကြောင်း ဒေသခံအချို့က ဆိုသည်။

မန္တလေးမြို့သည် မြန်မာနိုင်ငံ၏ ဒုတိယမြို့တော်ဖြစ်သလို လူဦးရေ ၆,၂၈၃, ၆၆၃ ဦးနေထိုင်ပြီးလူဦးရေအချိုးအားဖြင့် ၁၂ ဒသမ ၁ ရာခိုင်နှုန်းဖြစ်ကာ ရန်ကုန်နှင့် ရှမ်းပြည်နယ်ပြီးလျှင် တတိယအချိုးအများဆုံးနေထိုင်ရာ တိုင်းဖြစ်ကြောင်း စစ်ကောင်စီ ထုတ်ပြန်သော ၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းရှေ့ပြေး လူဦးရေစာရင်းအရ သိရသည်။

ငလျင်နှင့် ပတ်သက်၍ မတ်လ ၂၈ ရက်နေ့ညက ပြောခဲ့သော စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် မိန့်ခွန်းတွင်မူ သေဆုံးမှုအနေဖြင့် နေပြည်တော်ကောင်စီနယ်မြေ ၉၆ ဦး၊ စစ်ကိုင်းမြို့ ၁၈ ဦး၊ ကျောက်ဆည်မြို့ ၃၀ ဦးဖြင့် စုစုပေါင်း ၁၄၄ ဦး၊ ထိခိုက်မှုများမှာ နေပြည်တော်ကောင်စီနယ်မြေ ၄၃၂ ဦး၊ စစ်ကိုင်းမြို့ ၃၀၀ ဦးဖြင့် စုစုပေါင်း ၇၃၂ ဦး ရှိကာ ထိခိုက်သေဆုံးမှု ထပ်တိုးလာနိုင်ကြောင်း ပြောသွားသည်။

#မြန်မာ #ဧရာဝတီ #ငလျင် #မန္တလေး #နန်းမြို့ရိုး #MyanmarEarthquake
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/3btQYpR