Скачать или смотреть کیا حضرت عثمان رضی اللہ عنہ گورنری کے لئے رشتہ داروں کو ترجیح دیتے تھے ؟ [FaceOff EP-15/72]

انجینئر محمد علی مرزا نے اپنے کتابچے میں بعض روایات سے یہ تاثر دینے کی کوشش کی ہے کہ حضرت عثمان رضی اللہ عنہ اپنے رشتہ داروں کو بلاوجہ نوازتے تھے۔ سنن النسائی کی روایت میں ہے کہ آپ صلی اللہ علیہ وسلم نے فتح مکہ کے موقع پر چار افراد کے قتل کا حکم دیا کہ جن میں عبد اللہ بن ابی سرح تھے۔ یہ عبد اللہ بن ابی سرح۔ حضرت عثمان رضی اللہ عنہ کے رشتہ دار تھے۔ پہلے ایمان لائے اور رسول اللہ صلی اللہ علیہ وسلم کے کاتب بھی رہے۔ بعد میں مرتد ہو گئے اور اس کے بعد پھر اسلام قبول کر لیا۔ اللہ کے رسول صلی اللہ علیہ وسلم نے ان کے دوبارہ اسلام لانے کو قبول کر لیا تھا۔ یہ سنن النسائی کی روایت میں ہے۔
سنن النسائی کی ایک دوسری روایت میں ہے کہ ایک شخص وہ ہے جو مجبوری میں کلمہ کفر کہتا ہے اور دوسرا وہ ہے جو شرح صدر سے کلمہ کفر کہتا ہے تو انجینئر محمد علی مرزا نے اس آیت اور روایت کا ایسا ترجمہ کیا ہے کہ اس آیت کو عبد اللہ بن ابی سرح پر اپلائی کر دیا اور کہا کہ اس شخص کو حضرت عثمان رضی اللہ عنہ نے مصر کا گورنر لگایا ہوا تھا۔ انجینئر محمد علی مرزا کا کہنا یہ ہے کہ حضرت عبد اللہ بن عباس رضی اللہ نے کہا ہے کہ یہ آیت مبارکہ کہ جو شرح صدر سے کلمہ کفر کہتا ہے، عبد اللہ بن ابی سرح کے بارے میں ہے۔ یہ بات درست نہیں ہے کیونکہ عربی متن کا یہ ترجمہ ہے نہیں۔
عربی متن جو بات موجود ہے، اس کا صحیح ترجمہ یہ ہے کہ حضرت عبد اللہ بن عباس رضی اللہ عنہ کہتے ہیں کہ یہ جو آیت ہے کہ جس نے شرح صدر سے کفر کیا تو اب اس کے لیے واپسی کا رستہ نہیں ہے بلکہ جہنم ہی ہے تو یہ آیت کا یہ حصہ منسوخ ہے۔ اور اس کی ناسخ آیت یہ ہے کہ جن لوگوں نے فتنے میں پڑنے کے بعد ہجرت کی تو اللہ عزوجل ان کو معاف کرنے والا ہے۔ یہاں فتنے سے مراد کفر ہے۔ تو اس آیت سے مراد عبد اللہ بن ابی سرح ہے۔ لیکن انجینئر محمد علی مرزا نے اس سے مراد پچھلی آیت لے لی۔
دوسری روایت جو انجنیئر محمد علی مرزا نے بیان کی ہے کہ ایک پادری نے حضرت عمررضی اللہ عنہ سے کہا کہ تمہاری کتاب میں کیا لکھا ہے؟ تو اس نے کہا کہ یہ لکھا ہے کہ آپ بڑے امانت دار ہوں گے۔ حضرت عمر رضی اللہ عنہ نے دوبارہ پوچھا کہ جو میرے بعد آئے گا، اس کے بارے تمہاری کتاب میں کیا لکھا ہے؟ تو پادری نے کہا کہ یہ لکھا ہے کہ وہ نیک تو ہو گا لیکن اپنے رشتہ داروں کو ترجیح دے گا۔ اس سے انجنیئر محمد علی مرزا نے یہ ثابت کیا ہے کہ حضرت عثمان رضی اللہ عنہ اپنے رشتہ داروں کو نوازتے تھے۔ اب یہ رسول اللہ صلی اللہ علیہ وسلم کا قول نہیں ہے بلکہ ایک پادری کا قول ہے۔
دوسرا اس روایت کو علامہ البانی نے ضعیف الاسناد کہا ہے۔ اس کو شیخ شعیب ارنووط نے کہا ہے کہ یہ ضعیف الاسناد ہے۔ دار الدعوہ دہلی کی مجلس علمی نے کہا ہے کہ یہ روایت ضعیف الاسناد ہے۔ صرف زبیر علی زئی صاحب نے کہا ہے کہ صحیح الاسناد ہے۔ لیکن مرزا صاحب نے جمہور کی تحقیق نقل نہیں حالانکہ وہ ان کے مصادر میں ہیں اور صرف زبیر علی زئی صاحب کی تحقیق نقل کی ہے۔ اگر وہ غیر متعصب ہوتے تو سب کی تحقیق نقل کرتے۔ تو زیادہ کی تحقیق جو ان کے خلاف جا رہی تھی، چھپا لی ہے اور کم کی بیان کر دی۔
ایک اور روایت میں ہے کہ آپ صلی اللہ علیہ وسلم کے سامنے کسی صحابی نے اپنا خواب بیان کیا کہ انہوں نے دیکھا کہ آسمان سے ترازو اتارا گیا تو اس میں اللہ کے نبی صلی اللہ علیہ وسلم اور ابو بکر رضی اللہ عنہ کا وزن کیا گیا تو اللہ کے نبی صلی اللہ علیہ وسلم کا پلڑا بھاری ہو گیا۔ اس کے بعد ابو بکر اور عمر رضی اللہ عنہما کو تولا گیا تو ابو بکر رضی اللہ عنہ کا پلڑا بھاری ہو گیا۔ اس کے بعد عمر اور عثمان رضی اللہ عنہما کو تولا گیا تو عمر رضی اللہ عنہ کا پلڑا بھاری ہو گیا۔ اس کے بعد ترازو اٹھا لیا گیا۔ تو یہ سن کر آپ صلی اللہ علیہ وسلم کا چہرہ متغیر ہو گیا۔ اب انجینئر محمد علی مرزا نے اس پر بریکٹ لگاتے ہوئے لکھا ہے کہ یہ حضرت عمر رضی اللہ عنہ کے بعد معاملات میں تغیر آنے لگا تھا حالانکہ روایت میں واضح طور موجود ہے کہ حضرت عثمان رضی اللہ عنہ کے بعد کے دور کی طرف اشارہ ہے نہ کہ ان کا دور مراد ہے۔ مزید تفصیل کے لیے ویڈیو دیکھیں۔