មីឆា [ម្ហូបខ្មែរ] stir fry noodle [និយាយភាសាខ្មែរ] [Kitchen Story]

គ្រឿងផ្សំ៖
មីលឿង (egg noodle)
សាច់ជ្រូក ៣ខាំ
ផ្សិត ១ខាំ ការ៉ុត កន្លះខាំ ស្ពៃជើងទា ២ខាំ
ទឹកស៊ីអីវ ២ស្លាបព្រាបាយ ទឹកត្រី ១ស្លាបព្រាបាយ ទឹកប្រេងខ្យង ១ស្លាបព្រាបាយ ស្ករ ៣ស្លាបព្រាកាហ្វេ ម្រេច កន្លះស្លាបព្រាកាហ្វេ ប្រេងល្ង ១ស្លាបព្រាកាហ្វេ ខ្ទឹមស ៥កំពឹស ទឹកប៉េងប៉ោះ ១ស្លាបព្រាបាយ ទឹកស៊ុបមាន់ (ទឹកធម្មតាក៏បាន) កន្លះកូនចាន

វិធីធ្វើ
១. លាយទឹកស៊ីអីវ ទឹកត្រី ទឹកប្រេងខ្យង ស្ករ ម្រេច និងប្រេងល្ងចូលគ្នាឱ្យសប់។ យកគ្រឿងដែលបានលាយនោះ២ស្លាបព្រាបាយទៅប្រឡាក់សាច់ដែលបានហាន់ទុក ហើយឈូសខ្ទឹមសពីរកំពឹសដាក់ប្រឡាក់ជាមួយនឹងសាច់ដែរ។
២. បន្ទាប់ពីប្រឡាក់សាច់រួចហើយ ត្រូវបន្ថែមទឹកប៉េងប៉ោះ១ស្លាបព្រាបាយ និងទឹកស៊ុបមាន់កន្លះកូនចានទៅក្នុងគ្រឿងដែលបាន លាយអម្បាញ់មិញ។
៣. ហាន់ស្ពៃជើងទាជា២ ឬ៤ ហាន់ផ្សិតជាចំណិតៗ ហាន់ការ៉ុតជាសរសៃៗ និងចិញ្ច្រាំខ្ទឹមទុកឱ្យហើយ
៤. ចាក់ទឹកក្តៅត្រាំមីរយៈពេល២-៥នាទី។ ស្រង់មីចេញ រួចយកគ្រឿងដែលបានលាយទុក៥ស្លាបព្រាបាយមកច្របល់ជាមួយនឹងមីឱ្យសប់
៥. ចាក់ប្រេង ទុកឱ្យក្តៅ រួចលីងផ្សិតឱ្យស្ងួតបន្តិច។ ចាក់ប្រេងថែមបន្តិចទៀត ហើយបំពងខ្ទឹមសឱ្យឈ្ងុយ ចាក់សាច់ជ្រូកចូល ឆារហូតដល់សាច់ជិតឆ្អិន ទើបដាក់ការ៉ុត និងស្ពៃជើងទាចូល ឆាទាល់តែស្ពៃរៀងស្រពាប់បន្តិច ទើបដាក់មី និងគ្រឿងដែលនៅសល់ចូលទាំងអស់ ឆារយៈពេល២នាទី ឬរហូតដល់សរសៃមីទន់ល្អ ជាការស្រេច។