CCM Tanga waungana na familia ya marehemu Kibao kufanya dua maalumu

Chama Cha Mapinduzi (CCM) Mkoa wa Tanga, kwa kushirikiana na familia ya aliyekuwa kada wa Chadema, marehemu Ali Kibao, wamefanya dua maalumu kumuombea marehemu. Dua hiyo imefanyika leo, Alhamisi Septemba 19, 2024, katika Msikiti Mkuu wa Ijumaa wa Riyadh, mkoani Tanga.

Mwenyekiti wa CCM Mkoa wa Tanga, Rajabu Abdallah ameeleza sababu ya kufanya dua hiyo, akieleza kuwa marehemu Ali Kibao alikuwa miongoni mwa wanazuoni wakubwa wa Tanga, na alikuwa amesoma madrasa mbalimbali mkoani humo. Licha ya kuwa na itikadi tofauti za kisiasa, CCM mkoani humo walikuwa wakishirikiana naye kwenye masomo ya dini, hali iliyowafanya waone umuhimu wa kumuombea.

"Marehemu Ali alikuwa ni miongoni mwa wanazuoni walioheshimika hapa Tanga, na sisi kama wananchi wa Tanga tumehuzunishwa sana na kifo chake. Hivyo, tumeungana na Rais Samia Suluhu Hassan na Watanzania wengine kuhakikisha kuwa wale wote waliohusika katika tukio hili wanachukuliwa hatua," amesema Rajabu.

Ali Kibao alifariki dunia Septemba 8, 2024, siku moja baada ya kuripotiwa kuwa alishushwa kwenye basi akiwa safarini kutoka Dar es Salaam kwenda Tanga Septemba 7, mwaka huu.