Скачать или смотреть శ్రీ ఆనందతీర్థ దండకం (సంక్షిప్త రూపం)

శ్రీ ఆనందతీర్థ దండకం (సంక్షిప్తం)

శ్రీ పూర్ణ ప్రజ్ఞం ప్రపర్ణార్తిహారిం
ప్రభాదివ్యకాయం ప్రకీర్తిప్రదాయం
భజే వాయుపుత్రం భజే తేజగాత్రం
భజేహం పవిత్రం భజే వ్యాసశిష్యం
భజే పూర్ణరూపం భజే బ్రహ్మతేజం

బటంచున్ ప్రభాతంబు సాయంత్రమున్
నీ నామసంకీర్తనల్ జేసి
నీ కీర్తి వర్ణించి
నీమీద నే దండకంబొక్కటిన్ జేయనూహించి
నీ మూర్తిగావించి నీ సుందరంబెంచి
నీ దాసదాసుండనై
మూలరామ భక్తుండనై
నిన్ను నే తల్చెదన్
నిన్ను నే గొల్చెదన్

నీ కటాక్షంబునన్ జూచితే
వేడుకల్ జేసితే
నా మొర ఆలించితే
నన్ను రక్షించితే

వేదవతీదేవి గర్భాన్వయాదేవ
నిన్నెంచ నేనెంతదానన్
దయాశాలివై జూచియున్
దాతవై బ్రోచియున్
దగ్గరన్ నిల్చియున్

దొల్లి రామదాసుండవై
స్వామికార్యార్థమొనరించి
భీమరూపంబునేతెంచి
కల్యాది దుష్టులన్ ద్రుంచి
ధర్మకార్యంబున్ ఎరవేర్చి

కలియుగంబునన్ జ్ఞానకార్యార్థమై
మధ్యగేహుండకున్ పుత్రుండవై
పాజకక్షేత్రంబుకేతెంచి
బాలుండవై పశుగ్రాసంబు భుజియించి
బాలభీముండవై ఖ్యాతిన్ గణించి

ఉడిపికిన్ జేరి
నీ అనంతేశ్వరున్ దర్శించి
గాలిదయ్యెంబుల బాధలన్ బాపి
నివ్వారలన్ రక్షించి
చింతగింజలన్ నాణెములుగా గావించి
వ్యాపారునకున్నిచ్చి
నీ దండ్రి చింతయున్ బాపి

విద్యార్థివై సర్వవిద్యలన్
ప్రజ్ఞయున్ జూపి
వాక్యార్థములన్ చెప్పి
గురువులన్ సంతోషమొందించి
నీ దండ్రి ఆనంతింబొంది

అచ్యుతప్రేక్షులన్ చేరి
సన్యాసమున్ పొంది
పూర్ణప్రజ్ఞులై ప్రజ్ఞయున్ జూపి
ఆనందతీర్థులై ప్రమోదంబున్ బంచి
మధ్వాచార్యుండనే వేదనామంబు నీబొంది

హరిసర్వోత్తముండనుచు
పంచభేదంబులన్ జూపి
జగన్మిథ్యావాదంబునన్ ఖండించి
మధ్వమతంబున్ దెల్పి

దిగ్విజయంబులన్ జేసి
ఉడిపికిన్ జేరి
మృత్తికంబున బైష్మీకరార్చిత
శ్రీకృష్ణునిన్ కొలిచి
అష్టమఠంబులన్ కూర్చి

బదరికాశ్రమమునకేతెంచి
వేదవ్యాస శిష్యుండవై
భాష్యంబులన్ రచియించి
ధరలోన జ్ఞానంబు సుస్థిరంబొందించి

దేశసంచారమున్ చేసి
కుభాష్యముల్ ఖండించి
నరసింహ మూలరామాదులన్ పూజించి
అణిమాదిసిద్ధులన్ జూపె

నీ ప్రజ్ఞయుంగాంచి
ప్రమోదంబులంబొంది
నీ శిష్యగణంబులుంజేరి
వాయుదేవుడాయనుచు నిన్ను పొగడంగ

ఉడిపిక్షేత్రంబునన్
ఐతరేయపాఠంబు బోధించ
దేవలోకంబు పుష్పవృష్టియున్ కురిపింప
అదృశ్యమై బదరికాశ్రమంబు చేరి

నేటికిన్ మూలగ్రంధాదిరూపంబునన్
శిష్యప్రశిష్యులందుండి
జ్ఞానకార్యంబులన్ జేయించు

నీ నామసంకీర్తనల్ జేసితే
పాపముల్ బాయునే
భయములున్ తీరునే
భాగ్యముల్ కలుగునే

సకలసామ్రాజ్యముల్
సంపత్తులున్ కలుగునో
సుందరాకార యో
భక్తమందార యో
పుణ్యసంచార యో
ధీరయో వీర

నీవే సమస్తంబు
నీవే మహాఫలముగా వెలసి
భావి బ్రహ్మదేవుండవై
నీ దయాదృష్టి వీక్షించి

నీ మూలరూపంబునన్
అవతారరూపంబులన్
భేదంబు నేనెంచ
నన్నేలు స్వామి

సదా జ్ఞానరూపా నమస్తే
రామదాసా నమస్తే
వాయుదేవా నమస్తే
నమస్తే నమస్తే నమస్తే నమః 🙏