Скачать или смотреть MOTHER'S INSTINCT - Homily by Fr. Danichi Hui on May 11, 2025

MOTHER'S INSTINCT - Homily by Fr. Danichi Hui on May 11, 2025

GOSPEL: John 10:27-30

Story: Sa isang Science Class nagkaroon ng eksperimento ang mga estudyante. Pinagdala sila ng kanilang guro ng beer, whisky, gin at tubig. Lahat ito inilagay sa isang garapon. Bawat isang garapon na may laman nilagyan ito ng tig-iisang uuod. Makalipas ang dalawang oras, namatay ang uod sa garapong may beer, whisky at beer. Samantala, buhay naman ang uod sa loob ng garapong may tubig.

Kaya naman, tinanong sila ng kanilang guro kung ano ang “conclusion” nila sa eksperimento. Matapos ang ilang minutong pag-iisip sinabi ng mga estudyante; “we therefore conclude that alcoholic drinks are good. They can kill worms in our bodies.” (kaya ang mga alcoholic walang bulate sa tiyan kumpara sa mga hindi manginginom, dahil pinapatay nito ang bulate.)

Tama po ba yun? (sino nagsabing tama? Sinong nagsabing mali?) Hindi ba’t parang tama pero mukhang may mali? O parang mali pero mukhang tama? May ganitong mga pangyayari sa buhay natin; isip natin tama pero pakiramdam natin mali. Kaya nga kailangan natin sa buhay ng isang “Taga-Gabay”. (sabihin mo nga, Taga-Gabay)

Biblical: Mga kapatid, ngayong araw na ito ay ipinagdiriwang natin ang Linggo ng Mabuting Pastol. Kaya naman ang ating mga Pagbasa ay magpapakilala sa atin hindi lang basta Taga-Gabay, kundi isang mabuti Taga-Gabay; at ito ay ang Mabuting Pastol.

Sa ating Ebanghelyo, ipinapakilala ni Hesus ang kanyang sarili bilang isang Mabuting Pastol. Mayroong 3 Katangian ang isang Mabuting Pastol:

1.May Boses: Ang isang tupa ay hindi malinaw na nakakakita. Kaya naman ang isang Pastol boses niya ang kanyang ginagamit upang mapasunod ang kanyang mga tupa. Kaya nga ang sabi ni Hesus; “Nakikinig sa akin ang aking mga tupa.” Pero hindi lang basta boses, kundi kailangan mayroong sinasabi at hindi lang basta sinasabi, kundi mabuti ang sinasabi.

Para ang isang Taga-Gabay ay pakinggan, nararapat lang na ang kanyang boses ay nagsasabi ng mabuti. Kailangan may laman ang sinasabi. Hindi makakapag-gabay ang isang tao kung walang laman ang sinasabi. Walang kabutihang maidudulot ang isang Taga-Gabay kung hindi mabuti ang sinasabi. Walang kakapuntahang mabuting direksiyon kung ang isang Taga-Gabay ay hindi tama ang sinasabi. (Ang isang Mabuting Pastol kailangan may boses. May kayang sabihin. May laman ang sinasabi. Mabuti ang sinasabi. Dahil kung walang masabi o walang laman ang sinasabi, walang maidudulot na buti.)

2.Kilala ang Kaniyang mga Tupa: Sa isang pastulan iba’t iba ang mga tupa. May kanya kanyang katangian ang bawat tupa. Iba’t iba ang kulay at laki. Magkakaiba din ng kasarian. Kung kaya’t para magabayan ang bawat isa, kailangan kilala ng Pastol ang kanyang tupa. Para makilala ang isang tupa, kailangan may ugnayan para sila ay magkaunawaan; para din malaman ang kanilang pangangailangan.

Ganito ang isang Mabuting Taga-Gabay, babad sa kanyang inaakay. Nauunawaan dahil mayroong ugnayan. Natutugunan ang pangangailangan dahil alam niya ang kailangan. Naiintindihan dahil ang pinagdadaanan ay kanyang nararamdaman.

3.May Malasakit: Noong panahon ni Hesus may mga bayaran o upahang pastol. Sila yung katuwang ng may-ari para pastulin ang kaniyang mga tupa. Ngunit ang problema sa bayaran o upahang pastol kapag may panganib, nauuna pang tumakbo kaysa sa mga tupa. Palibhasa hindi sa kaniya ang mga tupa. Kaya’t naituturing niya ang mga itong iba.

Ang Taga-Gabay makikitang mabuti kung ito ay marunong magmalasakit. Yung kayang unahin ang ibang kapakanan bago ang sarili. Kayang magsakripisyo at hindi nagdadala sa kapahamakan. Gaya ng sinabi ni Hesus; “Binibigyan ko sila ng buhay na walang hanggan, at kailanma’y di sila mapapahamak; hindi sila maaagaw sa akin ninuman.”

Celebration: Ngayon po ay pinagdiriwang natin ang Araw ng mga Ina. Kung titignan ang katangian ng isang Pastol masasabi natin hindi ito malayo sa katangian ng isang MABUTING INA. “May Boses” na nagpapangaral. “Kilala ang kaniyang Tupa (anak)” dahil sa kaniya galing ang sariling anak. Ika nga, “mother’s instinct”. Higit sa lahat ang isang ina ay “May Malasakit”. Hindi pa nagsasabi ang anak, alam na ng ina ang gagawin.

Ganun din bukas ay Election. Kung hindi mo pa naiisip kung sino ang iboboto, tignan ang katangian ng isang Mabuting Pastol. Dahil ang isang pinuno ay parang Pastol. Siya ay gabay na magdadala sa tupa sa kaayusan at kabutihan. Kung sa mga nakalipas na taon, hindi tayo nadala sa mabuting sitwasyon, huwag mo na iboto. Dahil dadagdag lang ang maraming taon nang walang nangyayaring kaayusan at kabutihan sa ating bayan.

Mga kapatid, para malaman kung ang Pastol ay mabuti hanapin ang tatlong katangian: May boses, kilala ang kaniyang tupa at higit sa lahat may malasakit.

#soledaddemanila #frdanichihui