Скачать или смотреть #ព្រះបន្ទូលនៃសេចក្ដីពិតសម្រាប់ថ្ងៃព្រហស្បតិ៍

#ចំណងជើងវីដេអូ៖ «សូមកុំនិយាយទាស់នឹងព្រះ» Don’t Speak Against God

#រៀបរៀងឡើងដោយ Pastor Chris

#ព្រះបន្ទូលនៃសេចក្ដីពិតសម្រាប់ថ្ងៃព្រហស្បតិ៍ ទី០៥ ខែមីនា ឆ្នាំ២០២៦

«សូមកុំនិយាយទាស់នឹងព្រះ» Don’t Speak Against God

#អត្ថបទព្រះបន្ទូលដកស្រង់នេះរៀបរៀងឡើងដោយ Pastor Chris បង្រៀនអំពី «ជីវិតដ៏អស់កល្ប»

«ព្រះ‌យេហូវ៉ា ទ្រង់​មាន​បន្ទូល​ថា ពាក្យ​សំដី​របស់​ឯង​រាល់​គ្នា បាន​ទាស់​នឹង​អញ​ជា​ខ្លាំង ទោះ​បើ​យ៉ាង​នោះ​ក៏​ឯង​រាល់​គ្នា​ថា យើង​បាន​និយាយ​អ្វី​ទាស់​នឹង​ទ្រង់» (ម៉ាឡាគី ៣:១៣)

តាមរយៈខគម្ពីរខាងលើនេះ យើងបានអាននូវអ្វីដែលគួរឱ្យពិចារណាយ៉ាងខ្លាំង។ តាមរយៈហោរាម៉ាឡាគី ព្រះមានបន្ទូលថា៖ «ពាក្យ​សំដី​របស់​ឯង​រាល់​គ្នា បាន​ទាស់​នឹង​អញ​ជា​ខ្លាំង»។ ចូរស្រមៃមើលថា មនុស្សហ៊ានពោលពាក្យសម្តីដែលប្រឆាំងទាស់នឹងព្រះ, ប៉ុន្តែ ដោយសារតែភាពល្ងង់ខ្លៅ នោះពួកគេបានសួរវិញថា៖ «តើយើងបាននិយាយអ្វីខ្លះ ដែលប្រឆាំងនឹងព្រះអង្គ?» ពួកគេមិនទាំងដឹងខ្លួនថា អ្វីៗដែលពួកគេកំពុងតែនិយាយនោះ គឺផ្ទុយស្រឡះពីព្រះបន្ទូលរបស់ព្រះឡើយ, រឿងនេះនៅតែបន្តកើតមានរហូតមកដល់សព្វថ្ងៃនេះ។

មានមនុស្សជាច្រើន បានឈរនៅខាងផ្ទុយពីព្រះ នោះគឺតាមរយៈពាក្យសម្តីរបស់ពួកគេដោយមិនដឹងខ្លួននោះឯង។ ពួកគេ បាននិយាយអ្វីៗដែលតែងតែបដិសេធនូវអ្វីដែលទ្រង់ បានមានបន្ទូលមកកាន់ពួកគេ។ ជាឧទាហរណ៍៖ នៅក្នុងព្រះគម្ពីរខ្លះ ព្រះអង្គបានមានបន្ទូលថា សុខភាពដ៏ល្អលើស នោះគឺជាធម្មជាតិរបស់អ្នកដែលនៅក្នុងព្រះគ្រីស្ទ ក៏ប៉ុន្តែ មានមនុស្សជាច្រើននៅតែនិយាយអំពីជំងឺគ្រប់ពេលវេលា។ នោះហើយគឺជាការនិយាយប្រឆាំងទាស់នឹងសេចក្តីពិត ហើយព្រះបន្ទូលរបស់ព្រះគឺជាសេចក្តីពិត (យ៉ូហាន ១៧:១៧)។

ព្រះបន្ទូលចែងបែបនេះថា៖ «អ្វីៗទាំងអស់ជារបស់អ្នក» ដូច្នេះហើយ សូមកុំនិយាយថា «ខ្ញុំគ្មានលុយ» ឬ «ខ្ញុំអស់រលីងហើយ» ឱ្យសោះ។ ចូរប្រកាសថា៖ “ខ្ញុំមានធនធានគ្រប់គ្រាន់ សម្រាប់អ្វីៗទាំងអស់ ដែលព្រះទ្រង់សព្វព្រះហឫទ័យឱ្យខ្ញុំធ្វើ។ ព្រះគម្ពីរបង្ហាញយើងបែបនេះថា៖ សេចក្តីស្លាប់និងជីវិត គឺស្ថិតនៅលើអំណាចនៃអណ្តាតរបស់អ្នក (សុភាសិត ១៨:២១)។ ពាក្យសម្តីរបស់អ្នក មិនមែនជាពាក្យទទេៗឡើយ នៅពេលដែលពាក្យសម្ដីនោះស្របទៅនឹងព្រះបន្ទូលរបស់ព្រះ នោះសេចក្តីពិត និងភាពពិតនៃព្រះបន្ទូល នឹងត្រូវបានសម្រេចនៅក្នុងជីវិតរបស់អ្នកបាន។

ក៏ប៉ុន្តែ នៅពេលណាដែលពាក្យសម្តីរបស់អ្នកផ្ទុយពីព្រះបន្ទូល នោះអ្នកកំពុងតែបង្កើតចន្លោះប្រហោងឱ្យសត្រូវ (អារក្ស) ចូលមកហើយ។ ព្រះមានបន្ទូលថា៖ «អញ​នឹង​មិន​ចាក​ចេញ​ពី​ឯង ក៏​មិន​បោះ​បង់​ចោល​ឯង​ឡើយ» បាន​ជា​យើង​រាល់​គ្នា​អាច​នឹង​និយាយ ដោយ​ក្លាហាន​ថា «ខ្ញុំ​មិន​ព្រម​ខ្លាច​ឡើយ ព្រោះ​ព្រះ‌អម្ចាស់​ទ្រង់​ជា​ជំនួយ​ខ្ញុំ តើ​មនុស្ស​នឹង​ធ្វើ​ដល់​ខ្ញុំ​ជា​យ៉ាង​ណា​បាន» (ហេព្រើរ ១៣:៥–៦)។ ចូរកត់សម្គាល់លំដាប់លំដោយនេះ គឺថា៖ ទ្រង់មានបន្ទូល ដើម្បីឱ្យអ្នក អាចនិយាយដោយក្លាហានបាន នេះគឺជាគោលការណ៍ ឬជាគ្រឹះ។ ទ្រង់សព្វព្រះហឫទ័យឱ្យពាក្យសម្តីរបស់អ្នក ស៊ីចង្វាក់គ្នាជាមួយនឹងព្រះបន្ទូលរបស់ទ្រង់។

នេះគឺជារបៀបដំណើរការជាមួយនឹងព្រះរាជ្យរបស់ព្រះ, ប្រសិនបើ អ្នកទើបតែដឹងរឿងនេះ វាប្រហែលជាស្តាប់ទៅហាក់ដូចជាចម្លែកនៅពេលដំបូងៗ ក៏ប៉ុន្តែ នេះគឺជាជីវិតនៃសេចក្ដីជំនឿ។ សូមកុំឈរនៅខាងផ្ទុយនឹងព្រះឡើយ។ សូមកុំបដិសេធព្រះពររបស់ទ្រង់ ដែលនៅក្នុងជីវិតរបស់អ្នក ដោយព្រោះតែការសារភាព ឬនិយាយចេញតែពាក្យសម្តីដែលខុសឆ្គង។ ចូរនិយាយនូវអ្វីដែលទ្រង់មានបន្ទូល, ចូរប្រកាសនូវអ្វីដែលទ្រង់បានប្រកាស, នោះហើយជារបៀបដើរតាមបែបជ័យជម្នះ!

#សេចក្តីអធិស្ឋាន
ឱព្រះវរបិតាជាទីស្រឡាញ់អើយ ទូលបង្គំសូមអរព្រះគុណព្រះអង្គ ដែលបានបើកសេចក្តីយល់ដឹងអំពីអំណាចនៃពាក្យសម្តី។ ទូលបង្គំប្រកាសដោយក្លាហានថា៖ ទូលបង្គំពោរពេញដោយសុខភាពល្អ មានកម្លាំងមាំមួន មានភាពរុងរឿង ហើយទូលបង្គំដើរជាមួយនឹងជ័យជម្នះ។ ទូលបង្គំនឹងនិយាយឱ្យស្របតាមសេចក្តីពិតរបស់ព្រះអង្គជានិច្ច ដោយបញ្ជាក់ថា៖ សេចក្តីពិតរបស់ព្រះអង្គគឺជា រឿងពិតដែលមាននៅក្នុងជីវិតរបស់ទូលបង្គំ។ ទូលបង្គំរស់នៅខ្ពស់ជាងកាលៈទេសៈទាំងពួង ដោយប្រតិបត្តិតាមព្រះពររបស់ព្រះគ្រីស្ទ ក្នុងព្រះនាមព្រះយេស៊ូវ។ អាម៉ែន។

#ការសិក្សាបន្ថែម៖ សុភាសិត ១៨:២១ ម៉ាកុស ១១:២៣ ហេព្រើរ ១០:២៣