Скачать или смотреть ရဲသားဟောင်း ကျူးလွန်ခဲ့တဲ့ ထိုင်းရဲ့အဆိုးဝါးဆုံး လူသက်*မှု - Nong Bua Lamphu - Murder Monday

Story Bears ၏ အခြားလူမှုကွန်ယက်စာမျက်နှာများ
  / storybearsmm  
  / storybearsmm  
  / storybearsmm  
https://t.me/StoryBearsMM

ထိုင်းနိုင်ငံရဲ့ သမိုင်းမှာ လူကွယ်ပျောက်မှု အများဆုံး ပြစ်မှုတစ်ခုကို ထိုင်းရဲသားဖြစ်ခဲ့သူ တစ်ယောက်က ကျူးလွန်ခဲ့တာပါလို့ ပြောရင် ယုံကြမလားခင်ဗျာ။ ဒီအမှုဟာ ၂၀၂၂ ခုနှစ် အောက်တိုဘာလ ၆ ရက်နေ့က ဖြစ်ခဲ့တဲ့ ဖြစ်ရပ်မှန် အဖြစ်အပျက်တစ်ခု ဖြစ်ပါတယ်။ ရဲအရာရှိဟောင်းရဲ့ လက်နက်နဲ့ လက်သရမ်းမှုကြောင့်မို့ လူပေါင်း ၃၆ ယောက် ကွယ်လွန်ခဲ့ရပြီး ၁၀ ယောက် ဒဏ်ရာ ရခဲ့ပါတယ်။ ဒီအဖြစ်အပျက်ဟာ လူတစ်ဦးတစ်ယောက်ထဲရဲ့ လက်သရမ်းမှု ကျူးလွန်မှုကြောင့် ထိုင်းနိုင်ငံအတွင်းမှာ ကွယ်လွန်သူ အများဆုံးအဖြစ်အပျက် ဖြစ်ခဲ့ပါတယ်။ ပြီးခဲ့တဲ့နှစ်ပတ်က ကျွန်တော်ပြောခဲ့တဲ့ Korat Terminal 21 အမှုထက်ကို ကွယ်လွန်သူ ပိုများခဲ့တဲ့ အဖြစ်အပျက် ဖြစ်ခဲ့ပါတယ်။ အဲ့ဒီအမှုမှာက ကျူးလွန်သူအပါအဝင် လူအယောက်သုံးဆယ်ကွယ်လွန်ခဲ့ပြီး ၅၈ ယောက် ဒဏ်ရာ ရခဲ့တာဆိုတော့ ဒီအမှုက ကွယ်လွန်သူအရေအတွက် ပိုများနေခဲ့တာပေါ့လေ။

ပြီးတော့ ဒီပြစ်မှုကို အဓိက ကျူးလွန်ခဲ့တဲ့နေရာက ကလေးထိန်းကျောင်း ဖြစ်တာမို့ ကွယ်လွန်ခဲ့ရသူ အများစုဟာ ကလေးငယ်လေးတွေ ဖြစ်နေခဲ့ရတာက ထိုင်းနိုင်ငံတင်မက တကမ္ဘာလုံးက လူတွေကိုပါ ယူကြုံးမရ ဝမ်းနည်းစေခဲ့တဲ့ အဖြစ်အပျက်တစ်ခု ဖြစ်ပါတယ်။ ဒီတစ်ပတ် ကျွန်တော်တို့ရဲ့ Murder Monday အစီအစဉ်ကနေပြီးတော့ ဒီအမှု ဘယ်လိုဘယ်ပုံ စတင်ဖြစ်ပွားခဲ့တယ်ဆိုတဲ့ အကြောင်းအချက်တွေ၊ တရားခံရဲ့ ဘဝနောက်ကြောင်းနဲ့ ကျူးလွန်ခဲ့ရတဲ့ အကြောင်းတရား စတဲ့ အချက်တွေကို တင်ဆက်ပေးသွားမှာ ဖြစ်ပါတယ်။

ဒီကနေ့ ကျွန်တော်ပြောပြမယ့် အကြောင်းအရာတွေမှာ စိတ်လက်မအီမသာဖြစ်ဖွယ်ရာ အချက်အလက်တွေ၊ ကိုယ့်ကိုယ်ကို အဆုံးစီရင်မှုတွေ၊ လက်နက်ကိုင် ရမ်းကားမှုတွေပါဝင်တာမို့လို့ ကြည့်ရှုဖို့ရာ အဆင်ပြေမှသာ ဆက်လက်ကြည့်ရှုဖို့ အကြံပြုလိုပါတယ်။

ပထမဦးဆုံးအနေနဲ့ တရားခံရဲ့ နာမည်နဲ့ သူ့ရဲ့ နောက်ခံအကြောင်းတရားလေးတွေကို နည်းနည်းလောက် ပြောပြချင်ပါတယ်။ ဒီအမှုကို ကျူးလွန်ခဲ့တဲ့ တရားခံ ရဲအရာရှိဟောင်းရဲ့ နာမည်က Panya Khamrap လို့ ခေါ်ပါတယ်။ ၂၀၂၂ ခုနှစ် မှာ သူ့အသက်က ၃၄ နှစ်အရွယ်ဖြစ်ပါတယ်။ ဒီလူက ထိုင်းနိုင်ငံ အရှေ့မြောက်ပိုင်း အီဆန်ဒေသထဲက Nong Bua Lamphu မြို့နယ်ထဲက Tha Uthai (ထ အူထိုင်း) ဆိုတဲ့ ရွာကလေးမှာ နေတာ ဖြစ်ပါတယ်။ ဒီရွာကလေးက သူ့ဇာတိပေါ့။ ငယ်စဉ်ကတည်းက အနေအေးပြီးတော့ ဂီတကို စိတ်ပါဝင်စားတဲ့သူလို့ ဆိုပါတယ်။ အလယ်တန်း အထက်တန်း တက်နေခဲ့တဲ့ အချိန်တွေမှာ ဂီတနဲ့ ပတ်သက်တဲ့ ကျောင်းအဖွဲ့ ဘင်ခရာတီးဝိုင်းတွေမှာ အဖွဲ့ဝင်အနေနဲ့ ပါဝင်ခဲ့တဲ့ကလေးလို့ ဆိုပါတယ်။

အထက်တန်းကျောင်းပြီးတော့ Ramkhamhaeng တက္ကသိုလ်မှာ ဥပဒေပညာနဲ့ ဘွဲ့ရခဲ့တယ်လို့ ဆိုပါတယ်။ သူ့အမေရဲ့ အပြောအရ သူ့သားက စာတော်သလိုမျိုးပဲ အနေအေးတဲ့အတွက်ကြောင့်မို့လည်း သူ ဒီလို ဘွဲ့ရတဲ့အခါမှာတော့ သူ့အမေတင်မက ရွာထဲက လူတွေကလည်း ချီးကျူးကြရတဲ့ စာတော်တဲ့ ကလေးတစ်ယောက် ဖြစ်ခဲ့တယ်ပေါ့။ ဥပဒေနဲ့ ဘွဲ့ရပြီးတဲ့ နောက်ပိုင်းမှာတော့ ရဲအကယ်ဒမီကျောင်းကိုလည်း တက်ခဲ့တယ်လို့ ဆိုကြပါတယ်။ အဲ့ဒီလို တက်ရောက်ပြီးတော့ ၂၀၁၂ ခုနှစ်မှာတော့ ဘန်ကောက်မှာ တာဝန်ကျခဲ့တယ်လို့ ဆိုပါတယ်။ အဲ့လိုတာဝန် ထမ်းဆောင်နေရင်းက ဒုတပ်ကြပ်၊ တပ်ကြပ် နောက် 2019 မှာတော့ တပ်ကြပ်ကြီး ရာထူးတွေကို တဆင့်ခြင်း တိုးရရှိခဲ့တယ်လို့ ဆိုပါတယ်။ အဲ့လို တပ်ကြပ်ကြီးရာထူးကို တိုးပေးပြီးနောက်မှာတော့ သူ့ဇာတိမြေဖြစ်တဲ့ Nong Bua Lumphu ဇွန်လ ၃၀ ရက်နေ့ ၂၀၁၉ ခုနှစ်မှာ ပြန်လည် တာဝန်ချပေးခဲ့တာ ဖြစ်ပါတယ်။

ထိုင်းနိုင်ငံ အရှေ့မြောက်ပိုင်းက Nong Bua Lamphu မြို့က လူဦးရေ 21000 လောက်ပဲ ရှိတဲ့ နယ်မြို့သေးသေးကလေး တစ်ခု ဖြစ်ပါတယ်။ ဒီနေရာ ဒီဒေသမှာ နေထိုင်ကြတဲ့လူတွေက စိုက်ပျိုးရေးနဲ့ အသက်မွေးဝမ်းကြောင်းပြုကြတာ များပါတယ်။ ထိုင်းနိုင်ငံ အရှေ့မြောက်ပိုင်းက တခြားကျန်တဲ့ ဒေသတွေလို နိုင်ငံတကာခရီးသွားတွေ လာရောက်လည်ပတ်မှုနည်းတဲ့အတွက် တခြားဒေသတွေလို တိုးတက်ဖွံ့ဖြိုးမှု လူစည်ကားမှု မရှိဘဲ တိုးတက်ဖွံ့ဖြိုးမှု အားနည်းပါတယ်။ မြို့နယ်ကြီးတစ်ခုလုံးတောင်မှ လူဦးရေ ဒီလောက်ပဲ ရှိတယ်ဆိုရင် Panya နေတဲ့ မြို့နဲ့ရွာမှာ လူဘယ်လောက်နည်းမယ်ဆိုတာ ကျွန်တော်တို့တွေ တွေးကြည့်လို့ ရပါတယ်။ နယ်မြို့တွေ ရွာတွေရဲ့ ထုံးစံအတိုင်း တစ်အိမ်နဲ့ တစ်အိမ် သိကြ ခင်မင်ကြ ဝင်ထွက်သွားလာကြတာတွေ ရှိတာပေါ့လေ။

Panya နေတဲ့ရွာဆိုတာက မြို့နဲ့လည်း အဲ့လောက်မနီးဘူး။ တစ်ရွာလုံး တစ်အိမ်နဲ့တစ်အိမ် အကုန်သိကြ ခင်မင်ကြတယ်ပေါ့။ ဒါပေမယ့် အခင်းမဖြစ်ပွားခင် ရက်ပိုင်းအလိုလောက်မှာတော့ Panya ရဲ့ အိမ်ဘက်ကို လူတွေ အလည်အပတ် သွားဖို့ရာ ဘယ်သူမှ မဝံ့ရဲကြပါဘူး။ ဘာကြောင့်လဲဆိုတော့ ဆရာသမားက တအား သောင်းကျန်းနေလို့ပဲ ဖြစ်ပါတယ်။ မူးရူးသောင်းကျန်းနေတာမျိုး မဟုတ်ဘဲ သူက အေးအေးလေးနဲ့ ဇာတိပြတာမျိုးလို့ ဆိုပါတယ်။

ညဘက်တွေဆို တိတ်ဆိတ်ငြိမ်သက်နေတဲ့အချိန်မျိုးမှာ Panya တစ်ယောက် သူ့အိမ်နောက်ဖေးမှာ လက်နက်နဲ့ ပြုမ်းပြုမ်း ပစ်ခတ်တဲ့အသံတွေက အမြဲလိုလို ကြားနေရတော့ လူတွေက သူ့အိမ်ဘက်ကို အသွားအလာ လုပ်ဖို့ ကြောက်ကြတာ မထူးဆန်းပါဘူး။ တချိန်တခါတုန်းက ရွာရဲ့ ပညာတတ်တစ်ယောက်အဖြစ် လူတွေ ဂုဏ်ယူခဲ့ကြရတဲ့ အနေအေးတဲ့ လူတစ်ယောက်ဟာ အခုဆိုရင်တော့ ဒေါသဘီလူးဝင်စီးပြီးတော့ လူတိုင်းက ကြောက်ရတဲ့သူအဖြစ် ပြောင်းလဲသွားခဲ့တာ ဖြစ်ပါတယ်။

ဒီလူ ဒီလို သောင်းကျန်းနေတာ ရဲအာဏာပိုင်တွေကို မတိုင်ဘူးလားပြောရအောင်လည်း ဒီလို သောင်းကျန်းနေခဲ့တဲ့ လူကိုယ်တိုင်က ရဲအရာရှိဟောင်းတစ်ယောက် ဖြစ်နေခဲ့တော့ ရွာကလူတွေအတွက် ကူရာ ကယ်ရာမဲ့နေသလို ဖြစ်နေခဲ့တာပေါ့။ ရဲအရာရှိဟောင်းလို့ ပြောရတာက ဒီလူက အဲ့လို အခြေအနေမှ ရဲမဟုတ်တော့ဘူးလားဆိုတော့ မဟုတ်တော့ဘူး။ ဒါပေမယ့် သူ့မှာ ရှိနေတဲ့ ရဲအဆက်အသွယ်နဲ့ သူလက်ထဲမှာ ရှိနေတဲ့ ပြုမ်းပြုမ်းကတော့ လူတွေအတွက် ကြောက်စရာ အရှိန်တစ်ခု ဖြစ်နေဆဲပဲပေါ့။

#storybears #storybearsmm #myanmar #truecrime #thailand