Kuj Kehn Nu Jee Pya Karda Aey | Punjabi Shayari (Nazam) | Ustad Daman

پنجابی نظم: کجھ کہن نوں جی پیا کردا اے
اُستاد دامنؔ
کجھ کہن توں وی پیا ڈردا اے
کجھ کہیے پاگل کہندے نے
چپ رہیے سینہ سڑدا اے
کجھ کہن نوں جی پیا کردا اے
کجھ کہن توں وی پیا ڈردا اے

ایتھے تن توں لیڑے لاہؤندے نے
کر ننگے جسم نچاؤندے نے
عزتاں دے سر کوئی کجدا نہیں
لاشاں نوں خوب سجاؤندے نے
کجھ کہن نوں جی پیا کردا اے
کجھ کہن توں وی پیا ڈردا اے

ایتھے جذبے وکدے ویکھے نے
ایتھے ہاڑے وکدے ویکھے نے
ایس جگ دی الٹی گنگا وچ
پھل ڈبدا پتھر تردا اے
کجھ کہن نوں جی پیا کردا اے
کجھ کہن توں وی پیا ڈردا اے

دھن دولت دھرم ایمان ایتھے
گیتا، انجیل، قرآن ایتھے
ایس دولت بدلے ہر کوئی
ہسّ ہسّ کے سولی چڑھدا اے
کجھ کہن نوں جی پیا کردا اے
کجھ کہن توں وی پیا ڈردا اے

کیہ رشتے ناطے مان ایتھے؟
ہے دولت رام رحمٰن ایتھے
ایتھے دن نوں گھپ ہنیرے نے
راتاں نوں سورج چڑھدا اے
کجھ کہن نوں جی پیا کردا اے ۔
کجھ کہن توں وی پیا ڈردا اے ۔

ایتھے لیڈر پان بھلیکھے جی
ایتھے لٹ دے لمبے لیکھے جی
ہر بندہ ایتھے ہر ویلے
پیسے دا کلمہ پڑھدا اے
کجھ کہن نوں جی پیا کردا اے
کجھ کہن توں وی پیا ڈردا اے

ایہہ اپنیاں دے ویری نے
دم دوسریاں دا بھردے نے
ایہہ مت کسے دی لیندے نئیں
جو من وچ آوے کردے نے
کیوں عقلوں باہر نہ آواں میں؟
ہُن ربا! کتھے جاواں میں؟
_________________________
Punjabi Poetry of Ustad Daman
Nazam: Kuj Kehn Nu Jee Pya Karda Aey
Poetry Recitation: Alyas Gondal
Presented by: Trinjan

Thank you for visiting Trinjan. Trinjan is aimed to bring best poetry & pros selected from classic literature to modern times both in Urdu (Hindi) & Punjabi languages. Please take some time and view the playlists we have created so far. If you think, Trinjan is worth it, please like, Subscribe & share with like minded friends. Happy listening 🙏."
_________________________
#PunjabiShayari
#UstadDaman
#punjabikavita
Punjabi Poem