عسى ما شر | محمود أسيري - ليلة ٣ محرم ١٤٤٣هـ

#محمود أسيري
كلمات الشاعر #علي السقاي

حسينية الرسول الأعظم الكربلائية - الكويت -
ليلة ٣ محرم ١٤٤٣هـ
-----------------

زينب يعمّه اشگد تغيّرتي ياهي العليله آنه لو إنتي
مهموم گلبي اْو زدتي همّه أسأل عسى ماشر يعمّه
اِمن الله السلامه
……………..
١
قصه الدهر يكتبني طفله الحزن شيّبني
آنه العليله
ابگدما أبويه ايحبني ايخاف السفر يتعبني
ابرحله طويله

خلّاني بالدار اْو رحل وابسفرته راح
لاچنّه مو رايد هجُر رايدني أرتاح
واليوم اِجه الظعن اْو رجع وابگلبي الافراح
أستقبِل اَهلي بالهلا واهمومي تنزاح

نَوّخ ظعن بس بي حرم تبچي مو أهلي يمكن ذوله صرْت أحچي
واگبالي وگفت تبچي حُرمه أسأل عسى ماشر يعمّه
اِمن الله السلامه
……………….
٢
يوم اِمن اَشد أيامي حيث اِستِفَز آلامي
اْو رَجَّفلي جسمي
حُرمه اوگُفَت جدامي تحچي ابدمعها الهامي
اْو نادتني بسمي

اشلون اِعرُفَتني فاطمه ماأعرف اشلون
مألوفه نبرتها اْو صرِت مخطوفة اللون
گالتلي آنه عمّتچ يانور العيون
مو بَچية املاگه بِچت بَچي اليفگدون

واستَغرَبت من هذا الملاگه واتوقَّعِت تبچيلي مشتاگه
كل هالحزن ماچنت اَفِهمه أسأل عسى ماشر يعمّه
اِمن الله السلامه
……………….
٣
من شفتچ ابهالجيّه متخوصره اْو محنيّه
اْو من عمرچ اَكبر
اِختلطت أُمور اعليّه هلْ هيّه لو مو هيّه
شكلچ تغيّر

عمّه گبل ما أسئلچ چا وين الرجال
خل اسئلچ بيچ اشجره واشغيّر الحال
يمكن بِعيد الشّر مَرَض بس الله لا گال
اْو يمكن يعمّه هالسَّفر راواچ الاهوال

خليني اَحضنچ عمّه خليني اِشبي مَتنِچ اِتأذّه مِن ايديني
مِتوَرّم اْو ماريد اَلِچمه أسأل عسى ماشر يعمّه
اِمن الله السلامه
……………….
٤
مِتغَيِّره عِذريني لو آنه مَدري اشبيني
من ينسى أهله !
ياعمّتي صدگيني بالگوّه عُرفَت عيني
لِيلى اويه رمله

مو إنتي بس مِتغيِّره كل الحرم هاي
واسكينه أكبر أصبحت من عندي بهواي
ياهي رُقيه عاجِزه اتميِّزها عيناي
اشلون الرباب اَنظُر تجي اْو عبدالله ماجاي

عبدالله وينه مِنشغف گلبي اِتأمَّلته يرجع يِمشي أَو يِحبي
ليش الطفل مو ويّه أُمّه أسأل عسى ماشر يعمّه
اِمن الله السلامه
……………….
٥
كل حُرمه تِبچي ابهمها اْو ريحة حَرِگ أشتَمها
ابثوب الحراير
كل طفله تِلزَم أُمها لو خيل اِجت مِن يمها
اِتصد عالحوافر

والباقر اِعرفتَه لچن هم الگلب زاد
صاير نِحيل اْو بي حزن مو عمر الاولاد
اْو ذاكه اللي شابت لِحيته چن زين العباد
معقوله من كل الزلم بس واحد العاد

وابرِگبُته أنظُر أثر واضِح مِتآكِله اْو حتى الجلِد طايح
اشصاير إله اْو نحلان جسمه أسأل عسى ماشر يعمّه
اِمن الله السلامه
……………….
٦
كفّالچ اعليه اِشحَل عمي الگمر مايقبَل
هالدمعه تجري
اْو عن والدي خلّ اَسأل أسمع حچي عن مقتَل
بس منهو مَدري

الشاعر سمعته اِمن البُعد ردّدله بيتين
يا أهلَ يثرب لا / شنو ما أستمع زين
بس چَنه ياعمّه ذِكر شي عنّ الحسين
لو چان هم عندچ خبر لا لا تِسكتين

ليش البچي زاد اْو صُبح مأتم لاشَك أُهو الينعاه اِبن حذلم
اشلون آنه عگب الفاض دمّه أسأل عسى ماشر يعمّه
اِمن الله السلامه
……………….