Скачать или смотреть UNYANYASAJI WA KINGONO WA WATOTO: Sababu, Dalili, Matibabu, Kuzuia

Katika video hii inazungumza kuhusu sababu, dalili, matibabu, namna ya kuzuia, matarajio baada ya matibabu ya Mtoto aliyenyanyaswa, endelea angalia mpaka mwisho kujifunza

Unyanyasaji wa kingono kwa watoto (sexual abuse) ni hali ya kuwaingiza kwa makusudi watoto wadogo kwenye shughuli za kingono. Hii inamaanisha, mtoto analazimishwa au kushawishiwa kufanya ngono au shughuli za kingono na mtu mwingine.
Tunaposema unyanyasaji wa kingono tunamaanisha:
• Ngono ya kinywa
• Picha za ngono
• Ngono
• Kugusa au kutomasa tomasa mtoto
Ni nini husababisha unyanyasaji wa kingono kwa watoto?
Jamii ilikuwa na ugumu kidogo kukabiliana na unyanyasaji wa kingono kwa watoto miongo michache iliyopita. Lakini siku hizi jamii imegutuka na inalichukulia hatua kali suala hili.
Ni vigumu kutambua ukubwa wa tatizo hili. Hii ni kwa sababu, unyanyasaji wa kingono unafanyika kwa siri sana – sio rahisi kuutambua kama unyanyasaji wa kimwili. Watoto mara nyingi wanaogopa kumwambia mtu yeyote kuhusu unyanyasaji huu. Matukio mengi ya unyanyasaji wa aina hii hayaripotiwi.
Kwa matukio mengi - wanyanyasaji ni wanaume – na wanakuwa ni watu wanaofahamiana au walio karibu na mtu anayenyanyaswa. Jambo hili linaumiza moyo sana kwa sababu, mara nyingi unyanyasaji huu unatendwa na kufanywa na mtu ambaye mtoto anamwamini na kumtegemea. Tatizo hili lipo kwenye jamii zote bila kujali tofauti za kiuchumi au kijamii
Ulevi wa pombe uliopitiliza, matumizi ya dawa za kulevya, matatizo ya kifamili (baba na mama) na umasikini wa kupindukia – unaongeza uwezekano wa watoto kunyanyaswa kiongono.
Mara nyingi, watu wanaowanyanyasa watoto kingono, unakuta nao walinyanyaswa walipokuwa wadogo – na unakuta wengine kwa sababu ya matatizo ya akili waliyoyapata – wanajikuta katika tabia ya kurudia rudia kunyanyasa watoto (pedophilia)
Utamtambuaje unyanyasaji wa kingono kwa watoto?
Dalili za kutendewa vibaya kingono kwa watoto zinafanana na za mtoto mwenye sonona ,wasiwasi au hofu:
• Matatizo ya tumbo, kama vile kujinyea, hasa anapokuwa na wasiwasi mwingi
• Matatizo wakati wa kula, kama vile kupungua/kupoteza hamu ya kula kabisa
• Dalili kwenye via vya uzazi au njia ya haja kubwa, kama vile, maumivu wakati kujisaidia au kukojoa, Kuwashwa au kutokwa uchafu ukeni
• Maumivu ya kichwa ya mara kwa mara
• Mtoto anakosa usingizi/ anashindwa kulala au kushtukashtuka toka usingizini
• Matatizo ya tumbo (malalamiko yao yanaweza yasiwe wazi sana)
Watoto wanaotendewa vibaya kingono wanaweza pia:
• Kuanza tabia mbaya za kutokujali na uharibifu kama vile kutumia pombe na madawa ya kulevya au kushiriki ngono hatarishi bila kujali
• Kufanya vibaya shuleni
• Kuwa na hofu nyingi sana
• Kujitenga na wengine au shughuli za kawaida zinazofanywa na wengine
Wakati gani utafute matibabu ya haraka?
Kama unashuku mtoto anatendwa vibaya kingono, tafadhali mpeleke hospitalini haraka. Kama hauwezi kumpeleka hospitalini kwa sababu yoyote, toa taarifa polisi mapema.

Utambuzi wa unyanyasaji wa kingono kwa watoto;
Kama unashuku mtoto anatendewa vibaya kingono, mtoto huyo anapaswa kuchunguzwa haraka iwezekanavyo na mtaalamu wa huduma ya afya. Madaktari wengi wamepewa mafunzo maalumu ya kuchunguza kesi zinazohusu unyanyasaji wa kingono.
Usicheleweshe uchunguzi wa daktari kwa sababu yoyote. Ishara nyingi za kuumizwa zinazosababishwa na kutendwa vibaya kingono ni za muda mfupi. Uchunguzi unapaswa kufanyika ndani ya masaa 72 ya tukio au ugunduzi.
Uchunguzi wa mwili mzima ni lazima ufanyike, ili kuangalia kama kuna alama au ishara zozote za kunyanyaswa kimwili na kingono.

Maeneo yanayochunguzwa ni kinywa, koo, uume, njia ya haja kubwa, na uke.
Daktari anaweza pia kupima vipimo vya damu ili kuangalia magonjwa ya zinaa, kama kaswende na VVU, na mimba kwa wanawake. Vipimo hivi vinamsaidia daktari kuamua matibabu.

Daktari ataandika na kurekodi dalili zote zinazotokana na unyanyasaji na ikiwezekana kupiga picha za majeraha kwa ajili ya kutunza kumbukumbu ya kilichotokea.

Uchaguzi wa matibabu baada ya unyanyasaji wa kingono kwa watoto
Uchunguzi ukikamilika daktari atatibu majeraha ya mwili kama yanavyotibiwa majeraha mengine.
Atampatia dawa za kuzuia au kutinu magonjwa ya zinaa ikiwemo UKIMWI. Kwa watoto wakubwa – watapatiwa dawa ili kuzuia mimba.

Watoto wote waliotendwa au kunyanyaswa kingono, wanapaswa kupata ushauri kutoka kwa mtaaamu wa afya ya akili.

Kama unashuku mtoto ananyanyaswa kingono ni jukumu lako kutoa taarifa polisi. Madaktari, waalimu na walezi wa watoto wanatakiwa na sheria ya Tanzania kutoa taarifa kama watashuku unyanyasaji wowote wa mtoto.

Baada ya taarifa kutolewa , polisi watapaswa kufanya uchunguzi. Matokeo ya uchunguzi yakionesha ni kweli mtoto anatendwa vibaya, anapaswa kulindwa asinyanyaswe tena – Ikibidi mtoto anaweza kuhamishwa na kuishi na mzazi asiyekuwa mnyanyasaji au jamaa mwingine.


Emmanuel Mniko #mniko #wikielimu