Скачать или смотреть TATIZO LA NGIRI: Sababu, Dalili, Matibabu, Kuzuia

Katika video hii inazungumza kuhusu sababu, dalili, matibabu, namna ya kuzuia, matarajio baada ya matibabu ya TATIZO LA NGIRI, endelea angalia mpaka mwisho kujifunza

Hapa tutaongea kuhusu ngiri – najua kwamba kuna mkanganyiko wa maana ya hili neno Ngiri. Wapo watu wanaoita Mabusha ngiri maji – kuhusu ngiri maji au mabusha, angalia tunayo video nyingine inayoyaongea.
Kwa watu wengi, Ngiri ni uvimbe unaotokea kwenye kitovu, tumboni, kwenye sehemu ya juu ya paja au kwenye mkato wa upasuaji. Ngiri (hernia) ni uvimbe unatokana na kuchoropoka na kutokeza nje kwa viungo vya ndani ya tumbo kwa sababu ya uwazi au udhaifu kwenye ukuta wa tumbo. Ukuta wa tumbo umeundwa na safu imara ya kiwambo kinachoitwa fascia ambacho kinaifunga pamoja misuli ya tumbo, na kazi yake kubwa ni kulinda na kuzuia vinavyopaswa kuwa ndani ya tumbo vibaki ndani.
Sasa, kama kuna udhaifu wa hiki kiwambo – viungo vya ndani ya tumbo kama utumbo – vinaweza kuchoropoka na kutokeza juu ya paja, kinena au kwenye kitovu – kwa wale waliofanyiwa upasuaji wa tumbo – kama misuli ya tumbo haitapona vizuri unaweza pia kupata ngiri kwenye kovu la upasuaji.

Je! Nini dalili za ngiri?
Ukiwa na uvimbe unaosababishwa na ngiri mara nyingi hausababishi shida yoyote. Hata hivyo, kuna wakati mwingine unaweza kujisikia vibaya au kuhisi maumivu. Unajihisi vibaya zaidi ukijinyoosha, ukijikamua, au ukiinua vitu vizito.
Ni kweli kwamba mara nyingi ngiri haisababishi usumbufu mkubwa kwa mtu, lakini inaweza kukua mpaka kuanza kukandamizwa na upenyo ilikopitia, kama ikikandamizwa sana – damu inaweza kuanza kushindwa kutembea vizuri na hivyo kuleta shida. Kama hali hii ikikutokea, utahishi maumivu makali na utahitaji upasuaji wa dharura ili kunasua sehemu iliyobana.

Ngiri husababishwa na nini?
Kwa watu wengi sababu ya ngiri haifahamiki. Mtu anaweza kuzaliwa na ngiri ila asijue – uvimbe ukaanza kuonekana baada ya miaka mingi – labda baada ya kuanza kubeba vitu vizito sana au kukohoa sana au kujikamua sana chooni – vitu vyote hivi vinaongeza shinikizo ndani ya tumbo na kusukuma vilivyomo ndani ya tumbo kwenda nje. Kuna baadhi ya watu, ngiri inapatikana kwenye familia yao.
Wapo watoto wanaozaliwa na ngirii. Hii inatokea kwa sababu ukuta unaofunika viungo vya tumbo unashindwa kufunga vizuri kabla ya kuzaliwa. Karibu watoto 5 kati ya 100 wana ngiri inayotokea kwenye kinena (wavulana zaidi kuliko wasichana). Kuna watoto ambao wanaweza wasipate dalili yoyote mpaka utu uzima.

Kama nilivyosema kabla, shughuli yoyote au tatizo lolote linaloongeza shinikizo/presha kwenye tishu za ukuta wa tumbo na misuli linaweza kusababisha ngiri ikatokea:
• Kufunga choo kwa muda mrefu - kunasababisha mgonjwa kujikamua sana ili kupata kinyesi.
• Kikohozi sugu.
• Uvutaji wa sigara.
• Kuongezeka kwa ukubwa wa tezi dume -kunasababisha mtu kujikamua sana ili kukojoa
• Unene au uzito mkubwa.
• Kuinua vitu vizito.
Wakati gani utafute matibabu ya ngiri haraka?
Kama nilivyosema awali, kwa watu wengi ngiri haisababishi shida yoyote, lakini kuna mambo ukiyaona inabidi uonane na dakatari kwa matibabu. Kama:
• Una ngirii inayouma na vilivyomo kwenye uvimbe haviwezi kusukumwa na kurudishwa polepole tumboni kwa kidole
• Una kichefuchefu, unatapika, au homa pamoja na ngirii inayouma.
• Una ngirii ambayo imekuwa nyekundu, zambarau, nyeusi, au yenye rangi isiyoelezeka.
• Una maumivu kwenye kinena na uvimbe.
• Una uvimbe kwenye kinena au kitovu, au kwenye eneo ulilofanyiwa upasuaji.
Utambuzi
Ukifika kwa daktari atakufanyia uchunguzi wa mwili na kuiona ngiri kama inaongezeka ukubwa akikohoa, akijikunja, akiinua, au kujikamua.

Kwa watoto wachanga, ngiri inaweza isionekane dhahiri, lakini mtoto akilia au kukohoa inaonekana. Katika baadhi ya wagonjwa, ultrasound inaweza kuhitajika kuangalia kama kuna ngiri.
Uchaguzi wa matibabu ya ngiri
Upasuaji ndio tiba pekee inayoweza kurekebisha ngiri.
Kwa ngiri ndogo ambayo haisababishi shida yoyote kwa mgonjwa, tunaweza kuiacha kwanza na kuiangalia kwa muda kabla ya kuamua kufanya upasuaji. Kama tunavyojua, upasuaji wowote una athari, kwa hiyo upasuaji utafanyika kama kuna ulazima.

Upasuaji mara nyingi unafanyika kwa ngiri ambayo inaongezeka ukubwa na kusababisha maumivu. Upasuaji unafanyika kurudisha ndani viungo vilivyochoropoka na kuziba au kuimarisha ukuta wa tumbo kwa wavu maalumu ili visitoke tena nje.

Kwa watoto ambao wana kitovu kikubwa kinachosababishwa na ngiri inayotokea kwenye kitovu (umblical) – kama haijaziba yenyewe mpaka mtoto anapofikisha umri wa miaka 5 – mtoto anapaswa kufanyiwa upasuaji kuirekebisha.


Emmanuel Mniko #mniko #wikielimu